Deputat bahalaşmadan danışdı: “Məhz bu yolla işbazların artan tamahlarının qarşısını almaq olar”

“Daxili bazarda ərzaq məhsulların qiymətlərində bahalaşma davam edir. Təbii ki, hər birimiz istehlakçıyıq və bu bahalaşmanı hiss edirik. Bahalaşmaya səbəb olan bir neçə amil olduğunu düşünürəm. İlk növbədə, dünya bazarlarında ərzaq mallarının qiymətlərinin kəskin artması davam edir. Təbii ki, idxal olunan malların dəyərində baş verən artımlar daxili bazara da təsirini göstərir. Əvvəla, idxal olunan ərzaq mallarının bahalaşmaması üçün kəskin qiymət artımı baş verən ərzaq mallarının qiymətlərini gömrük güzəştləri vasitəsilə tənzimləmək olar. Sonra da bu malları idxal edən və satışını həyata keçirən sahibkarlara malların üzərinə qoyduqları ticarət əlavəsinin maksimum həddi müəyyənləşməlidir. Məsələn, gömrük rəsmiləşdirmələrində 1 manata qeydiyyatdan keçən malın son satış nöqtəsində qiyməti 4 manata qədər artır. Buradan bir nəticə çıxartmaq olar ki, sahibkarlar idxal etdikləri malların üzərində yüksək ticarət əlavələri qoyurlar, bu da qiymətlərin bahalaşmasına yol açır. Belə olan halda, idxal edilən malların üzərinə qoyulan ticarət əlavələrinin maksimum həddi müəyyənləşməli, müvafiq qurum tərəfindən məsələyə nəzarət gücləndirməlidir”.

Bu sözləri Pravda.az-a açıqlamasında Milli Məclisin deputatı Azər Badamov deyib.

Deputat bəzi məqamlara da diqqət çəkib: “Digər bir məsələ isə ölkə daxilində istehsal olunan kənd təsərrüfatı məhsullarının daxili bazarda bahalaşması ilə əlaqədardır. Təəssüf ki, fermərlərin bazarlara çıxışları məhduddur. Ona görə də kəndçi istehsal etdiyi məhsulu çox ucuz qiymətə yerindəcə satışa çıxarmağa məcburdur. Amma fermerlərdən kənd təsərrüfatı məhsullarını alıb satanlar malın üzərinə çox böyük ticarət əlavəsi qoyurlar. Bu da malın qiymətinin kəskin artmasına aparır. O cümlədən topdan satış bazarlarından alıb satan pərakəndə satış şəbəkəsinin də aldığı malların üzərinə qoyduğu ticarət əlavələri çox yüksəkdir. Fermərdən 1 manata alınan məhsul istehlak zəncirinin son mərhələsində 5 manata satılır. Nəticədə, fermer özünün istehsal xərclərini bağlamaqda çətinlik çəkərək cüzi gəlir qazandığı təqdirdə, isehlak zəncirinin digər mərhələrinin iştirakçıları daha böyük qazanc əldə edirlər. Belə bir halın qarşısının alınmasını vacib hesab edirəm. Bunun üçün dövlət tədarükü genişlənməli və şəhərin mərkəzində dövlətin tədarük etdiyi məhsulların satışını aşağı qiymətlərlə təqdim olunan satış məntəqələri yaradılmalıdır. Belə bir təcrübə sovetlər dövründədə mövcud idi. Belə ki, “koptyurkalar” adlı satış məntəqlərində satılan kənd təsərrüfatı məhsullarının qiyməti bazarlardan kifayət qədər aşağı olurdu və bu da bazar qiymətlərinin formalaşmasına təsir göstərirdi. Bu baxımdan kənd təsərrüfatı məhsullarının bazar qiymətlərindəki artımların qarşısının alınmasının ən düzgün yolu şəhərlədə dövlət tədarükü məntəqələri tərəfindən satış məntəqlərinin yaradılması, aşağı qiymətlərlə kənd təsrrüfatı malların satışının təşkilidir. Məhz bu yolla işbazların artan tamahlarının qarşısını almaq olar”.

Aytəkin Qardaşova

Tarix: 7 Dekabr 2023, 11:25

Xəbər lenti