Psixoloq: “Azərbaycanda həyat yoldaşına 3 min manatlıq telefon ala biləcək nə qədər kişi var...”

“Bir insan münasibətdə nə istəyər? Əlbəttə ki, eşidilmək. Qarşı tərəfin onu eşitməsi, anlaması, qəbul etməsi, dəstək olması və sairə. Real həyatda isə insan uşaqlıq emosional təlabatlarını əsas götürür. Təhlükəsizlik, yəni özümüzü güvəndə hiss etməliyik. Digər insanlarla ünsiyyət, münasibət, güvən, etibar, dəstək, hamının əzbər bildiyi, amma mənasını bilmədiyi empatiya, olduğu kimi qəbul edilmək... Bütün bu sadaladıqlarımızda üç min manatlıq hədiyyəlik nəsə yoxdur. Üç min manatlıq hədiyyənin emosional tələbatlarla, ümumiyyətlə, əlaqəsi yoxdur. Vaxtilə biz də Milli Məclisə təkliflər göndərmişdik, Azərbaycanda psixoloji xidmətin qanunvericilik səviyyəsində tənzimlənməsi, psixoloji xidmətlə məşğul olan insanın dünya standartlarında olduğu kimi, minimum 5 illik təhsili olması, psixoloqların öz sağlamlıqlarının da yoxlanılması... Psixoloqlar daha üst səviyyəli psixoloqların yanında praktika keçməlidirlər. İşlədikləri metodika, təlim bəlli olmalıdır. Təəssüf ki, Azərbaycanda psixologiya təhsilinin yanından belə keçməyən, dəbə düşdüyü üçün kabinet açan, psixoloqluq edən, verilişlərə çıxan xeyli sayda insan var. Söhbət təkcə təhsildən getmir...”

Pravda.az xəbər verir ki, bu sözləri tanınmış psixoloq Nizami Orucov deyib.

“Oxuduğum universitetlərin birində xanım qrup yoldaşımız 5 illik təhsilini qırmızı diplomla bitirdi. Normalda psixoloqlar humansitliyi qoruyurlar, amma sevdiyimiz professor həmin xanıma hamının qarşısında belə bir cümlə dedi: “Yuliya, sizdən bir şey xahiş edirəm, düzdür, psixologiyanı qırmızı diplomla bitirmisiniz, amma insanlara heç vaxt yaxın getməyin. Anbarda, çayda, okeanda işləyin, ancaq siz insanlara yaxın getməməlisiniz...” Hörmətli həmvətənlərim, illərlə sizə izah etməyə, bəzi insanları ifşa etməyə çalışdım. Nə dediyini anlamadan deyən insanları... Təsəvvür edin, bir qadın emosional, yaxud psixoloji problem yaşayır. Bu qadına deyirlər ki, ərin 3 minlik telefon almırsa, sənin boşanmaq haqqın var. Boşanmaq haqqı hamıda var, heç kim heç nə deyə bilməz. Amma ölkəmizdə ortalama qazanc bəllidir. Azərbaycanda həyat yoldaşına 3 min manatlıq telefon ala biləcək nə qədər kişi var. Öz ətrafımdan misal çəkə bilərəm. Oğullar var ki, səhərdən axşama qədər avtoservisdə işləyirlər. Nəinki qadın, heç həyat görmürlər. Avtomobilin yağı qulağının içinə qədər dolur. Bu adamlar ayda ən yaxşı halda rayondan Bakıya doğru üç min manat qazanırlar. Canını ortaya qoyaraq üç min manat qazanmısan. Evə gəlirsən, həyat yoldaşın səndən üç minlik telefon tələb edir. Cəmiyyət içinə çıxanda bir çox kişilərlə ünsiyyətdə oluram. Üç min manat qazanan kişinin özünə heç 500 manat qalmır. Heç kim məndən inciməsin, böyük hissəsi axmaq olan cəmiyyətin üzvləri heç 3 minlik telefonun 100 funksiyasından 10-unu istifadə edə bilmir. Bunların heç birinin emosional tələbatla yaxından-uzaqdan əlaqəsi yoxdur. Artıq burada başqa keyfiyyətlərdən danışa bilərik - qudurğanlıq, əxlaqsızlıq, mənəviyyatsızlıq, qədirbilməzlik, nə istədiyini bilməzlik... Adam deyir ki, qadının ona 3 minlik telefon almayan kişidən boşanmaq haqqı var. Uşaq atasısınız, qadının isə sosial şəbəkədə başını doldururlar, 3 minlik telefon ala bilmirsiniz deyə sizdən boşanır. Hə, uşaqlar atasız qalsalar da, qadın ərsiz, kişisiz qalsa da olar... Feministləri buna görə yıxıb-sürüyürdüm. Bu cəmiyyətdə reallıqları görə bilmək üçün ağıll olmağa ehtiyac yoxdur. Bir az ağıl olsa, bəsdir. Çalışın gözlərinizi geniş açın, özünüz görəcəksiniz ki, o insanlar özlərini ifşa edirlər. Boşanmağa, ailə dağıtmağa, kişiyə qarşı hər cür hərəkəti etməyə çağıranlar... Bütün bunlar cəmiyyətə etaplı şəkildə yeridilir. Cəmiyyətimizin bəzi axmaq, anlaqsız insanları isə buna dəstək olub, yayırlar. Özünüzü, ailələrinizi, əzizlərinizi qoruyun. Çünki artıq bəzi şeylər qapıda yox, evlərimizin içinə qədər gəlib çıxıb. Anlaqsız, nə gəldi danışanlar “Google”dan 3-4 məqalə kopyalayıb özlərinə nəsə yaradırlar. Çalışın diqqətli olun, görün kimin qəbuluna gedirsiniz, kimlərə aldanırsınız...”, - psixoloq deyib.

Aytəkin Qardaşova

Tarix: 28 Oktyabr 2023, 08:35

Xəbər lenti