Deputat: “Avropa İttifaqı ermənipərəst Fransanın əlində alətə çevrilib”

“Avropa Parlamenti bir neçə gün öncə Azərbaycana qarşı növbəti qərəzli qətnamə qəbul etməklə sübut etdi ki, bu qurum erməni lobbisinin təsir dairəsindədir və ikili standartlardan uzaq dura bilmir. Həmin qətnamənin qəbul edilmə proseduru özü şübhəli bir şəraitdə keçirilib. Təbii ki, qətnamənin qəbul ediliyi zaman iclasa sədrlik edən və səsverməni şübhəli bir formada təşkil edən Avropa Parlamentinin vitse-prezidenti Evelin Reqner həm də Türkiyəyə qarşı qondarma “erməni soyqırımı” ilə bağlı sənədin təşəbbüskarlarından biridir. Bu fakt bir daha onu təsdiqləyir ki, Azərbaycana qarşı belə bir qərəzli və heç bir əsası olmayan qətnamənin qəbul edilməsi erməni lobbisinin sifarişidir”.

Pravda.az-ın xəbərinə görə, bunu deputat Cavid Osmanov bildirib.

Deputat qeyd edib ki, Avropa Parlamenti tərəfindən Azərbaycana qarşı bu cür qərəzli qətnamənin qəbul edilməsi birinci dəfə deyil: “Zaman sübut edib ki, Avropa Parlamentinin riyakarlığı nəticəsində qəbul edilən əsassız qətnamələr heç bir hüquqi əhəmiyyətə malik olmur. Bu kimi hallar əslində Avropa Parlamentinin nüfuzuna daha çox xələl gətirir və özünü mötəbər bir qurum adlandran təşkilatın sifarişlər yerinə yetirdiyini ortaya çıxarır. Azərbaycanın guya Ermənistana hərbi təcavüz etməsi, Laçın yolunun “blokada”da olması kimi sərsəm iddiaların yer aldığı qərəzli qətnamənin qəbul edilməsi dünyanın ən böyük iqtisadi forumu olan Davos Forumun keçirilidiyi eyni günlərdə müzakirəyə çıxarılması və şübhəli bir şəraitdə qəbul edilməsi heç də təsadüf deyil. Belə ki, Azərbaycan Prezidenti İlham cənab Əliyevin Davos İqtisadi Forumunda iştirak edərək keçirdiyi işgüzar görüşlər, dünyanın nüfuzlu şirkətləri ilə enerji və iqtisadiyyat sahəsində əldə edilən razılaşmalar erməni lobbisini, Ermənistana havadarlıq edən Fransa kimi ölkələri çox narahat edir. Odur ki, bu cür əsassız və qərəzli qətnamənin qəbul edilməsi ilə erməni lobbisi Azərbaycanın imicinə xələl gətirə biləcəyini və Avropa İttifaqı ilə iqtisadi münasibətləri pozulmasına nail olacağını düşünür. Erməni lobbisi, xüsusilə də açıq-aşkar özünü Ermənistanın havadarı kimi təqdim edən Fransa Azərbaycanın Avropa İttifaqı ilə münasibətlərinin korlanması üçün digər bir ssenarini də düşünüb. Bu isə Avropa İttifaqının Ermənistana yeni uzunmüddətli missiya göndərilməsi ilə bağlı qərarıdır. Baş verənlər onu göstərir ki, Avropa İttifaqı ermənipərəst Fransanın əlində alətə çevrilib və Fransa Cənubi Qafqaz regionunda mövcudluğunu saxlamaq üçün hər vasitədən istifadə etməyə çalışır. Bir sözlə, yeni missiya Fransanın və Avropada digər ermənipərəst qüvvələrin növbəti oyunudur”.

Tarix: 25 Yanvar 2023, 12:25

Xəbər lenti