Psixoloq Yeni il ilə əlaqədar 3600 manat olan otellərdən danışdı: “Bilirlər ki, müəyyən təbəqə var, bu pulu ödəməyə hazırdır...”

Paytaxtla yanaşı bölgələrdə fəaliyyət göstərən otel və restoranlarda Yeni il ilə əlaqədar olaraq artıq yerlər tutulub. Hətta ən ucuz otellərdə belə rezerv etdirmək müşkülə çevrilib. Sosial şəbəkələrdə daha çox müzakirə edilən məqam isə ən ucuz otelin 270 manat, ən bahalının isə 3600 manat olmasıdır. Azərbaycanda minimum əməkhaqqını yada salanda maraqlı suallar ortaya çıxır. Deməli, təklif edilən fantastik rəqəmlərdən çoxları razıdır...

Bununla bağlı Pravda.az-a fikirlərini bölüşən tanınmış psixoloq Nizami Orucov isə düşünür ki, qiymətlərdə qeyri-adi heç nə yoxdur:

“Çünki təklif tələbata görə formalaşır. Oteller və restoranlar çox gözəl bilirlər ki, müəyyən təbəqə var, bu pulu ödəməyə hazırdır. Təklifi də ona görə verirlər. Əlavə olaraq, nəzərə almaq lazımdır ki, Azərbaycanda daxili turizm son illər inkişaf etsə də, əslində, regionlarda otellərin sayı da, gedilə biləcək yerlər də azdır. Bu da qiymətlərin yüksəlməsinə səbəb olur. Bir çox insan üçün də əlçatmazdır...”

Psixoloq “Yeni il bəhanəsi ilə görkəmli otel və restoranlara gedənlər “qonşudan geri qalmamaq”, sosial şəbəkələrdə fotolar, vloqlar paylaşmaq üçün gedirlər, özlərini xoşbəxt göstərsələr də, əslində belə deyil” kimi müzakirələrə də münasibət bildirib: “Nəzərə alsaq ki, bir çox ailələrdə, şəxslərarası münasibətlərdə ciddi problemlər yaşanır. İnsanların müəyyən hissəsi tükənmişliklə üzləşib. Buna görə də Yeni il çox simvolik qeyd olunur, sırf süfrə bəzəyib, onun ətrafında əyləşmək formasında keçir. Yeni ilə çox az insan, sözün həqiqi mənasında, yeni ümidlər, yeni başlanğıc, yeni həyata addım atmaq kimi yanaşır. Əlbəttə, bunun da arxasında psixoloji problemlər yatır. Məsələn, ötən il Yeni ildə gördüm ki, atəşfəşanlıqdan sonra uşaqlı bir ailə evə qayıdanda küçənin ortasında dalaşır. Belə hallara da tez-tez rast gəlmişəm. İndi öz uşaqlığımızı yada salsaq - Yeni il ərəfəsində ailədə olan gərginlikləri, söz-söhbətləri... İlk növbədə insanlar arasında münasibətlər daha yaxşı idi. İnsanların Yeni il ab-havasını təkcə Yeni ildə yox, elə hər gün yaşamaları daha gözəl olardı. Şəkil çəkdirib sosial şəbəkələrdə paylaşmaq isə daha çox başqa tələbatların ödənilməsidir. Təbii ki, xoşbəxt olub şəkil çəkdirərək o anı əbədiləşdirmək niyyətində olan insanlar da var. Eyni zamanda “baxın, mən xoşbəxtəm”, “baxın, mən uğurluyam, filan yerə gedə bildim, baxın, baxın...” deyənlər də az deyil. Bəzən özünü təsdiq etməyə çalışmaq özünü olduqca önəmli hiss etdirmək tələbatına görədir...”

Aytəkin Qardaşova

Tarix: 22 Dekabr 2023, 16:20

Xəbər lenti