Psixoloq: “Onda qadın da hirslənəndə gedib içkiyə qurşansın, qumar oynasın, xəyanət etsin...”

“Bəzən insan bir səhv edəndə mütləq öz səhvində başqasını günahlandırır. Çünki vicdanını bu cür rahatlatmış olur. Düşdüyü bataqlığa səbəbkar tapır ki, məhz o, bu addımı atmağa məni məcbur etdi. Əgər qadın pisdirsə, deyingəndirsə, zəhlətökəndirsə, yersiz narazılıqlar edəndirsə, onda bu qadından niyə ayrılmırsınız? Axı pisdir... Özünə hörmət edən kişi pislədiyi qadınla bərabər olmaz. Bir kişi özünü ailə başçısı kimi təqdim edib, illərlə ailəsi ilə bir yerdə olursa, bu, o deməkdir ki, mən bu ailədən razıyam, illər keçsə belə uşaqlarımla birlikdə yaşayıram. Hər kəs razı olduğu yerdə qalır, narazı olduğu yerdən ayrılır. Kimsə narazı olduğu yerdə qalırsa, bilin ki, o, özünə və şəxsiyyətinə hörmətlə yanaşmır”.

Bu sözləri Pravda.az-a müsahibəsində tanınmış psixoloq Gülnar Orucova deyib.

Psixoloq düşünür ki, kişi şəxsiyyətinə, mənliyinə, qüruruna hörmət etsə, heç vaxt pislədiyi qadınla bərabər yaşamaz, ondan ayrılar: “Qadın deyinir, narazıdır? Sual verirəm: bəs siz niyə qadını razı salmağa çalışmırsınız? Siz niyə elə olmursunuz ki, qadın deyinməsin, narazı qalmasın? Axı qadın ruhi psixoloji pozuntulu, xəstə deyil ki, bütün gün deyinə. Qadın hər hansı səbəb tapır və həmin səbəb üzərindən çıxış edir. Niyə o problemə, səbəbə bir çıxış yolu tapmırsınız, araşdırıb həll etmirsiniz və qadının da deyingənliyi günbəgün artır. Mənə görə, istənilən kişinin təkcə öz həyat yoldaşına deyil, hansısa qadına yanaşma tərzi onun ailəsindən gəlir. Öz anasına hörmət etməyən kişi heç vaxt sizə də hörmətlə yanaşmayacaq. Qadına hörməti evdə ana formalaşdırır. Qadın emosionaldır, hislərini qabarıq şəkildə büruzə verən bir varlıqdır. Kişi isə emosional deyil. Qadının etiraz etməsi normal haldır. İnsan razılaşmadığı bir şeyə etiraz etməlidir. Bu etirazı kişi həll etməyə çalışmalıdır. Problemi həll etmək əvəzinə gedib içkiyə qurşanırsa, bu, bilirsiniz nə deməkdir? Kişinin acizliyi, özünə güvənsizliyi, çarəsizliyidir. Bu, çıxış yolu deyil ki, kişi içkiyə qurşanır, xəyanət edir. Doğru addım deyil. Onda qadın da hirslənəndə gedib içkiyə qurşansın, qumar oynasın, xəyanət etsin və ayağa qalxıb qadının haqlarını müdafiə edək? Belə olsa, cəmiyyət nə hala düşəcək? Bəzən kişilərə haqq verirlər ki, xəyanət etmək kişiyə yox, qadına ayıbdır. Xeyr! Namus yalnız qadın üçündür? Kişi namusuz da olsa, olar? “Kişini pis vərdişlərə qadın aparır” fikri doğru fikir deyil. Onda niyə kişilər uğur qazananda qadına təşəkkür etmirlər? Axı kişinin hər uğurunun arxasında məhz bir xanım dayanır”.

Aytəkin Qardaşova

Tarix: 23 Avqust 2023, 14:49

Xəbər lenti