BURADA REKLAMINIZ OLA
BİLƏR

BURADA REKLAMINIZ OLA
BİLƏR

Rövşən Ağayev: “Nə hansısa nəqliyyata nəzarət orqanı, nə yol polisi bu problemi həll etməyə maraqlı görünür”

“Xırdalan cəmi 17 kv/km ərazi olan ərazicə kiçik bir yaşayış məntəqəsidir. Amma cəmi 1700 hektrar kiçik ərazidə ən azı 250 min nəfər yaşadığı barədə məlumat var. Rəsmi sənəd üzərində 110 min göstərilsə də, icra hakimiyyət sistemində çalışanlardan qeyri-rəsmi kanallarla öyrəndiyimə görə faktiki yaşayanların sayı 250 min nəfəri ötür. Başqa bir rəqəm də tapmışam - elektrik abonentlərinin (yalnız əhali) sayı 50 mindən artıqdır. Gedənlər-yaşayanlar bilir, bu ərazidə yol infrastrukturu fəlakətli həddədir”.

 

Pravda.az-ın xəbərinə görə, bunu ekspert Rövşən Ağayev bildirib.

 

R.Ağayev qeyd edib ki, Xırdalanda tikdikcə tikiblər, amma normal yol-nəqliyyat infrastrukturu yaratmaq, nəqliyyat növlərini şaxələndirmək heç kimin ağlının ucundan keçməyib: “Bunlar artıq olub-keçən işlərdir, artıq geriyə dönüş yoxdur. Kimsə dar yollara bitişik 16-18 mərtəbəli binaları söküb normal genişlikdə prospektlər salası deyil indən sonra.

Amma indi dözülməz olan odur ki, bütün taksilər dəstə ilə avtobus dayanacaqlarını zəbt edirlər. Avtobuslar da öz yerlərində sərnişin götürmək imkanı tapmadığına görə onsuz da dar olan küçələrdə maşınların hərəkət zolağında insanları düşürüb-mindirməyə məcbur qalırlar. Hərəkət zolağında avtobus dayanırsa, aydındır ki, bütün hərəkət dayanır və böyük tıxaclar yaranır. Nə hansısa nəqliyyata nəzarət orqanı, nə yol polisi bu problemi həll etməyə maraqlı görünür. Hər gün on minlərlə insan normalda 5-10 dəqiqəyə tərk edə biləcəyi ərazini 35-40 dəqiqəyə güc-bəla ilə çıxıb Sumqayıt yolundakı növbəti tıxaca çata bilir. Uzunmüddətli müşahidələrim onu göstərir ki, Xırdalan daxilində nəqliyyatın tənzimlənməməsinə, avtobusların dayanacaqda taksi əlindən özlərinə yer tapa bilməməsinə hansısa maraqlar yaşıl işıq yandırır. Əks halda bu problem həll etmək çox asandır: dayanacaqlara kameralar yerləşdirilir, avtobusların yerini zəbt edənlər həmin an cəzalandırılır. Anlayıram ki, Xırdalanda avtobuslar çox pis işləyir və insanlar 1 manatlıq taksilərdən istifadə etməyə məhkumdurlar. Amma taksi dayanacaqlarının avtobus dayanacaqlarından 5-10 metr irəlidə məskunlaşması üçün də kifayət qədər imkan var”.

 

Kənan

Tarix: 5 Dekabr 2022, 15:36   
-->
Xəbər lenti
Çox oxunanlar

Ən son xəbərləri səhifəmizdən də izləyin