ABŞ, Fransa, Almaniya və digərləri bilməlidirlər ki, Cənubi Qafqazda onlara yer yoxdur - RƏY

“ABŞ Konqresinin 907-ci düzəlişi ölkəmizə qarşı ədalətsizliyin ifadəsi olmaqla bərabər, həm də özünü “demokratik” adlandıran bu dövlətin antidemokratikliyindən, təcavüzkarlara dəstəyindən, çirkin məqsədlərindən xəbər verir. Noyabrın 15-də ABŞ Konqresinin Nümayəndələr Palatasında “Dağlıq Qarabağın gələcəyi” mövzusunda keçirilmiş dinləmələr və Azərbaycanın əleyhinə səsləndirilən böhtan xarakterli ifadələr bunu deməyə əsas verir. Bu gün Amerika Azərbaycanın inkişafını, beynəlxalq aləmdə artan nüfuzunu və zəfərini qəbul edə bilmir. Halbuki əldə olunan uğurlar beynəlxalq hüququn normalarına, dövlətimizin haqlı mövqeyinə, ədalətli mübarizəsinə əsaslanıb və həyata keçirilib”.

Bu sözləri Pravda.az-a açıqlamasında Milli Məclisin deputatı Tahir Rzayev deyib.

“ABŞ BMT Təhlükəsizlik Şurasının üzvü, ATƏT-in Minsk Qrupunun həmsədri kimi Azərbaycan həqiqətlərinə, torpaqlarımızın 30 il düşmən tapdağı altında qalmasına, 1 milyon insanın öz ata-baba torpaqlarından zorla qovulmasına, yüz minlərlə insanın öldürülməsinə, şikəst edilməsinə, əsir götürülməsinə, incidilməsinə həmişə biganə olub. Təhlükəsizlik Şurasının 4 mühüm qətnaməsinin yerinə yetirilməsinə heç bir təşəbbüs göstərməyib. Əksinə, 1992-ci ildə konqres tərəfindən qəbul edilən Azadlığa Dəstək Aktı qanunun 907-ci bölməsinə edilən düzəlişə əsasən, ABŞ tərəfindən Azərbaycana yardım göstərilməsi qadağan olunub, torpaqlarımızı işğal edən Ermənistana isə maliyə yardımı ayrılıb. Əlbəttə, bu, Azadlığa Dəstək Aktı yox, faşizmə, təcavüzkara dəstək aktı idi və işğala məruz qalan ölkəmizin haqlı mövqeyinin tapdalanması idi. ABŞ dünən həyata keçirdiyi məkrli məqsədini bu gün də davam etdirir. Suverenliyini bərpa edən, torpaqlarını azğın düşməndən qurtaran, haqqını alan, ədalətsizliyə son qoyan dövlətimizə qarşı yönələn təqiblər, təsirlər, yalan bəyanatlar, dinləmələr Amerikanın rəsmi dairələrinin sülhə, əminamanlığa, təhlükəsizliyə yox, müharibələr törətməyə, xalqları əsarət altına almağa xidmət etdiklərini göstərir”, - deputat bildirib.

T.Rzayev qeyd edib ki, AŞ Senatının noyabrın 15-də qəbul etdiyi “Ermənistanı müdafiə aktı” da tamamilə anti-Azərbaycan mahiyyəti daşıyır: “Ermənistanın Azərbaycandan qorunması və Amerikanın bundan narahatlığı gülünc görünür. Bu sənəd əslində Ermənistanın silahlandırılmasını nəzərdə tutur. Vaşinqiton erməni təcavüzkarlarını yaşatmaq və silahlandırmaq üçün ciddi cəhdlər göstərir. Bu, Cənubi Qafqazda sülhə təhdid və müharibəyə rəvac verməkdir. ABŞ və Avropanın bəzi ölkələri, Fransa, Almaniya bilməlidirlər ki, Cənubi Qafqazda onlara yer yoxdur. Ermənistanın əli ilə istədiklərinə nail ola bilməyəcəklər. Əksinə, bu ölkələr, parlamentlər saxta, heç bir hüquqi əsası və təsir qüvvəsi olmayan qətnamələr, qərarlar qəbul etməklə, bəyanatlar verməklə Ermənistanı məhvə yönəldirlər, ona hərbi və maddi yardım göstərməklə təcavüzkarı müharibəyə qızışdırırlar. Ancaq bütün hallarda Azərbaycan Prezidenti, Ordumuz və xalqımız düşmənlərimizə layiqli cavab verməyə qadirdir və yeri gələndə bu cavab veriləcəkdir. Erməni lobbisinin quluna çevrilmək isə ABŞ-nin siyasi imicinə, dövlətçilik təməlinə, beynəlxalq nüfuzuna çox böyük zərbə vurur və vuracaq”.

Tarix: 21 Noyabr 2023, 11:27

Xəbər lenti