Deputat ölkədə turizmdən şikayət edənlərə: “Müxtəlif bölgələrdə turizmin inkişafı ilə bağlı layihələr həyata keçirilib”

Azərbaycanda turizm sektorunda hökm sürən xaos ictimaiyyəti narahat edir. Saxta "turizm şirkət"lərinin vətəndaşlara qarşı mütəmadi şəkildə dələduzluq etməsi, külli miqdarda ziyan vurması bir kənara, digər tərəfdən paytaxtda və bölgələrdəki istirahət mərkəzlərində son dərəcə baha və aşağı keyfiyyətli xidmət də yerli turistlərin narazılığına səbəb olur. Turizm sahəsində mövcud problemlərdən biri də qeyri-qanuni, lisenziyalaşdırılmamış nəqliyyat vasitələri ilə təşkil olunan turlardır ki, çoxsaylı yol-nəqliyyat hadisələrini, insan itkilərini qaçılmaz edir. Aparılan müzakirələr fonunda Dövlət Turizm Agentliyi ciddi tənqid olunur.

Bununla bağlı Pravda.az-a fikirlərini bölüşən Milli Məclisin deputatı Müşfiq Cəfərov deyib ki, ölkənin mövcud turizm potensialından və bu sektorda sahibkarların imkanlarından hələ yetərincə istifadə edilməyib.

“Xarici turistlərin ölkəyə cəlb edilməsi ölkəmiz üçün vacibdir. Düşünürəm ki, ilk növbədə mövcud qiymət və tariflər turistlər üçün optimal həddə endirilməlidir, yeni çarter və aşağı büdcəli aviareyslər açılmalı, əlavə investisiyalar yatırılmalıdır. Deyərdim ki, bu sahədə əsas problemlər Azərbaycanda istirahətin xarici ölkələrlə müqayisədə baha başa gəlməsi, xidmət səviyyəsinin yüksək olmaması və ən əsası turist cəlb etmək üçün lazımi işlərin görülməməsidir”, - deputat bildirib.

M.Cəfərovun sözlərinə görə Azərbaycanda əvvəlki illərlə müqayisədə son 5 ildə turist xidməti, infrastruktur sahəsində, həm də regionlardakı turizm xidmətinə uyğun əlavə sahələrin inkişafında, sahibkarların turizm fəaliyyətinə marağının artmasında çox böyük irəliləyişlər var: “Bununla yanaşı artıq Azərbaycanın turizm sənayesinə də xaricilərin investisiya qoymaq arzusu çoxdur. Həm dövlət, həm də Mədəniyyət Nazirliyi və Dövlət Turizm Agentliyi tərəfindən aparılan siyasət nəticəsində istər yerli sahibkarlar arasında, istərsə də xaricdən investorların turizm biznesinə marağı artıb. Regionların sosial-iqtisadi inkişafı proqramı çərçivəsində Azərbaycanın müxtəlif bölgələrində turizmin inkişafı ilə bağlı layihələr həyata keçirilib. Ölkəmizə istirahətə gələnlərin sayının azlığını çox vaxt xidmətlərin səviyyəsinin aşağı olması ilə izah etsələr də, bu, daha çox rəqabətin zəif olması ilə əlaqədardır. Ümumiyyətlə, sivil ölkələrin hamısında turist şirkətləri, otellər, sahibkarlar bir-biriləri ilə xidmətin səviyyəsinin yüksəldilməsi sahəsində rəqabət aparırlar. Artıq turizm sahəsinin optimallaşdırılması və inkişafı üçün qanun da qəbul olunub. Tezliklə Turizm Agentliyi də bu sahədəki qanunvericiliyin əməl olunmasına tam şərait yaradacaq və bununla da bu sahədə olan nöqsanların aradan qalxmasına zərurət yaranacaq”.

Aytəkin Qardaşova

Tarix: 18 Avqust 2023, 15:29

Xəbər lenti