Nizaməddin Şəmsizadə: “Xalqın ürəyini fəth etmiş şəxs ömürlük Prezident olmalıdır, heç bir qüvvə cənab İlham Əliyevin qarşısına çıxa bilməz”

“Hələ Birinci Qarabağ müharibəsi dövründə yazmışdım ki, kim Qarabağı azad etsə, o, Azərbaycanın əbədi Prezidenti olsun. Unudulmaz Heydər Əliyevə bu, qismət olmadı, ömür imkan vermədi. Amma onun oğul varisi, Azərbaycan xalqının böyük oğlu, Müzəffər Ali Baş Komandanımız İlham Əliyev bu işi icra etdi. Pandemiyadan dünya ölkələri ilə müqayisədə ən az itki ilə çıxdıq. Çünki İlham Əliyev uzaqgörən bir rəhbər kimi qabaqlayıcı tədbirlər gördü. Həmin vaxt təklif etmişdim ki, İlham Əliyevə məhz pandemiyadan xalqını az itkilərlə xilasetdiyinə görə Milli Qəhrəman adı verilsin. Hamı məni hay-küyə basdı, ağızlarına gələni yazdılar. Müxalifət də, Amerikada oturanlar da... Bəzi internet televiziyalarda şəklimi Prezidentlə yanaşı qoydular, dediyim sözləri yazdılar, məni ələ saldılar ki, bu nə təklifdir? Amma tarix göstərdi ki, 44 günlük müharibədə İlham Əliyev əvvəlcə BMT-nin Təhlükəsizlik Şurasında çıxış edib müharibə ideologiyası yaratdı. Bütün dünyaya sübut etdi ki, ATƏT-in Minsk Qrupu, Avropa Şurası və digər təşkilatlar Azərbaycana torpaq qaytarası deyillər, erməninin, erməni lobbisinin çaldığı ilə oynayırlar...”

Bu sözləri Pravda.az-a müsahibəsində Əməkdar elm xadimi, professor Nizaməddin Şəmsizadə deyib.

Alim xatırladıb ki, Prezident İlham Əliyev müharibənin labüd olduğunu dünyaya sübut edib: “Möhkəm hazırlaşaraq 44 günlük, hər günü 1 ilə bərabər olan müharibədə Azərbaycan torpaqlarını 30 illik işğaldan azad etdi. Həmin dövrdə bir çoxları mənim kimi dedilər ki, İlham Əliyevə Milli Qəhrəman adı vermək lazımdır. Onda mənim nəvəm sosial şəbəkədə yazdı ki, bəs mənim babam deyəndə siz təkidlə onu pisləyirdiniz, indi isə hamınız eyni sözü deyirsiniz... Amma görünür, Prezident özü bunu istəmədi. Hesab edirəm ki, İlham Əliyev çox yüksək səviyyəli, bütün dünyanı heyrətə gətirəcək dərəcədə ağıllı diplomatdır. Müharibədən çox onun diplomatiyası qalib gəldi. Böyük strateq, Ali Baş Komandan kimi İlham Əliyevin bir sözü var: “Nəyi, necə, nə vaxt etmək lazımdır, bunu mən bilirəm” Həqiqətən də, o, ilk dəfə Prezident seçiləndə dediyi sözə sadiq Prezidentdir. Demişdi ki, mən hər bir azərbaycanlının Prezidenti olacağam. Həqiqətən, hər bir azərbaycanlının Prezidentidir. Dünyada heç bir prezident, rəhbər öz xalqına İlham Əliyev qədər yaxın ola bilməz. O, xalqın ürəyinə girdi, torpaqları azad etməmişdən əvvəl xalqın ürəyini fəth etdi. Xalqın ürəyini fəth etmiş adam qanuni olaraq xalqın ömürlük Prezidenti olmalıdır. Mən belə düşünürəm. Şəxsən mən onu seçəcəyəm. Biz onu seçəcəyik. Ondan başqa alternativ görmürəm”.

N.Şəmsizadə deyib ki, Azərbaycanda müxalifət yoxdur: “Sadəcə, bir sıra dələduzlardır. Avropa ölkələrindəki kimi möhkəm müxalifət olsa... AXCP və Müsavat hakimiyyəti dövründən qalmış bir neçə dələduz var, özləri də ağızlarına gələni danışırlar. Müxalifəti görürük, hamısı öz mənafeyinə xidmət edir. Onların səviyyəsi prezident olmaq səviyyəsində deyil. Mən İlham Əliyevə yeni seçkilərdə uğurlar arzulayıram. Onun seçkidən heç bir qorxusu yoxdur. Heç bir qüvvə onun qarşısına çıxa bilməz. O, xalqın sevimlisi, istəklisidir. Təbii ki, müəyyən problemlər var. Biz erməni vandalizminin yerlə-yeksan etdiyi Qarabağı yenidən tikirik, müəyyən çətinliklər var. Buna görə müxalifətçi olmaq lazım deyil. Məsələn, Müsavatın yeni lideri Arif Hacılı sosial şəbəkədə yazır ki, “Nizaməddin Şəmsizadə o vaxt mənim yanıma gəldi, gördüm ki, çox yaltaq adamdır”. Mən təklikdə Arif Hacılının yanına getməmişəm. Getmişəm, amma rəhmətlik professor Azad Nəbiyevlə. Özləri dəvət etmişdilər. Mən heç kimə yaltaqlanmamışam. Arif Hacılı deyir ki, Nizaməddin Şəmsizadə Əbülfəz Elçibəyə “Peyğəmbər”, mənə də “İmam Əli” deyirdi. Mən, ümumiyyətlə, imam filan saymıram, heç vaxt da elə söz demərəm. Dövlət mükafatçısı laureatı, Əməkdar elm xadimiyəm, Azərbaycanda ən gənc elmlər doktoru olmuşam, 30 ildir, professoram. Son vaxtlar 5-6 yaxşı kitabım çıxıb. Bir sözlə, Cənab Prezident İlham Əliyev demişkən, sözümüz imzamızdır!”

Aytəkin Qardaşova

Tarix: 15 Dekabr 2023, 09:56

Xəbər lenti