Elman Məmmədov: "Güclü olmalıyıq ki, belə murdarlara qarşı dözüm gətirək və qalib gələk"

“Arxivi araşdırsanız, görəcəksiniz ki, Azərbaycan və Ermənistan 2001-ci ildə Avropa Şurasına üzvlüyə eyni vaxtda qəbul olunmuşdu. Həmin vaxt jurnalistlər məndən fikrimi öyrənmək istədilər ki, Azərbaycan Ermənistanla birlikdə Avropa Şurasına qəbul olundu, bunun Azərbaycan və Ermənistan üçün əhəmiyyəti nə olacaq? Həmin fikirlərimi bir daha təkrar edirəm. Avropa Şurası bizdən xahiş etməyib ki, gəl, üzv ol. Biz Avropa Şurasına üzv olmaq istəmişik, Şura da qəbul edib. 2001-ci ildə də demişdim ki, nəticəsi belə olacaq. Avropa Şurası, Avropa İttifaqı, ümumiyyətlə, Avropa Şurası Parlament Assambleyası - bunlar Ermənistan üçün müdafiə, qalxan rolunu oynayacaqlar, Azərbaycan üçün isə daim təzyiq, təhdid və xoşagəlməz problemlər yaratmaq vasitəsi olacaqlar. O dövrdə mənimlə razılaşmayanlar, hətta məni tənqid edənlər oldu ki, niyə belə deyirsən? Dedim ki, ola bilər, fikrimdə səhv edərəm, ancaq mən tarixə və xristian-İslam münasibətlərinə baxıram...”

Bu sözləri Pravda.az-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Elman Məmmədov deyib.

Deputat xatırladıb ki, Avropa İttifaqında, Avropa təsissatlarında iştirak edən 2 müsəlman dövləti var: “Biri Türkiyədir, biri də Azərbaycan. Türkiyəyə qarşı olan hərəkətlərə baxıb, nəticə çıxarmaq lazımdır. Bir də Avropa Şurasına qəbul olunanda Avropa Parlamenti, Avropa Şurası Parlament Assambleyası, Avropa İttifaqı bizə qarşı hansı xoşagəlməz, yaramaz, ədalətsiz hərəkətlər ediblərsə, son 22 ildə göz qabağındadır. Hələ bundan sonra da davam edəcək. Yəni 2001-ci ildə dediyim sözlər təsdiqini uzun illərdir, tapıb, bu gün də tapmaqda davam edir. Bunlardan bizə qarşı xoş heç bir şey gözləmək olmaz. İtin quyruğuna basan kimi birinin “quyruğuna” basdınsa, o birilər də onun başına yığışır, üzərimizə hücuma gəlirlər. Erməni, Fransa xatirinə... Bunlar Fransanın təşkil etdiyi oyunlardır. Avropa Şurası Parlament Assambleyasında təmsil olunanlar arasında Türkiyədən başqa, hamısı xristian dövlətləridir. Burada xristian təəssübkeşliyi var. Eyni zamanda tarixləri müstəmləkəçilik və işğalçılıqla tamamlanan Avropa dövlətləri 30 ildən artıq bir dövrdə Azərbaycan torpaqlarını işğal edən, Azərbaycan xalqına qarşı soyqırımıları törədən, Azərbaycanın 20%-dən çox ərazisini xarababazara çevirən Ermənistanı müdafiə edib, Azərbaycanın haqq işinə qarşı qərəzli mövqe sərgiləyirlər. Bax, bu səbəbdən də, hesab edirəm, biz bugünkündən də daha güclü olmalıyıq ki, belə murdarlara qarşı dözüm gətirək və qalib gələk”.

Aytəkin Qardaşova

Tarix: 23 Yanvar 2024, 11:02

Xəbər lenti