Deputat: “Əsas fakt budur ki, AXC-nin ilk qərarlarından biri əzəli torpağımzı Ermənistana vermək olub”

“Ümumilli lider Heydər Əliyev və cənab Prezident İlham Əliyev tarixi şəxsiyyətlərimizin adlarının əbədiləşdirilməsi, onların adlarının küçələrə, parklara, mədəniyyət mərkəzlərinə, məktəblərə verilməsi siyasətini həmişə dəstəkləyib. Bunu əməli addımlarla göstəriblər. Xalq Cümhuriyyətinin baniləri haqqında da ölkə Prezidenti dəfələrlə sərəncamlar imzalayıb, onların ildönümlərinin keçirilməsi, sənədli filmlərin çəkilməsi, kitabların yazılması dövlət siyasətinin əsas məqamlarından biridir. Amma biz tarixi də təhrif etməli deyilik. Cənab Prezidentin söylədiyi kimi, 1918-ci ildə Azərbaycan Xalq Cümhuriyyətinin qərarlarından biri tarixi ərazimiz olan İrəvanı Ermənistana vermək oldu. Bu, əlbəttə ki, tarixi faktdır. Əsas missiyamız tarixi olduğu kimi, təhrif etmədən söyləməli, yazmalı, faktları dəyişdirmədən düzgün formada gələcək nəsillərə çatdırmalıyıq”.

Bu sözləri Pravda.az-a açıqlamasında Milli Məclisin deputatı Vüqar İskəndərov deyib.

Deputat bildirib ki, tarix boyu bir sıra ölkələr tarixlərini saxtalaşdırmağa cəhd edib, özlərindən yalançı tarixlər uydurub, gələcəklərini normal qura bilməyiblər: “O vaxtkı şərtlər, tələblər, çağırışlar məsələsi, təbii ki, müzakirə oluna bilər. Onların hər biri bilinir, anlaşılır, danışılır. Dəfələrlə bu barədə kitablar yazılıb, fikirlər söylənilib. Bu gün də şərtlər çətindir. Amma Azərbaycan çətin şərtlər altında uğurlu xarici siyasət həyata keçirir, güclüdür, diktə edən ölkələr sırasındadır. Özünün liderliyi, xalqının yenilməzliyi ilə dünyaya bir nümunədir. Əsas fakt budur ki, AXC parlamentinin ilk qərarlarından biri əzəli torpağımızı Ermənistana vermək olub. Bundan sonra bəlalarımız birə-beş artmağa başladı. Onsuz daha əvvəl də ermənilər dediklərinə sahib çıxmayıb, həmişə Azərbaycana, Türkiyəyə qarşı ərazi iddialarından olublar. İrəvanın Ermənistana verilməsindən sonra qısa vaxt ərzində yenə də ermənilər Azərbaycana qarşı torpaq iddiaları irəli sürdülər, terror törətdirlər, insanları qətl etdilər. Bunların hər biri Ermənistanın yeritdiyi siyasət olub. Bu gün də yüz il əvvəlki şərtlərə bənzəyən məsələlər ortadadır. Bir çox güclər, dövlətlər Ermənistanın arxasındadır. Cənab Prezidentin bir fikrinə xüsusi diqqət yetirmək lazımdır: Azərbaycan və Ermənistan arasındakı münasibətlərin nizamlanmaması üçün cəhd edən dövlətlərin birincisi Ermənistan deyil. Bu fikir özlüyündə çox şeyi əhatə edir. Yəni Ermənistandan çox erməni olan dövlətlər, təşkilatlar, qurumlar var ki, onlar iki ölkə arasındakı münasibətlərin normallaşmasında maraqlı deyillər, əksinə, onun pozulması üçün hər şeyi etməyə hazırdırlar. Bunlar bugünkü reallıqlardır. Tarixdə buraxılan səhvlər – o səhvlər ki bizə çox baha başa gəlib – təkcə 1918-ci ildə deyil, ondan əvvəl də olub. Artıq bu səhvlərin hər birindən nəticə çıxartmalı, gələcəkdə təkrarlamamalıyıq. Hazırkı müasir Azərbaycan sürətlə inkişaf edir, irəliləyir, dünya ölkələri sırasında xüsusi çəkiyə, nüfuza malikdir. Getdiyimiz bu yol daha böyük nailiyyətlər qazanmaq hədəfini qarşımıza qoyur. İnanırıq ki, bütün çətin, amma şərəfli işlərin öhdəsindən gələ biləcəyik”.

Aytəkin Qardaşova

Tarix: 28 Dekabr 2022, 08:25

Xəbər lenti