“Pirsinq etdirənlər yoluxucu xəstəliklər baxımından diqqətli olmalıdırlar" - Həkim təhlükələri açıqladı

"Pirsinq tətbiqi son zamanlar çox geniş yayılıb. Bununla məşğul olan xüsusi gözəllik mərkəzləri var. Pirsinq əksər hallarda tibb sahəsi barədə qətiyyən məlumatı, tibbi biliyi olmayan şəxslər tərəfindən tətbiq edilir. Hazırda pirsinq xüsusən yaşı 18-dən aşağı olanlar arasında çox geniş yayılıb. Bu işlə məşğul olanlar heç bir valideyn icazəsi olmadan, pasiyentlərini bilgiləndirmədən onları pirsinq edirlər. Bu, yanlışdır. Əvvəla, 18 yaşdan aşağı fərdlərin mütləq valideyn icazəsi olmalıdır. Çünki pirsinqin bir çox fəsadları ola bilər".

Bu sözləri Pravda.az-a müsahibəsində tanınmış uzman dermatoloq Fəridə Rəsulova deyib.

O bildirib ki, pirsinq nəticəsində yaranan fəsadların bəzilərinin müalicə ilə tam qarşısını ala bilsələr də, bəzilərini müalicə etmək belə mümkün deyil: "Xanımlar yoluxucu xəstəliklər baxımından çox diqqətli olmalıdırlar. Pirsinq edilən mərkəzdə bu işlə məşğul olan şəxs sterilizasiyaya önəm verirmi? İnfeksion xəstəliklər çox geniş yayılıb. Xüsusən, QİÇS, Hepatit B ilə bağlı diqqətli olmaq lazımdır. Son zamanlar ən çox qulaq nahiyəsində fəsadlar görürük. Pirsinq tətbiqi qulaq məməsi xaricindədirsə, böyük ehtimalla, qığırdaq nahiyəsinə nisbət edir. Fəsadların ən birincisi lokal infeksiyalardır. Bu, pirsinq edildiyi vaxtdan bir-üç gün ərzində özünü göstərir və həmin nahiyədə qızarıqlıq, şişkinlik, iltihablı, qanlı axıntı müşahidə olunur. Belə hallar adətən pirsinqin əlverişli şəraitdə edilməməsindən, sterilizasiyaya önəm verilməməsindən, həddindən artıq travmadan və xəstənin pirsinqdən sonra yara yerinə düzgün qulluq etməməsindən qaynaqlanır. Digər əks təsir kontakt ekzema ola bilər. Bu, xüsusən qulağa taxılan pirsinqin materialına bağlı ekzema olur. Qulaqda qızarıqlıq, qaşıntı, şişkinlik və sulanma ilə özünü büruzə verir. Perixondrit dediyimiz ağır əks təsir isə qığırdaq nahiyəyə edilən pirsinq zamanı qarşımıza çıxır. Əsasən qulaq məməsindən başqa digər nahiyələrə edilən pirsinqdə qığırdaq toxuma çevrəsində iltihablanma başlayır. Bu, növbəti günlərdə irinləməyə qədər gedib çıxır və qığırdaq deformasiyası yarada bilir. Hətta müalicəsi estetik cərrahiyyəyə qədər uzana bilər. Yəni çox ciddi yan təsirdir. Estetik baxımdan da xəstələri narahat edə bilər".

Həkimin sözlərinə görə, pirsinq nəticəsində ortaya çıxan digər yan təsirlərdən biri keloiddir: "Bu, qalınlaşmış yara izidir. Pirsinqin taxıldığı yerdə zamanla şişkinlik kimi qalınlaşma əmələ gəlir. Belə halda pirsinq mütləq çıxarılmalı, dermatoloqa müraciət olunmalıdır. Biz hər ay iynə üsulu ilə əmələ gələn qalınlaşmış yara izini müalicə etməyə çalışırıq. Hər ehtimala qarşı pirsinq taxılmaması məsləhətdir. Əgər taxılacaqsa belə, mütləq sterilizasiya qaydalarına əməl edilən şəraitdə, güvənilir bir mərkəzdə taxılmalıdır. Pirsinq taxılan ilk gündən qulaqda problem varsa, mütləq həkimə müraciət etmək lazımdır".

Aytəkin Qardaşova

Tarix: 30 Dekabr 2023, 10:13

Xəbər lenti