“Kəmaləddin Heydərov işini bacarmasaydı, Prezident İlham Əliyev onu çoxdan kənarlaşdırmışdı” – Cümşüd Nuriyev

Bakıda son bir ayda baş verən partlayış və yanğın hadisələri fonunda fövqəladə hallar naziri Kəmaləddin Heydərovun fəaliyyəti müzakirə olunur. Müzakirlərdə FHN tərəfindən təhlükəsizlik məsələlərinə ciddi nəzarət olunmamasında məhz K.Heydərov günahlandırılıb.

Sabiq deputat, politoloq Cümşüd Nuriyev isə Pravda.az-a müsahibəsində deyib ki, bu yanaşmaların hamısı qərəzlidir, xüsusi sifarişlədir:

“Çox təəssüf ki, Azərbaycan hakimiyyətinin daxilində Kəmaləddin Heydərovu sevməyən qüvvələr var. Çünki Kəmaləddin Heydərov Azərbaycan üçün sıfırdan Fövqəladə Hallar Nazirliyi yaratdı. Kəmaləddinin təşkilatçılıq qabiliyyəti çox yüksəkdir, yaxşı idarəçidir. Kim nə deyirsə, yalan deyir. Təbii ki, bütün nazirliklərdə olduğu kimi FHN-də də işinin öhdəsindən gələ bilməyənlər ola bilər. Ötən gün mebel sexindəki partlayışdan əvvəl Respublika Perinatal Mərkəzində də partlayış oldu və FHN işçisi də həbs edildi. Minlərlə işçi var, elə bir cihaz yoxdur ki, bu qədər işçinin keyfiyyətini işə götürəndə yoxlasın. Peşəsini, sahəsini necə bildiyinə fikir verirlər. Sahibkarlar öz işlərinin öhdəsindən gəlmirlər. Çünki daha çox ucuz işçi qüvvəsi, küçədən gətirilən adamları işlədirlər. Çoxunun əmək müqaviləsi belə yoxdur, ucuz başa gəlsin deyə qeyri-peşəkarları dəvət edirlər. Təhlükəsizliyə daxildə bu işçilər əməl etməlidirlər. Qaz sızıbsa, ən azından qoxusunu bilməli idilər. İçəridə 35 nəfərə qədər adam olub, heç biri qoxunu duymayıb? Fövqəladə hallar naziri gəlib içəridə oturmur ki... Çox maraqlıdır ki, Azərbaycanda kim işini yaxşı təşkil edirsə, ona daha çox hücum edirlər, nəinki işini bacarmayanlara. Kəmaləddin Heydərovu çoxdan tanıyıram. Bütün hallarda, o, öz işinin öhdəsindən gəlib. Görünən budur ki, Kəmaləddin Heydərov kimlərinsə xoşuna gəlmir. Bilirlər ki, prezident seçkilərindən sonra hökumət buraxılacaq, ona görədə “vətənsevərlər” hay-küy, vay-şüvən qaldırırlar ki, dövlətdən daha çox bacarıqlı nazirlər kənarlaşdırılsın, onların yerinə kimisə gətirsinlər. Məqsəd budur, amma bu, vətənə xidmət yolu deyil”.

C.Nuriyev bildirib ki, Kəmaləddin Heydərovun Azərbaycan üçün çox böyük xidmətləri var: “O, əvvəlcə gömrük sistemini qurdu, sonra da fövqəladə hallar sistemini. Buna görə də sifarişlə çıxış edənlər kişi kimi ortaya çıxsınlar. Onlarla istənilən debata getməyə hazıram. Bütün məsələləri onlar da qoysun, mən də. Onsuz da media işıqlandırır. Vallah, nə deyim? Azərbaycanda elə ədalətsizlər var ki, cavab tapmaq olmur. Onlardan biri Kəmaləddin Heydərova qarşı olan ədalətsizlikdir. Əgər bu adam işini bacarmasaydı, Prezident İlham Əliyev onu çoxdan kənarlaşdırmışdı. Adam işini yaxşı bacarır. El üçün ağlayan göz həmişə kor olar... Bu yazığa da ona görə hücum edirlər”.

Aytəkin Qardaşova

Tarix: 16 Yanvar 2024, 14:58

Xəbər lenti