Xalqın maraqları Bakının mərkəzindəki aksiyada deyil, soyuq, şaxtalı havada Laçın yolunda qorunur

Bakının mərkəzində, “Torqovı” adlanan ərazidə Bəxtiyar Hacıyevin azadlığa buraxılması tələbi ilə aksiya keçirməyə cəhd olub. Doğrusu, anlaşılan deyil, “Bəxtiyara azadlıq” qışqırmaqla onun azadlığa buraxılması mümkün deyil. Qanun çərçivəsində müəyyən addımları məhkəmə qarşısında əsaslandırmaq lazımdır. Aksiya ilə azadlığa buraxılma mümkün olsaydı, həbsxanalar bom-boş olardı. Lap deyək ki, aksiya keçirmək istəyirsiniz, Bakı Şəhər İcra Hakimiyyətinə müraciət edin, müvafiq yer ayrılsın. Məqsəd aydındır. Əsas şübhəli məqam: doğrudanmı, burada məqsəd Bəxtiyarın azadlığa buraxılmasıdır, yoxsa... İndiki həssas məqamda niyyət qarışıqlıq yaratmaqdır, bunun adı xalqa və dövlətə xəyanətdir. Xalqın maraqları Bakının mərkəzindəki aksiyada deyil, soyuq, şaxtalı havada Laçın yolunda qorunur.

Bakıda Bəxtiyar Hacıyevin azadlığa buraxılması tələb edilib

Laçın yolundakı aksiyada tələb birdir: ekoloji terror durdurulsun, qızıl, mis-molibden yataqlarının qanunsuz istismarı aradan qaldırılsın, ekoloqlarımızın həmin ərazilərdə monitorinq aparmasına imkan yaradılsın. Bakının mərkəzində isə qarışıqlıq yaratmaq Laçında ekoaktivistlərlə bağlı bütün mümkün mənbələri araşdıran və aksiyanın dövlət tərəfindən təşkil olunmasını əsaslandırmağa çalışan ermənilərə və onların havadarlarına bəhanə vermək idi. Axı ölkə daxilində bəzi şəxslər o aksiyanın – Azərbaycanın haqlı addımının əleyhinədir. Müxtəlif cür don geyindirirlər, iddia edirlər ki, yolu Azərbaycan bağlayıb. Özlərini “sülh quşu”, “no war”çı adlandırırlar. Lap yaxşı, orada hərbi əməliyyatlar keçirilmir ki? Hökumət rəsmiləri isə dəfələrlə bildiriblər ki, nə aksiya təşkil ediblər, nə də yolu bağlayıblar.

Xankəndi-Laçın yolunda aksiya keçirilən yerdən BQXK-nın maşınları və təcili tibbi yardım avtomobilləri maneəsiz hərəkət edib

Həmin yol bağlanırsa da, bunu Rusiyanın sülhməramlı kontingeti həyata keçirir ki, gərginlik yaransın. Dinc insanlar əsasən sülhməramlıların hərəkət etdiyi yolu necə bağlaya bilər ki? Absurddur! Ermənilərin maraqlarını onlardan daha artıq müdafiə edənlərə deyiləcək söz yoxdur.

Xankəndi-Laçın yolunda aksiya keçirilən yerdən sülhməramlılar üçün təminat yükü maneəsiz hərəkət edib - FOTO - VİDEO

Bəllidir ki, Bakıdakı qarışıqlıq yaratmaq cəhdinin sifarişçiləri və maliyyəçiləri də məhz ermənilər və onlarla birgə işləyən xarici dairələrdir. Mürəkkəb hava şəraitində Laçın yolunda əziyyətə qatlaşaraq milli mənafelərimizi müdafiə edən QHT fəalları, ictimaiyyət nümayəndələri ilə müqayisədə guya insan hüquqlarını müdafiə edən bu xəyanətkarlar nə qədər cılız və miskin görünürlər. Azərbaycan ictimaiyyəti bu satqınları tanımalıdır, qınamalıdır. Ermənilərin maraqlarına xidmət göstərən Ermənistanda da yaşa bilər. Vətən müharibəsində şəhidlər verməmişik ki, kimlərsə indi meydana çıxıb xəyanətlə məşğul olsunlar. Tarix baş verənləri unutmayacaq, əmin ola bilərsiniz!

Kənan Mirzəyev

Tarix: 23 Dekabr 2022, 18:11

Xəbər lenti