“Sanki məhkəmə və icraçılar yalnız kredit və bank şirkətlərinin alt qurumudur”- AÇIQLAMA

Bəzi bankların, o cümlədən “Kontakthome” “İrshad Electronics” və digər bu kimi mağazalar şəbəkələrinin kredit borcu səbəbindən vətəndaşları kütləvi şəkildə məhkəməyə verməsi məsələsi narazılıq yaradıb. Müzakirələr zamanı bildirilir ki, bank və ya sözügedən şirkətlər vətəndaşa kredit və kreditlə mal verərkən onun maddi vəziyyəti ilə bağlı heç bir sorğu etmirlər. Sonradan vətəndaş kredit borcunu ödəyə bilmirsə, qəpik-quruş pensiyanı və ya qəpik-quruş maaşı məhkəmə yolu ilə əlindən alırlar. Halbuki reklam xatirinə hazırladıqları elanlarda təkcə şəxsiyyət vəsiqəsi ilə kredit götürməyin mümkünlüyünü özləri deyirlər. Belə hallara etiraz edənlər məhsulu satmaq üçün bu cür yola əl atmağın qəbuledilməz olduğunu bildirirlər.

Ağ Partiyanın sədri Tural Abbaslı da Pravda.az-a müsahibəsində deyib ki, bu məsələ uzun müddətdir, var.

“İnsanları şirnikləndirib, cəlbedici, aldadıcı reklamlarla müxtəlif məişət mallarını kreditlə satırlar. İnsanlar sonradan krediti ödəyə bilməyəndə dövlətin inzibati resurslarından istifadə edirlər. Təhlükəli məqam budur ki, bir çox hallarda dövlətin resursları belə bankların və kredit şirkətlərinin mənafeyini qorumaq üçün sui-istifadə edir. Məsələn, adi hallarda hansısa məhkəmə vətəndaş haqqında qərar çıxaranda icrası aylarla, hətta illərlə çəkir. Məhkəmə icraçıları işi icra etmir. Maraqlısı budur ki, banka bir manat borclu qalsan, yaxud kredit şirkətinə bir qəpik borclu olsan, o dəqiqə məhkəmə icraçıları gəlirlər, təhdid, təqib edirlər, qanundan danışırlar. Sanki məhkəmə icra strukturları ancaq kredit və bank şirkətlərinin alt qurumu kimi fəaliyyət göstərirlər. Vaxtilə belə bir məlumat var idi ki, bəzən həmin kredit şirkətlərinin, dükanların, bankların işçiləri özlərini məhkəmə icraçısı kimi tanıdırlar. Onlara deyirlər ki, bizim adımızdan zənglər edin, tələb edin”, - o bildirib.

T.Abbaslının fikrincə, bu sahədə nizam-intizam olmalıdır: “Təbii ki, bank da, kredit şirkəti də, mağazalarda da məhsul verəndə risk payını nəzərə almalıdırlar. Necə ki bir məhsulun adi halda bazarda qiyməti 5 manatdırsa, kreditlə 10 manata verirsinizsə, deməli, riskə görə o malı iki dəfə baha verirsiniz. O zaman riski də nəzərə almaq lazımdır. Düşünürəm, belə banklar, kredit şirkətləri, mağazalar məsələsində dövlət, dövlət strukturları, məhkəmələr, vətəndaşın yanında olmalıdır, nəinki qarşı tərəfin. Çünki burada vətəndaş zəif tərəfdir. Güman edirəm, gələcəkdə tənzimləyici qanunlar qəbul olunar və insanların son qəpiyi də, pensiyaçının son manatı da boğazından tutulmaz”.

Aytəkin Qardaşova

Tarix: 18 İyul 2023, 14:05

Xəbər lenti