Cavanşir Paşazadə: “Görüntü üçün mərkəzi yollarda 100 metr velosiped zolağı çəkilib, ardı yoxdur...”

Paytaxtın İstiqlaliyyət küçəsində çəkilən yeni velosiped yolu narazılıq yaradıb. Sözügedən küçədə yolun bir hissəsi hazırda avtobus zolağıdır, ikinci hissəsi isə velosipedlərin ixtiyarına verilib. Bəs görəsən minik maşınları hansı yolla hərəkət etməlidir? Görünən budur ki, İstiqlaliyyət küçəsində sıxlıq iki qat artacaq. Bütün bunlarla yanaşı, avtomobil yolunda velosiped xətlərinin çəkilməsi velosiped sürücülərini də təhlükəyə ata bilər. Bu səbəbdən həmin yolda tramvay xəttinin salınmasının daha daha məqsədəuyğun olduğu bildirilir...

Velosiped zolağına daxil olan sürücüləri hansı cəza gözləyir? - AÇIQLAMA

Müzakirələrlə bağlı Pravda.az-a fikirlərini bölüşən Milli Məclisin deputatı Cavanşir Paşazadə deyib ki, Bakının tıxacında insanlar çox böyük çətinlik çəkirlər: “Əlbəttə, yollarda velosiped xətləri çəkmək lazımdır. Lakin bu velosiped yolları görüntü üçün çəkilməməlidir. Faktiki, səmərəli yollar seçmək lazımdır ki, vətəndaşlarımızla yanaşı paytaxta gələn turistlər də yararlana bilsinlər. Bütün bunlar xoş arzulardır, amma yerinə yetirilə bilsə... Görüntü üçün mərkəzi yerlərdə 100 metr velosiped xətti çəkilib, ardı yoxdur. Avtomobillərin sağa-sola dönmələri üçün xətlər çəkilib, onlar da yarımçıqdır. Avtobus zolaqlarının ayrılması, ictimai nəqliyyata şərait yaradılması vacib məsələlərdəndir. Lakin nəzərə almaq lazımdır ki, paytaxt küçələri ensizdir. Minik maşınları pərakəndə şəkildə qanunsuz yerlərdə saxlanılır. Bu da gediş-gəlişə kifayət qədər maneədir. Dövlətin təsdiq etdiyi qanunlar əsasında tətbiq olunan cərimələr müəyyən dövr ərzində artırılır, lakin görünür, bu, problemə o qədər müsbət təsir etmir. Cəmiyyətdə profilaktik işlər aparmaq lazımdır. Maşınların sıxlığı, yolların dar olması turizmə də təsir edir. Xarici ölkələrdən Bakıya gələn tursitlər də tıxacdan əziyyət çəkirlər. Bu da turizmin inkişafına ziyan vurur. Ulu öndər Heydər Əliyevin adını daşıyan mərkəzi yolda xeyli sayda bölünmələr var. Avtobuslar özləri də bu yolda tıxaca zəmin yaradırlar. Dayanacaqlarda ard-arda avtobus saxlanılması səbəbindən avtomobillər keçə bilmir. Cəmiyyətin özündə sürücülük mədəniyyətinin az olması da problemi daha da artırır. Xarici ölkələrdə əhalisi sıx olan şəhərlərdə ensiz küçələr çoxdur, lakin hər kəs bir-birinə şərait yaradır, avtomobillər rahat hərəkət edir. Bizdə bu, bir az psixoloji məsələlərdən də qaynaqlanır. İşıqforda xüsusən belə halları müşahidə edirik”.

C.Paşazadə Bakıda tramvay xətlərinin çəkilməsini dəstəkləyib: “Tramvayın olmasını mən də istəyərdim. Əvvəllər Bakıda tramvay xətləri var idi, şəhərə xüsusi gözəllik verirdi. Dünya ölkələrində böyük şəhərlərin əksəriyyətində tramvaylar işləyir. Bu, insanların gediş-gəlişini daha da asanlaşdırar”.

Aytəkin Qardaşova

Tarix: 21 Dekabr 2023, 08:54

Xəbər lenti