"Səviyyəli, savadlı, alicənab insan, sizcə, sosial şəbəkələrdə söyüş söyməlidir?" - Natiq Rəsulzadə

“Bir neçə gündür ki, sosial şəbəkələrdə bir çoxlarının səviyyəsiz danışıqlarına, ədəbsiz sözlərinə, düşünülməmiş çıxışlarına qarşı münəsibət bildirdiyimə görə ünvanıma dırnaqarası vətənpərvərlər tərəfindən sərt sözlər yazıldığını oxudum. Əsl vətənini, xalqını sevən ziyalı həmişə o xalqın içində olan kütlənin nöqsanlarını göstərməyə çalışır və bununla həmin nöqsanları, neqativ halları aradan götürməyə cəhd göstərir. Mirzə Ələkbər Sabir, Mirzə Cəlil, Rusiyada Qoqol və s. kimi böyük yazıçılar həmişə çalışıblar ki, xalqın arasında olan mənfi cəhətləri tənqid etməklə onları aradan götürsünlər. Çox çətin bir işdir. Çünki onlara maneə olan bir çox “ağzıgöyçəklər”i, “vətənpərvərlər”i gözəl ürəklərə yatan sözlərinə görə böyük həvəslə dəstəkləyirlər. Bu yaxında “Facebook”da oxudum. Birisi yazır: “Ailə başçısının namusu, qeyrəti necə qəbul edir ki, ailəsini çimərliyə aparır? Axı orada onun arvadına özgə kişilər baxarlar”. Digəri isə (“zü tutan”) belə cavab verib: “Əvvəllər bizim məhəllədən heç bir özgə kişi keçə bilməzdi!” Bu nədir belə? Nə cahillikdir bu? Bəlkə, 100 il əvvəllə qayıdırıq? Sosial şəbəkələr, “Facebook” belə səviyyəsiz yazılarla doludur...”

Pravda.az xəbər verir ki, bu sözləri Xalq yazıçısı, Əməkdar incəsənət xadimi Natiq Rəsulzadə deyib.

N.Rəsulzadə 2022-ci ildə mətbuata verdiyi müsahibəsində səsləndirdiyi “sosial şəbəkələr kütlədən ibarətdir, oradan 95% səviyyəsiz, axmaq adam çıxır” fikirlərinin gündəmə yenidən gətirilməsinə də toxunub:

“Nəzərdə tutduğum müsahibəmdə elə “vətənpərvərlər”in - ”patriotlar”ın arasında M.Ə.Sabir yaşasaydı, onu, yəqin ki, “niyə xalqı aşağalıyırsan?” deyə qınayardılar. Sarı mətbuat sözügedən müsahibəmi hər bayram təkrar gündəmə çıxarır, çünki kütləni qıcıqlandırmaq lazımdır ki, saytların reytinqi artsın. Cahil insanlar da oxuyub, cahilliklərini göstərirlər. Səviyyəli, savadlı, alicənab insan, sizcə, sosial şəbəkələrdə söyüş söyməlidir? Sizcə, sosial şəbəkələr bunun üçün yaranıb? Cahillik həmişə xalqı geri çəkib. Nəsimi, Nizami, Füzuli, Üzəyir bəy, Qara Qarayev, Tahir Salahov, Rəşid Behbudov, Müslüm Maqomayev və yüzlərlə belə dahi sənətkarları olan xalqı heç kəs aşağılaya bilməz, amma kütlədə olan cahil adamlara tərbiyə vermək hər ziyalının borcudur. Fəxr edirəm ki, məni - cəmiyətdə hər zaman cahilliyə qarşı çıxan yazıçını böyük Heydər Əliyev 25 il əvvəl “Əməkdar incəsənət xadimi” fəxri adına layiq görüb, hörmətli Prezidentimiz İlham Əliyev mənə “Xalq yazıçısı” fəxri adı verib”.

Aytəkin Qardaşova

Tarix: 3 İyul 2023, 17:27

Xəbər lenti