“Prezident İlham Əliyev Qoşulmama Hərəkatına üzv olan dövlətlərin qarşılaşdığı problemləri cəsarətlə dilə gətirir” - RƏY

“Cənab Prezident İlham Əliyev Qoşulmama Hərəkatının təşkilatlanmasına, struktur və institusional nöqteyi-nəzərdən inkişaf etməsinə mühüm töhfələr verib. Hərəkatın gənclər şəbəkəsi formalaşdırılıb, parlament məclisi təsis edilib. Bütün bunlar, əlbəttə ki, Azərbaycanın sədrliyi dönəminə təsadüf edir. Digər tərəfdən müşahidə edirik ki, cənab Prezidentin iyulun 5-də Bakı Konqres Mərkəzində Qoşulmama Hərəkatının Əlaqələndirmə Bürosunun “Qoşulmama Hərəkatı: meydana çıxan çağırışlarla mübarizədə birgə və qətiyyətli” mövzusunda nazirlərin görüşü zamanı çıxışında Fransanın müstəmləkəçilik siyasətinin tənqid olunması, hazırda neokolonial təfəkkürlə ayrı-ayrı regionlara yanaşması haqqında fikirləri müsbət reaksiyalarla qarşılanıb. Bütün bunlar deməyə əsas verir ki, cənab Prezident qlobal siyasi gündəliyi düzgün müəyyənləşdirir və Hərəkata üzv olan dövlətlərin qarşılaşdığı problemləri cəsarətlə dilə gətirir”.

Bu sözləri Pravda.az-a açıqlamasında Sosial Tədqiqatlar Mərkəzinin sektor müdiri, politoloq İlyas Hüseynov deyib.

İlyas Hüseynov: Milli həmrəylik və birlik Azərbaycanı bütün dünyanı bürüyən koronavirus sınağından da uğurla çıxmasının başlıca şərtidir

Politoloq bildirib ki, Fransa bu gün daxildə də irqi, dini, etnik, milli dözümsüzlük və ayrıseçkilik qoymaqla ölkəni xaos, hərcmərclik, anarxiya vəziyyətinə gətirən lider Emmanuel Makronun səriştəsiz idarəçiliyi ilə müşayiət olunur: “Makron nəinki soyqırımı cinayətlərinə, insanlıq və bəşəriyyət əleyhinə olan cinayətlərə görə də üzr istəmir. Əksinə, bütün bunlara bəraət qazandırmağa çalışır. Əlbəttə ki, Fransanın müstəmləkəçilik siyasətindən əziyyət çəkən dövlətlərin sayı çoxdur. Təbii resursların, sərvətlərin vandalcasına talanması müqabilində ölkələrə, demək olar ki, heç nə vermir. Əksinə, çağdaş dövrümüzdə, müasir beynəlxalq münasibətlər sistemində hələ də kolonial zehniyyətlə idarəçilik metodlarından istifadə edir. Bu, tamamilə qəbulolunmazdır. Eyni zamanda bölücülüyə, ayrıseçkiliyə gətirib çıxarır. Fransanın daxilində bu gün baş verən proseslər həm də xarici siyasətlə birbaşa əlaqəlidir. Xarici və daxili siyasətdə buraxılan səhvlər, nöqsanlar bu gün ölkəni elə bir vəziyyətə salıb ki, ölkədə demokratiyadan əsər-əlamət yoxdur. Vətəndaşların şəxsi və mülkiyyət hüquqları da qorunmur. Polisin burada çox amansız və radikal hərəkətləri də geniş xalq kütlələri tərəfindən sosial partlayışa səbəb olur. Düşünürəm, hazırkı durumda Fransa lideri bütün baş verənlərə görə məsuliyyət daşımalıdır”.

Aytəkin Qardaşova

Tarix: 6 İyul 2023, 12:45

Xəbər lenti