Deputat “rəsmi İrəvan” ifadəsinə etiraz edənlərə: “Elçibəy hökumətinin bayrağımızı Çin səddinə sancacağı barədə məsuliyyətsiz bəyanatlarını təkrarlamaq olmaz”

“Ötən ilin oktyabrında Praqada və bu ilin may ayında isə Brüsseldə Ermənistan və Azərbaycan bir-birinin ərazi bütövlüyünü tanıyıb, bu hətta rəsmən rəqəmlərdə ifadə olunub. Azərbaycan Respublikası həmişə olduğu kimi beynəlxalq hüququn prinsiplərinə sadiqdir və möhtərəm Prezident də dəfələrlə bəyan edib ki, bizim heç bir dövlətə qarşı ərazi iddiamız yoxdur. O cümlədən Ermənistana qarşı ərazi iddiasında deyilik, lakin açıq formada da ifadə edirik ki, beynəlxalq hüququ rəhbər tutaraq Qərbi Azərbaycana, o cümlədən İrəvana olan tarixi haqlarımızdan, ələlxüsus 300 mindən artıq Qərbi azərbaycanlının evinə qayıtmaq hüququndan imtina etmək niyyətində deyilik. Ermənilər özləri də bunu yaxşı başa düşür və reallığı saxtalaşdırmaq üçün xüsusən son 60 ildə İrəvanda və digər bölgələrdə Azərbaycan irsi sürətlə məhv edilməkdədir. Təsəvvür edin, Azərbaycan irsini sıradan çıxarmaqla İrəvanın tarixinə iddia etməsi fonunda Ermənistan bu şəhərdə tarixi 100 ili aşan bir dənə də olsun erməni abidəsi nümayiş etdirə bilmir. Bu mənada, Qərbi Azərbaycandakı hər bir yaşayış məntəqəsi, o cümlədən də İrəvanın tarixi Azərbaycan şəhəri olması mübahisə doğura bilməz”.

Bu sözləri Pravda.az-a Milli Məclisin Hüquq siyasəti və dövlət quruculuğu komitəsinin üzvü Bəhruz Məhərrəmov Ermənistandan danışarkən “rəsmi İrəvan” ifadəsinin işlədilməsinə edilən etirazlara münasibət bildirərkən deyib.

Deputat xatırladıb ki, Azərbaycan Xalq Cumhuriyyətinin bağışlanılmaz səhvi nəticəsində İrəvan Ermənistana güzəştə gedilib: “Bölgədə tarixin ilk erməni dövlətinin yaradılmasına imkan vermişik. Sonrakı dövrlərdə də - istər SSRİ zamanı, istərsə də post-sovet periodunda beynəlxalq hüquq İrəvanı Ermənistanın paytaxtı kimi qəbul edib. Bu gün isə Ermənistan BMT-nin formal da olsa, de-yure suveren üzvüdür və İrəvan da Ermənistanın paytaxtı kimi rəsmən tanınır. Biz tariximizin ən güclü dövrünü yaşayırıq, işğala, təcavüzə son qoymuşuq, Qərbi Azərbaycana qayıdışa dair aydın Konsepsiyamız var. Həm hüququn gücü, həm gücün hüququ ilə diqtə edən tərəfik. Belə bir məqamda, bizim heç kimin ərazisinə iddiamız olmadığını rəsmən bəyan etdiyimiz bir vaxtda populist çağırışlar səsləndirmək faydasız və zərərlidir. Bu kimi spekuliyasiyalara yol vermək Elçibəy hökumətinin bayrağımızı Çin səddinə sancacağı barədə məsuliyyətsiz bəyanatlarını təkrarlamaq deməkdir. Min kilometrlərlə uzağa bayraq sancmağı vəd edən populistlər sonunda heç öz ölkələrinin ərazi bütövlüyünü və suverenliyini qoruya bilmədilər, heç Azərbaycanın rayonlarında hökm sahibi ola bilmədilər. AXC-Müsavat hakimiyyətinin nə prezidenti, nə bir naziri Bakıdan çıxa bilmirdi. Bu mənada, İrəvan, bütövlükdə Qərbi Azərbaycan populist bəyanatların mövzusu olmamalıdır. Siyasi manipuliyasiyalarla məsələ həll edilmir. Sadəcə, hər kəs əmin olsun ki, bizi AXC-Müsavatın xəyanəti ilə işğal olunmuş Qarabağa, Şərqi Zəngəzura qaytaran müzəffər siyasi iradə Xalq Cümhuriyyətinin də səhvinin nəticələrini aradan qaldıraraq bizi İrəvana da, Göyçəyə də, Qərbi Zəngəzura da qaytaracaq”.

Aytəkin Qardaşova

Tarix: 13 Oktyabr 2023, 14:20

Xəbər lenti