Şuşa-Xankəndi yolundakı aksiya nə vaxtadək davam edəcək? – Ekspertdən AÇIQLAMA

“Qarşı tərəfdən rəsmi kimsə gəlib bizimlə görüşməyənə qədər aksiya davam edəcək. Tələblərimiz var və bunları eşitməlidirlər. Ona görə də aksiyanın dəqiq nə vaxta qədər davam edəcəyini bilmirəm, amma sıralarımız artmaqdadır. Təminat işləri daha da möhkəmləndirilir. Çox güman ki, çadırları artıq konteynerlər əvəz edəcək. Çünki getdikcə hava daha da kəskinləşir. Müraciət etmişik ki, bizə dəstək olsunlar, konteynerlər verilsin. İstilik məsələlərini daha da artırsınlar. Təminat, qidalar yaxşıdır. İsti çay daim var. Elə olur ki, yeməklərlə bağlı da əlavə dəstək gəlir. Bu sahədə problem yoxdur”.

Bu sözləri Pravda.az-a Şuşa-Xankəndi yolunda keçirilən aksiyanın iştirakçısı, ekspert Telman Qasımov deyib.

O bildirib ki, aksiya iştirakçılarında yüksək əhval- ruhriyyə var: “Ən vacib məsələlərdən biri budur. Onların ərazini tərk etmək fikirləri yoxdur. Qayıtmaq istəmirlər, əksəriyyətini zorla geri göndəririk. Bakıdan xeyli sayda insan aksiya üçün müraciət edir. Alınmır, çünki askiya keçirilən ərazi, təxminən, 1000 kvadrata qədər yerdir, çadırların, iştirakçıların sayı artıqca sıxlıq yaranır, hərəkət etmək olmur. Humanitar yol da açıqdır. Hamı şahid oldu ki, Beynəlxalq Qızıl Xaç Komitəsinin müşahidəsi ilə erməni qadını xəstəxanaya apardılar. Heç bir maneə də olmadı. Ermənilərin apardıqları yalan təbliğat bir daha darmadağın olundu. Məqsədimiz sona qədər mübarizəni davam etməkdir. Dövlətimiz nə qərar verərsə, ona uyğun hərəkət edəcəyik. Göstəriş verərsə “dağılın”, məsləhət olsa ki, QHT rəhbərləri, aksiya iştirakçıları ərazini tərk etsinlər, edəcəyik”.

T.Qasımov aksiya səbəbindən hər an təxribat riskinin ola biləcəyi barədə söyləntilərə isə belə cavab verib: “Biz bir günlük aksiya keçirmək məqəsdilə getmişdik ki, bəyanatımızı, tələblərimizi irəli sürək. Düşünürdük, Andrey Volkov gələcək, görüşəcək. Amma 9-cu gündür artıq, hələ də Volkov yoxdur. Volkov vəziyyəti daha da ağırlaşdırır. Bu aksiyanın uzanmasına birinci səbəb Volkovun özü oldu. Əlbəttə, Volkov özbaşına deyil, ondan böyük güclər var. Biz “Volkov” deyəndə Kremli nəzərdə tuturuq. Kremldən hansı tapşırıq gələcək, Volkov onunla hərəkət edəcək. Həmin gün bizim tələblərimizi eşitsəydi, bizimlə həmfikir olsaydı, bu gün problemlər yaranmazdı. Düşünmürəm ki, hansısa ciddi risklər var. Çünki Daxili Qoşunların xüsusi təyinatlıları, çevik alayın Şuşadakı qarnizonu və digər qurumlar tərəfindən çox yüksək səviyyədə, yetərincə mühafizədə, onların nəzarətindəyik. Düşünmürəm ki, bizə qarşı hansısa ciddi problem yarana bilər. Müvafiq güc strukturları kənardan 24 saat müşahidə aparır”.

Aytəkin Qardaşova

Tarix: 20 Dekabr 2022, 15:29

Xəbər lenti