Əli Mirəliyev İvana Knolldan danışdı: "Millətimin qızları ondan da qəşəngdirlər..."

“Miss Xorvatiya 2016” titulunun qalibi, açıq geyimləri, estetik əməliyyatları ilə məşhur olan İvana Knollun “Formula 1” Azərbaycan Qran Prisini izləmək üçün Bakıya gəlməsi böyük səs-küy doğurub. İvana 2022-ci ildə keçirilən Dünya Kuboku matçını izləmək üçün açıq-saçıq geyimdə Qətərə də yollanmışdı. Lakin Qətərdə insanlar İvananın ölkəyə gəlişinə qadağa qoyulmasını, onun həbs olunmasını tələb etmişdilər. Qətərdən fərqli olaraq, modelin Azərbaycanda böyük maraqla qarşılanması isə müzakirə yaradıb. İvananın nümayişkəranə fotoları Bakıda fəaliyyət göstərən Emilia Dinqo adlı modelə bir müddət əvvəl paytaxtın mərkəzində açıq-saçıq geyimdə fotosessiya etdiyi üçün polis tərəfindən xəbərdarlıq edilməsi məsələsini yada salıb. Bildirilir ki, Emilianı tənqid edənlər, milli mentalitetdən danışanlar İvana ilə şəkillərini sosial şəbəkədə “bəh-bəh”lə paylaşırlar. “Öz blogerimizə qiymət verilmir, xarici blogerlər üstün tutulur” deyənlər də olub. Eyni zamanda qadın bədəninin reklam alətinə çevrilməsi də ciddi iradla qarşılanıb.

Məsələ ilə bağlı Pravda.az-a fikirlərini bölüşən müğənni Əli Mirəliyev də İvana Knollun gəlişindən narazı qaldığını bildirib.

“Əvvəla, biz azərbaycanlıyıq. İvana Knoll hansı ölkədən gəlir, gəlsin. Öz ölkələrində açıq-saçıq geyinərlər, özləri bilərlər. Bizim milli mentalitetimiz var. Düzdür, müasirik, amma o qədər də yox da... Lüt klip çəkdirən şou-biznes nümayəndələrimizdən də danışmaq lazımdır... Açıq-saçıq formada uzanırlar, dəniz paltarında klip çəkdirirlər. Niyə onda bizim insanlar bildirmirlər? Çox vaxt mənə zəng edib deyirlər ki, Əli müəllim, biz Azərbaycan televiziyasına belə-belə şeylərə görə baxmırıq, evimdə uşaqlarım böyüyür, necə baxım? Hər şeyin həddi var. İnsan gərək həddini aşmasın. Cavan da açıq-saçıq geyinənə baxır, düşünür ki, yəqin, yaxşıdır, sonra gedib o formada şəkil də çəkdirir. Güzgüdə baxanda düşünür ki, qəşəng görünür. Başa düşmür ki, üstündən xətt çəkəcəklər, nə sənin ailən olacaq, nə ərə gedəcəksən, nə də uşağın olacaq. Bədbəxt olacaqsan, valideynlərini də bədbəxt edəcəksən. Bu yolla getmək istəyirlər? Dədə-babadan necə görmüşük? Ailədə həmişə uşaqların qeydinə qalmışıq, oxutmuşuq, abır-həyalı, elimizin adəti ilə tərbiyə etmişik. Bizim adətlərimizdə açıq-saçıq geyimdə şəkil çəkdirmək var? Özü də xaricdən gələnlə... Kim istəyir gəlsin, mənim millətimin qızları onlardan da qəşəngdirlər. İndi nə etsinlər, özlərini bayırda qoysunlar?”, - müğənni bildirib.

Aytəkin Qardaşova

Tarix: 2 May 2023, 08:35

Xəbər lenti