Siyavuş Novruzov: “Kifayət qədər qadın əfvə düşüb, cənab Prezidentə təşəkkür edirik”

“Uzun müddətdir, gərgin iş gedirdi. Müraciət edənlərin hamısı, demək olar, müzakirə edilib, baxılıb. Qanunvericilik imkan veribsə, cəzaçəkənlərin davranış qaydaları, cəzaçəkmə müəssisəsində keçirdikləri müddət ərzində onların islah olmaları imkan yaradıbsa, həmin adamlar əfv olunub. Qanun baxmır ki, kim hansı partiyanın üzvüdür, hansı peşənin sahibidir, kim kimdir. Keçmişdə işləyən dövlət adamı da, partiya sədri də, başqa-başqa peşə sahibləri də əfvə düşə bilərlər. Müraciətin xarakterinə uyğun Əfv Komissiyası müzakirə aparıb, siyahı ortaya çıxarılıb, təqdim edilib. Təbii ki, hamını əfv etmək mümkün deyil. Allah hamının qapısını açsın. Ən əsası budur ki, əfvə düşənlərin siyahısında Orduda keçmişdə qulluq edən, Vətən qarşısında xidmətləri olan, sonradan hansısa cinayət törtəmiş şəxslər, ayrı-ayrı ehtiyatsızlıq üzündən həbs edilənlər də var. Xüsusilə normaya görə kifayət qədər qadın əfvə düşüb. Milli Məclisdə də məsələ qaldırmışdıq ki, kaş elə olardı, bütün qadınlar azadlığa çıxardı. Azərbaycan həbsxanalarında bir nəfər də olsun, qadın qalmasın. Çünki onları evdə övladları gözləyir, bəziləri həbsxanada övladları ilə birgə qalır. Sərəncamda bütün bu məsələlər hərtərəfli nəzərə alınıb. Cənab Prezidentə xüsusi təşəkkürümüzü bildiririk. Allah ulu öndərimizə qəni-qəni rəhmət eləsin, ruhu şad olsun. Nə qədər ki müstəqil Azərbaycan yaşayır, ulu öndərin siyasəti də, ulu öndər də yaşayacaq”.

Bu sözləri Pravda.az-a müsahibəsində Milli Məclisin Regional məsələlər komitəsinin sədri Siyavuş Novruzov deyib.

S.Novruzov bildirib ki, doğrudan da, bu, müstəqillik tarixində ən böyük əfv Sərəncamıdır: “Ümumiyyətlə, Heydər Əliyev siyasi xəttində, yolunda, ulu öndərin hakimiyyətə gəldiyi dövr ərzində humanizm siyasəti ən öndə olan məsələdir. Tarixə nəzər salsaq, görərik ki, Azərbaycanda ilk dəfə bir çox ölkələrdən fərqli olaraq ölüm hökmünə Heydər Əliyev tərəfindən moratorium qoyulub, sonradan hökm ümumiyyətlə ləğv olunub. 1993-cü ildən bu yana bir dəfə də ölüm hökmü ilə bağlı icra həyata keçirilmədi. Bilirsiniz ki, parlament 11-dən artıq aministiya aktı qəbul edib. Ən böyük aministiya aktı Mehriban xanım Əliyeva parlamentin üzvü olduğu vaxt qanunvericilik təşəbbüsü ilə irəli sürülüb və layihə 11 mindən artıq insana şamil olunmuşdu. 60-dan yuxarı əfv Sərəncamı imzalanıb, ən böyüyü isə məhz cənab Prezidentin indi imzaladığı Sərəncamdır. Bu, Azərbaycan Prezidenti, Heydər Əliyev siyasi xətti tərəfindən bu sahəyə olan diqqətin növbəti göstəricisidir. Onsuz da bütün bayramlarda – Respublika Günü, Dünya Azərbaycanlılarının Həmrəyliyi Günü, Novruz bayramı ilə əlaqədar əfv sərəncamları olur. İl ərzində dörd-beş dəfə əfv Sərəncamı imzalanır. Düzdür, indiyə qədər say az olurdu, 130-150 nəfər əfvə düşürdü. Amma bütün bunlarla yanaşı, yəqin ki, “Heydər Əliyev İli” çərçivəsində Əfv Komossiyası müraciətlərə yenə baxacaq, əfv sərəncamları olacaq”.

Aytəkin Qardaşova

Tarix: 8 May 2023, 15:06

Xəbər lenti