BURADA REKLAMINIZ OLA
BİLƏR

BURADA REKLAMINIZ OLA
BİLƏR

Deputat: ““Tərtər işi”ndə A-dan Z-yə qədər günahı olanların hər biri mütləq cəzasını almalıdır”

““Tərtər işi” adlanan proses artıq uzun müddətdir ki, gedir. Birbaşa baş prokurora bağlı xüsusi istintaq qrupu yaradılıb. Tanıdığımız çox savadlı, təcrübəli müstəntiqlər “Tərtər işi” ilə məşğul olurlar. Artıq konkret nəticələr, uğurlar da var. Əslində, tənqid etmək asandır. Çox ağır prosesdir. Bu işdə əli olan, sırf cinayət törədən insanlar dəqiq araşdırılmalı, üzə çıxarılmalıdır.  A-dan Z-yə qədər günahı olanların hər biri isə mütləq cəzasını almalıdır. Ölkə başçısının da “Tərtər işi” üzərində xüsusi diqqəti var. İllər öncə bu işi süni şəkildə böyüdən, günahsız insanları həbsə atan, onlara işgəncə verən şəxslərin dəqiq adı, soyadı, siyahısı müəyyənləşməli, haqq-ədalət öz yerini tutmalıdır”.

 

Bu sözləri Pravda.az-a açıqlamasında Milli Məclisin deputatı Vüqar İskəndərov deyib.

 

Deputat bildirib ki, Tərtər hadisələrinin baş vermə səbəbləri araşdırılır, iştirakçıların, zərərçəkmiş şəxslərin ifadələri alınır: “Günahsız yerə həbs olunanların hissə-hissə artıq azadlığa buraxılması faktları da hamımıza məlumdur. Bu, deməyə əsas verir ki, mütləq “Tərtər işi”ndə ədalətli son olacaq. Sözün əsl mənasında, günahsız insanlar azadlığa çıxacaq, bəraət alacaqlar. Bu işi törədənlər əsl vətən xainləridir. Orduda hansısa gözükölgəli insanların sayını süni surətdə artırmaq bir növ Ordunun gücünü, qətiyyətini zəiflətmək məqsədi daşıyır. Ona görə də bu, Vətənə xəyanətdir. Ordu müqəddəsdir, Vətənin keşiyindədir, hər bir zabit, əsgər şərəflə Vətənə xidmət etməlidir. Biz bu xidməti, şərəfi 44 günlük Vətən müharibəsində gördük. Azərbaycan Ordusu Ali Baş Komandanın rəhbərliyi altında xalqla bir yumruq halında əsl şərəf, ləyaqət mübarizəsi apardı, müzəffər Ordu, müzəffər xalq adını bizə qazandırdı. Ordumuzla qürur duyur, fəxr edirik. Hər bir əsgər, zabit qəhrəmandır. Onlar torpaqlarımızın mühafizəsi, hər bir qarışı uğrunda canlarından belə keçməyə hazırdırlar. Eşq olsun Azərbaycan Ordusuna! Buna kölgə salmağa cəhd edənlər isə mütləq tapılıb, cəzalandırılmalıdırlar”.

 

Aytəkin Qardaşova

Tarix: 7 Dekabr 2022, 14:58   
-->
Xəbər lenti
Çox oxunanlar

Ən son xəbərləri səhifəmizdən də izləyin