“Ağıla gəlməyən variantlar var, ancaq bunlar ola bilər…” – Növbədənkənar Prezident seçkiləri ilə bağlı AÇIQLAMA

“Azərbaycanda elan edilən növbədənkənar prezident seçkilərinin Rusiyadakı vəziyyətlə heç bir bağlılığı yoxdur. Cənab Prezident situasiyanı nəzərə alır, məsələlərin gedişatına baxır. Növbəti ildə təkcə Rusiyada deyil, Amerikada da, Fransada da seçkilər keçiriləcək. Azərbaycan yeni ilə seçki ilə başlayacaq. Prezidentin buna ehtiyacı yox idi, çünki onun reytinqi çox yüksəkdir. Bir sıra ehtimallar var. Birincisi, Azərbaycan parlamentli respublikaya keçəcəksə, onda yeganə İlham Əliyev namizədlik verməsə, Mehriban xanım Əliyeva seçilə bilər. Bu, mənim ehtimalımdır. Çünki İlham Əliyev həddindən artıq uzaqgörən siyasət yürüdən şəxsiyyətdir. İkincisi, Azərbaycan yeni dünya düzənində iştirak edir. Cənab Prezident həm də xalqın ona olan etimadını seçki yolu ilə yenidən təsdiqləmək istəyə bilər. Bu da versiyaların arasındadır. Əslində, Azərbaycanda prezident seçkiləri 14 ay sonra keçirilməli idi. Amma cənab Prezident bunu qabaqladı, deməli, bir bildiyi var. Bütün hallarda ancaq ehtimallar irəli sürmək olur...”

Bu sözləri Pravda.az-a açıqlamasında politoloq Cümşüd Nuriyev deyib.

O bildirib ki, Qarabağ tam azad olunandan, Azərbaycanın ərazi bütövlüyü bərpa ediləndən sonra Azərbaycana yeni iqtisadi nəfəs, iqtisadi düzən lazımdır: “Azərbaycan rəqəmsal iqtisadiyyata keçməlidir. Kifayət qədər işlər görülüb, lakin hələ görüləsi işlər var. Hökumət isə buna uyğun adekvat addım ata bilmir. Bu, faktdır. Hökumətin tərkibində mütləq dəyişiklik getməlidir. Hökumətin buraxılması üçün isə yeni prezident seçkiləri olmalıdır. Bu variant da ehtimalların içində var. Əgər İlham Əliyev qalsa, deməli, hökumət tamamilə dəyişəcək. Yeni struktur formalaşdırıla bilər. Bütün variantlar masanın üstündədir. Amma İlham Əliyev hansı varianta görə belə bir addım atdı, onu bir özü, bir də Allah bilir. İnanmıram ki, başqa kimsə bilə. İlham Əliyev kifayət qədər ölçülüb-biçilmiş addımlar atdığına görə siyasi analiz bu ehtimalları irəli sürməyə əsas verir. Ağıla gəlməyən variantlar var, ancaq bunlar ola bilər, başqa variant görmürəm”.

C.Nuriyev bir sıra məsələlərə də toxunub: “Xaricdə guya “mühacirət hökuməti” adlı “idiot” bir qurum yaratmaq istəyirdilər. Növbədənkənar prezident seçkiləri ilə cənab Prezident xalqa müraciət edir ki, xalqın etimadını yenidən alsın. Xaricdəkilər isə artıq birmənalı şəkildə başa düşsünlər ki, xalq etimad etsə, bunların boş-boş danışmaqlarının, hay-küy salmalarının mənası yoxdur. Buna ən çox ağılsız reaksiya verən yenə də həmişəki kimi AXCP və Müsavat oldu. Həqiqətən də, Əli Kərimli ağlını itirib. Deyir ki, seçkilər saxtadır. Saxtadırsa, sən niyə iki seçki gedib parlamentdə oturmuşdun? Sən olanda saxta olmur, sən olmayanda saxta olur? İkincisi, adam o qədər Avropa, Qərb meyillidir ki... Azərbaycanın dövlət və milli maraqlarını bu qədər satmaq... Bunu özünü ağıllı sayan adam yox, ancaq vətən xaini edə bilər. Amerika, Avropa İttifaqı bizə hər cür hücum etdi, hər şeydə ittiham etdi, bu adam isə deyir ki, İlham Əliyev beş-altı adama görə qəsdən belə edir. “Abzas Media” Azərbaycanda nələrlə məşğuldur. Bunlar jurnalistikadan, vətənə xidmət etməkdən çox vətəni satmaqla məşğuldurlar. Nələr qazanıblar, hamısı göz qabağındadır. Guya İlham Əliyev hər şeyi planlaşdırıb, bunları tutub. Deməli, beş-altı adam tutulmasaymış, İlham Əliyev prezident seçilə bilməyəcəkmiş. Vallah, bunun adını tapa bilmirəm. Əli Kərimli geri zəkalıdır, başqa ad verə bilmirəm. Ancaq geri zəkalı belə düşünə bilər. Kiminsə kimdənsə xoşu gəlməməsi normal haldır. Nə olsun, mənim də iqtidarda çox adamdan xoşum gəlmir. Bu, o demək deyil ki, dövlətimin, millətimin milli maraqlarını öz şəxsi maraqlarıma satam, yaxud mənə verilən tapşırığı icra edəm. Onsuz da həmişə bunu Əli Kərimliyə yaraşdırırdım, amma bu qədər düşəcəyini gözləmirdim. Çox təəssüf ki, mən səhv etmişəm”.

Aytəkin Qardaşova

Tarix: 8 Dekabr 2023, 14:58

Xəbər lenti