Azərbaycanda öz qadını tərəfindən döyülən kişilər məhkəməyə müraciət edir? – Boşanmalarla bağlı maraqlı faktlar

Xüsusilə pandemiya dövründə dünya ölkələri üzrə boşanmaların sayı digər illərlə müqayisədə dəfələrlə artıb. Aparılan araşdırmalar göstərib ki, heç də hər zaman qulağımıza tanış gələn “qadına şiddət”, “xəyanət” kimi məsələlər boşanmaların əsas səbəbi olmayıb. Dünyanın müxtəlif ölkələrində maraqlı boşanma faktları arasında siqaret çəkmək, toyda taxılan zinət əşyalarını başqa biri ilə paylaşmaq, cinsi məzmunlu saytlara girmək, doğum zamanı kişinin öz həyat yoldaşının yanında olmaması da var. Məsələn, İtaliyada anasından ayrı qala bilməyən bəy anasını bal ayına gətirib və evliliyi 3 həftə ərzində bitib. Almaniyada bir qadın ərinin təmizlik xəstəliyinə tutulması səbəbindən boşanmaq qərarına gəlib və 15 ildən sonra evliliyini bitirib. Ərinə 30 yaşı olmasına baxmayaraq, 24 yaşında olduğunu deyən qadının yalanı 10 il sonra üzə çıxıb və əri onu boşayıb. Evindəki tutuquşunun "səbr et" və "boşan" sözlərini təkrarlaması sayəsində bir qadın ərinin onu aldatdığını öyrənib və boşanmaq qərarına gəlib. 99 yaşlı ər 96 yaşlı arvadının 60 illik eşq məktublarını tapdıqdan sonra boşanmaq qərarına gəlib və bu ayrılıq ilə onlar dünyanın ən yaşlı boşanan cütlüyü sırasına daxil olublar. Bəs görəsən ölkəmizdə boşanmaların artmasına səbəb hansı amillərdir?

Tanınmış vəkil Babək Həmidov Pravda.az-a açıqlamasında deyib ki, Azərbaycanda nikahın pozulmasının bir neçə əsas səbəbini sadalamaq olar: “Bunlardan biri qadına qarşı zorakılıq, xəyanət, yaxın qohumlarla birgə yaşayış varsa, qaynana və baldızla münasibətlərin düzgün qurulmaması, tez-tez mübahisələrin düşməsi hallarıdır. Maddi sıxıntılarla bağlı boşanmaq üçün müraciətlər çox az sayda olur”.

Paylaşımları ilə gündəm olan vəkillə MÜSAHİBƏ: “65 yaşlı iş adamı 20 yaşlı xanımla evlənəndə…” | Gənc Ailə

Vəkil bildirib ki, bir çox hallarda məhkəmələrə boşanma ilə bağlı müraciət edən qadın tərəfidir: “Çox az hallarda kişi tərəfi müraciət edir. Azərbaycanda məhkəmə sistemi nikahın pozulmasının səbəbini araşdırmadığına görə bu kimi statistikaları tutmaq çox çətindir. Çünki qanunvericiliyə görə, nikah könüllü ittifaqdır. Necə ki şəxslər evlənəndə onların evlənmə səbəbləri soruşulmursa, nikah pozulanda da dövlət və məhkəmə, yaxud nikahı pozan digər orqan pozulma səbəblərini soruşmaya bilər”.

B.Həmidov qadınları tərəfindən şiddət görən kişilərin boşanmaq üçün müraciət edib-etməmələri sualını isə belə cavablandırıb: “Mənim icraatımda ailə daxilində kişiyə şiddət faktları ilə bağlı məsələ olmayıb. Bu cür hal varsa belə, bu, kişi tərəfin boşanma üçün məhkəməyə müraciət etməsinə əsas olmayıb”.

Aytəkin Qardaşova

Tarix: 29 Dekabr 2022, 08:39

Xəbər lenti