Rafiq Əliyev: "Yeni müharibədə yeni dövlətlərin iştirakı mümkündür, bölgəni böyük fəlakətlər, xaos gözləyir"

“İsrail-Fələstin problemi yeni yaranmayıb, 100 ildən çoxdur ki, mövcuddur. Hazırda İsraildə yaşayan bir çox israillilər vaxtilə Misirdən o torpaqlara köç ediblər. Bu, tarixi faktdır. Əvvəllər həmin ərazilərdə fələstinlilər yaşayıblar. Sonradan fələstinlilərdən o torpaqları alıb özlərinə vətən etsələr də, heç vaxt dövlət olmayıblar. Müharibədən sonra 1948-ci ildə Stalinin təklifi ilə həmin ərazidə iki dövlətin yaradılması gündəmə gəldi və BMT-nin qərarı ilə buna razılıq verildi. Söhbət İsrail və Fələstin dövlətinin yaradılmasından gedir. Bəzi qüvvələr, o cümlədən ABŞ və Böyük Britaniya İsrail dövlətinin yaranmasına imkan verib, amma Fəlsətinin dövlət olmasına maneə olmağa çalışıb. Çünki həm İsrail, həm Fələstin vaxtilə Böyük Britaniyanın müstəmləkəsi hesab olunub. Böyük Britaniya iki xalq arasında müharibə baş verəcəyi təqdirdə İsraili müdafiə edəcəyinə dair söz versə də, elə iki gündən sonra tamaşaçı mövqeyi tutdu, sanki bu konflikdən zövq aldı və əsgərlərini götürüb aradan çıxdı, İsraili Fələstinlə təkbətək qoydu. İsrail çətinliklə zaman-zaman öz torpaqlarını genişləndirdi, fələstinliləri sıxışdırıb BMT qərarına zidd olaraq onlara yalnız muxtariyyət verilməsinə nail oldu”.

Bu sözləri Pravda.az-a açıqlamasında Dini Qurumlarla İş üzrə Dövlət Komitəsinin sabiq sədri, professor Rafiq Əliyev deyib.

O bildirin ki, nəticədə Fələstin dövləti yaranmayıb, dünyada dövlət kimi tanınmayıb: “Fələstin indiyədək muxtariyyətdir. Hazırda Fələstinin istəyi sadəcə müstəqil dövlət yaratmaqdır. Sirr deyil ki, İsrail ABŞ-nin ən güclü hərbi müttəfiqidir və bütün münaqişələrdə bir-birilərinin yanında olublar. İsraildə böyük hərbi bazası olan ABŞ həmin ərazidə ikinci Fələstin dövlətinin yaranmasına imkan verməyəcəyinə söz verib. Bu, sadəcə tarixə qısa ekskursiya idi. Çünki istənilən halda İsrailin ərazisinə daxil olan 1300-ə qədər dinc sakini qətlə yetirmək, 200-dən çoxunu yaralamaq, böyüklü-kiçikli 300-dən çox müxtəlif yaşlını əsir götürmək yolverilməzdir, pislənməli, lənətlənməlidir. Bu, nə movcud qanunlara, nə dinə, nə də insanlığa uyğundur. Bu, açıq terrordur və səbəb nə olursa-olsun heç bir terror aktına bəraət qazandırmaq olmaz”.

R.Əliyev xatırladıb ki, Fələstinə cavab atəşi nəticəsində İsrail də 7500-dən çox yaşlını, 300-ə qədər qadın və uşağı qətlə yetirib: “Odur ki, hadisələrin gedişatı göstərdi ki, heç İsrail də Fələstindən “geri qalmadı”, əlini minlərlə günahsız insanın qanına batırdı. Onların arasında 3 minə yaxın azyaşlı da var. Azərbaycanın mövqeyinə gəlincə, kimliyindən asılı olmayaraq, belə görünməmiş vəhşi xarakterli terroru pisləyirik. Rusiya və Türkiyə kimi, biz də həm Fələstinin, həm də İsrailin dövlət kimi tanınmasını, müstəqil dövlət olmasını istəyirik. Bu münaqişənin yaxın vaxtlarda sülhlə bitəcəyi ilə bağlı əminliyim yoxdur. Əksinə, Livanın, İranın, Suriyanin məsələyə müdaxilə edəcəyi halda münaqişə daha da geniş miqyas ala bilər. Konfliktin yeganə həlli atəşi dayandırmaq və orada iki dövlətin yaradılması ola bilər. Söhbət bizim kimə rəğbət göstərməyimizdən, kiminlə daha sıx əlaqələrimizin olmasından getmir. Bizim İsraillə bütün sahələrdə əlaqələrimiz uzunmuddətli və genişdir. Azərbaycan hər zaman sülhün tərəfdarı olub. Fələstinliləri öz torpaqlarından didərgin salmaq, onları kütləvi şəkildə qətlə yetirmək həqiqətən bəşəri cinayətdir. Bunları görməmək olmaz. Bu bölgədə yeni və daha dəhşətli müharibə görünür. Yeni müharibədə yeni dövlətlərin iştirakı mümkündür. Bir sözlə, bölgəni böyük fəlakətlər, xaos gözləyir. Bütün bunların hamısı dünya səviyyəsində hörmətli siyasətçilərin olmaması ilə birbaşa bağlıdır. Bu fəlakətlərin fonunda Avropa siyasətçiləri ya gizlənib, ya da necə deyərlər, ağızlarına su alıb nə edəcəklərini bilmirlər”.

Aytəkin Qardaşova

Tarix: 27 Oktyabr 2023, 11:31

Xəbər lenti