Cənab Prezidentin “Euronews”a müsahibəsi dövlətimizin milli maraqlarının qorunmasına sadiqliyini göstərir və xalqımızı qürurlandırır - RƏY

““Biz beynəlxalq arenada müstəqil siyasət yürütməyi davam edəcəyik” “Qarabağ Azərbaycanın hissəsidir və bu, hamı, o cümlədən Ermənistanın özü tərəfindən etiraf edilir”, “Azərbaycan çoxmillətli ölkədir və Azərbaycandakı heç bir etnik qrupun dini və etnik zəmnində heç vaxt heç bir problemi və narahatçılığı olmamışdır”. Bu fikirlər Azərbaycan Respublikasının Prezidenti cənab İlham Əliyevin “Avronyus” televiziyasına verdiyi müsahibəsində səsləndirilib və günün reallıqlarını əks etdirməklə bərabər, gələcək vəzifələrə yeni bir baxış, sülhün, əminamanlığın bərpası üçün dünyaya verilən mesajdır. Ölkəmizin başçısı fəaliyyətinin bütün dövrlərində bəşəri dəyərlərə - demokratiyaya, insan azadlığına, haqqa-ədalətə, ölkələrin suverenliyinə və müstəqilliyinə sadiqliyini nümayiş etdirib, Azərbaycan xalqının xoşbəxtliyi, torpaqlarımızın düşməndən azad edilməsi uğrunda mübarizə aparıb. Azərbaycan iqtisadiyyatını inkişaf etdirmək, beynəlxalq əlaqələri möhkəmləndirmək, ölkədə ictimai-siyasi sabitlik yaratmaq, vətəndaş həmrəyliyini təmin etmək başlıca vəzifə kimi qarşıya qoyulub və dövlət rəhbəri verdiyi vədi, əməli fəaliyyəti ilə doğruldub”.

Bu sözləri Pravda.az-a açıqlamasında Milli Məclisin deputatı Tahir Rzayev deyib.

“20 ildə Azərbaycanın ümumi daxili məhsulu 4 dəfə, dövlət büdcəsinin gəlirləri 20 dəfədən çox, valyuta ehtiyatları 37 dəfədən çox artıb. Bu illər ərzində ölkəyə 300 milyard dollardan artıq sərmayə cəlb olunub, işsizlik 50%-dən 5,5%-ə enib. 3250-dən çox məktəb, 750 tibb müəssisəsi, çoxsaylı idman-olimpiya mərkəzləri, mədəniyyət ocaqları tikilib, təmir edilib istifadəyə verilin. 21 min kilometrdən artıq yol çəkilib, 14 min şəhid ailəsi, müharibədə sağlamlığını itirən şəxslər mənzillərlə təmin olunub. Televiziyaya müsahibəsində cənab İlham Əliyev iqtisadi məsələlərə önəm verməklə bərabər, Azərbaycanın beynəlxalq aləmə verdiyi töhfələrdən, Avropanın enerji təhlükəsizliyinə yardımından, alternativ enerji mənbələrinin yaradılmasından, neft hasilatının və ixracının artırılmasından, Cənub Qaz Dəhlizinin başa çatdırılması istiqamətində görülən işlərdən, Azərbaycanın müstəqil daxili və xarici siyasətə malik olmasından, etibarlı tərəfdaş kimi dünya ölkələri tərəfindən qəbul edilməsindən söz açdı və dövlətimizin bundan sonra da müstəqil siyasət yürüdəcəyinə əminliyini bildirdi. Azərbaycan Prezidenti müxbirin işğaldan olunmuş torpaqlar və Ermənistanla münasibətlərə dair suallarına bu günün reallıqları baxımından cavab verərək dedi ki, ərazilərimiz düşməndən azad olunub və regionlarda tikinti-bərpa işləri uğurla davam etdirilir. 2026-cı ilin sonuna kimi 140 min insan öz torpaqlarında yerləşdiriləcək. Ermənilər işğal etdikləri 15 min kvadrat kilometr ərazini tamamilə dağıdıb məhv ediblər. Biz qalib olsaq da, sülhün tərəfdarıyıq və Ermənistan tərəfə bunu dəfələrlə bildirmişik, ancaq onlardan konkret cavab almamışıq. Dövlətimizin rəhbəri ermənilərin Qarabağdan getməsinə münasibət bildirərək dedi ki, Qarabağda yaşayan erməni ailələrinin hüquqlarını tanıyırıq və onlar geri qayıda bilərlər. Ancaq Ermənistandan qovulmuş 300 min soydaşımızın da öz doğma yurd-yuvasına qayıtmaq haqqı var və qayıdışlar qarşılıqlı olmalıdır. Prezidentimizin söylədiyi fikirlər, əlbəttə ki, beynəlxalq hüququn normalarına əsaslanır və təkzib oluna bilməz. Bu müsahibə Azərbaycan dövlətinin sülh danışıqlarına, beynəlxalq prinsiplərə, humanist dəyərlərə, münasibətlərin yaxşılaşdırılmasına, dövlətimizin milli maraqlarının qorunmasına sadiqliyini bir daha göstərir və xalqımızı qürurlandırır”.

Aytəkin Qardaşova

Tarix: 12 Dekabr 2023, 14:12

Xəbər lenti