Tahir Rzayev: “Hansı ölkə ilə münaqişə yaransa, deputatlarımız hər an döyüşə getməyə hazırdırlar”

“44 günlük Vətən müharibəsi ərəfəsində Azərbaycan parlamentinin üzvləri daim döyüşçülərin yanında oldular, öz səslərini ucaltdılar, hətta açıq çıxış etdilər ki, lazımdırsa, biz də döyüşlərə gedək, iştirak edək. “İranla müharibə olsa, deputatlar döyüşə getməzlər” kimi sözləri deməklə insanları ruhdan salmaq, insanların mübarizə əzmini aşağı salmaq istəyirlər. Bəs necə oldu ki, 44 günlük müharibədə bütün siyasi dairələrdə, parlamentdə, məhkəmə, icra orqanlarında hər kəs bir yumruq kimi birləşdi və qələbə təmin olundu? Müharibə olmasın, amma yenə də hər hansı ölkə ilə aramızda münaqişə yaranarsa, Azərbaycan deputatları hər an döyüşə getməyə, əllərindən gələni etməyə hazırdırlar”.

Bu sözləri Pravda.az-a açıqlamasında Milli Məclisin deputatı Tahir Rzayev deyib.

Deputat bildirib ki, İranla Azərbaycan arasında müharibəyə yol verilməsi İranın faciəsi deməkdir: “İran bu gün dünyadan təcrid olunmuş bir dövlətdir, çünki dünyanın aparıcı dövlətlərinin heç biri ilə sağlam əməkdaşlıq etmir. Bunun nəticəsidir ki, İrana qarşı çox ciddi sanksiyalar tətbiq olunur, çox sayda qətnamə qəbul edilib. İranın təcavüzkar ölkələrə silah barədə köməklik etməsinə dair əldə əsaslı məlumatlar var. Digər tərəfdən rəsmi Tehran daimi şəkildə Ermənistana – bizim düşmənimizə yardım edir. Amma İran-Azərbaycan münasibətlərinin düzəlməsinin tərəfdarıyam. Məncə, hər bir vətəndaş bunun tərəfdarıdır. Çünki İranla qonşuyuq, orada 40 milyondan artıq soydaşımız yaşayır və müharibə olması, əlbəttə, onların vəziyyətini də çətinləşdirəcək. Müharibə ölkələrin məhv olması, iqtisadiyyatının çökməsi deməkdir. Düşünürəm, İranla müharibə olan deyil. Heç biz də müharibə ərəfəsində deyilik. Hər ölkə arasında münasibətlərin pozulması halları baş verir, amma danışıqlar yolu ilə sonradan münasibətlər qaydasına düşür. İran və Azərbaycan xarici işlər nazirlərinin son danışığı deməyə əsas verir ki, münasibətlərə düzəliş ediləsidir. İran bu gün Azərbaycana qarşı yanlış mövqedədir, dost mövqedə deyil. Halbuki Azərbaycan həmişə yaxşı münasibət göstərib, bir çox xarici ölkələrə öz ərazisində platforma verməyib ki, İrana təzyiq etsinlər. İran haqqında rəsmi Bakı heç vaxt kəskin çıxışlar etməyib. Amma İranın son illər – müharibə və müharibədən əvvəlki dövrlər Ermənistana dəstək verməsi, ermənilərin tərəfində durması Azərbaycana qarşı təcavüzkar, terror xarakterli aktlar həyata keçirməsi siyasətində yanlış mövqe tutduğunu göstərir. İran deputatları da digər tərəfdən Azərbaycana qarşı bəyanatlarla çıxış edirlər. Azərbaycan deputatları da, sözsüz ki, öz mövqelərini bildirməlidirlər”.

Aytəkin Qardaşova

Tarix: 10 Aprel 2023, 16:14

Xəbər lenti