Məhkəmə elçiliyə görə qətl törədən şəxsin işini prokurorluğa qaytardı

Lənkəran Ağır Cinayətlər Məhkəməsinə qətl törətməkdə təqsirləndirilən Rüfət Əlizadənin cinayət işi üzrə məhkəmə istintaqı başlayıb.

Pravda.az-ın əldə etdiyi məlumata görə, hakim Əli Əliyevin sədrliyi ilə keçirilən prosesdə cinayət işi öyrənilərkən və məhkəmənin hazırlıq iclasında ilkin dinləmələr zamanı müəyyən edilib ki, Rüfət Əlizadənin Cinayət Məcəlləsinin (CM) 120.1-ci (qəsdən adam öldürmə) maddəsi ilə təqsirləndirilməsinə dair cinayət işi üzrə CPM-nin 303.3.1 və 303.3.6-cı maddələrinin tələbləri pozulub. Yol verilmiş prosessual pozuntularla bağlı dövlət ittihamçısı vəsatət qaldıraraq, Rüfət Əlizadənin CM-nin 120.1-ci maddəsi ilə təqsirləndirilməsinə dair cinayət işinin baxılmasına xitam verilməsi və onun ibtidai araşdırmaya prosessual rəhbərliyi həyata keçirən prokurora qaytarılması barədə qərar qəbul edilməsini xahiş edib. Məhkəmə qaldırılan vəsatəti müzakirə edib, cinayət prosesi tərəflərini dinləyib belə nəticəyə gəlib ki, vəsatət əsaslı olduğundan təmin edilməli, cinayət işinə baxılmasına xitam verilməli və məhkəməyədək icraat mərhələsində yol verilmiş prosessual pozuntuların aradan qaldırılması məqsədi ilə cinayət işi ibtidai araşdırmaya prosessual rəhbərliyi həyata keçirən prokurora qaytarılmalıdır. Məhkəmənin qərarına əsasən, dövlət ittihamçısı tərəfindən verilmiş vəsatət təmin edilib. Təqsirləndirilən şəxsin CM-nin 120.1-ci maddəsi ilə təqsirləndirilməsinə dair cinayət işinin baxılmasına xitam verilib və həmin iş ibtidai araşdırmaya prosessual rəhbərliyi həyata keçirən Biləsuvar rayon prokuroruna qaytarılıb. Rüfət Əlizadənin barəsində seçilmiş həbs qətimkan tədbiri 1 ay müddətə, yəni 24 sentyabr 2023-cü il tarixədək uzadılıb.

Qeyd: Hadisə bu il aprelin 23-də Biləsuvar rayonu Aşağı Cürəli kəndində qeydə alınıb. Belə ki, 1986-cı il təvəllüdlü Vüsal İlham oğlu İlhamlı elçilik zamanı yaranan mübahisə zəminində öldürülüb. Məlumata görə, hadisədən bir neçə gün əvvəl həmin kənddən olan 1993-cü il təvəllüdlü Rüfət Əlizadə valideynlərini Cəlilabad rayonuna - sevdiyi qızın ailəsinə elçi göndərib. Lakin elçilik zamanı tərəflər arasında razılıq əldə edilməyib. Bundan sonra Rüfət xəbər göndərərək qızı qaçıracağını bildirib. Qızın ailəsi bundan narahat olub və qohumlar Cəlilabaddan Biləsuvarın kəndinə yola düşərək məsələni müzakirə etmək istəyiblər. Biləsuvara gedən qohumlar arasında qızın yaxın qohumu olan Vüsal İlhamlı da olub. Münaqişə zəminində Rüfət Əlizadə qızın qohumu Vüsal İlhamlıya ürək nahiyəsindən bıçaqla bir zərbə endirib. Ağır xəsarət alan 37 yaşlı şəxs hadisə yerində vəfat edib.

Kamal Məmmədov

Tarix: 30 Avqust 2023, 09:32

Xəbər lenti