“Təxribatların ardı-arası kəsilməyəcək, hələ müharibə təhlükəsi yaranana qədər getdikcə şiddətlənəcək” - AÇIQLAMA

“Dəfələrlə demişəm, nə qədər ki Azərbaycan dövlətinin ərazisində ermənilər yaşayır, separatçı qurum fəaliyyət göstərir, işğalçı erməni dövlətinin işğalçı qoşun hissələri ərazimizdə mövcuddur, bu təxribatların ardı-arası kəsilməyəcək, hələ müharibə təhlükəsi yaranana qədər getdikcə şiddətlənəcək. Buna görə də qarşımızda duran vacib problem sepratizmin kökünü kəsmək üçün tədbirlər görmək, Ermənistan dövlətinə aid silahlı işğalçı birləşmələri ərazimizdən təmizləməkdir. Ya tərki-silah olub ərazimizi tərk etməlidirlər, ya da hərbi gücümüzü tətbiq edib ərazilərimizi bu terrorçulardan təmizləməliyik. Başqa çıxış yolu yoxdur. Kimsə düşünürsə ki, ermənilər danışıqlarla, cürbəcür fitnə-fəsadla, vaxt qazanmaq üçün atdıqları addımlarla nəsə razılığa gələcəklər, sülh sazişi imzalanacaq, bu məsələlər qurtacaq... Mən belə düşünmürəm. Bildiyim budur ki, biz hərbi gücümüzü tətbiq edib ərazimizi işğalçılardan təmizləməliyik. Xoşluqla, danışıqlarla bu, baş tutmayacaq. Çünki bu məsələ təkcə ermənilərdən deyil, ermənilərin havadarlarından, onlara şirin vəd verənlərdən çox asılıdır. ABŞ kimi şeytan yuvası, Fransa kimi müstəmləkəçi, işğalçı dövlət, Rusiya da onlara qarışıq, İran da onlarla birgə... Bunlar erməniləri yenə şirin vədlərlə aldadırlar ki, siz möhkəm durun, qorxmayın, Azərbaycan sizə heç nə edə bilməz, arxanızda dayanmışıq, cinayətkar hərəkətlərinizi davam etdirin. Necə ki 44 günlük müharibəyə qədər həmin şirin vədlər bunlara verilirdi, “Dəmir Yumruq” başlarını əzdi, dərslərini verdi, eləcə də yenidən bu məsələlər təkrarlanmalı, ərazilərimiz separatçılardan təmizlənməlidir. Bizə başqa yol qoymurlar”.

Bu sözləri Pravda.az-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Elman Məmmədov deyib.

Deputatın vurğulayıb ki, Azərbaycan yenidən müharibə olmasını istəmir: “Cənab Prezidentimiz həmişə beynəlxalq səviyyəli, eləcə də ölkə daxiliində keçirilən bütün tədbirlərdə bəyan edir ki, müharibə, güc tətbiq etmək istəmirik, ancaq düşmən tərəfi və onun havadarları bizi buna məcbur edirlər. Heç bir dövlət qəbul etməz ki, onun ərazisində separatçı qurum fəaliyyət göstərsin. İşğalçı dövlətin hərbi qoşun hissələri bu gün də ərazimizdədir. Bu, dözülməz haldır. Əgər könüllü şəkildə razılığa, sülhə, danışığa gəlib ərazimizi tərk etsələr, təbii ki, müharibə də olmaz, qan da tökülməz. Ancaq düşmən tərəfi bunu etmək fikrində deyil. Buna görə də Azərbaycan mütləq hərbi gücündən istifadə edib ərazilərini terrorçulardan təmizləməli olacaq”.

Aytəkin Qardaşova

Tarix: 19 Sentyabr 2023, 10:28

Xəbər lenti