Komissiyaların görüşündə müvafiq razılaşmalar əldə edilib? - AÇIQLAMA

“İkitərəfli görüşlərin keçirilməsi hər iki dövlətin mənafeyinə uyğundur. Çünki başqaları bu işə qarışmır. Baş nazirin müavini Şahin Mustafayev bu sahədə yaxşı fəaliyyət göstərir. Onun müsbət fəaliyyətini qeyd etmək lazımdır, çünki həm İranla, həm də Ermənistanla görüşləri çox yüksək səviyyədə təşkil edir, çalışır. Ötən gün dövlət sərhədinin delimitasiyası və sərhəd təhlükəsizliyi məsələləri üzrə komissiyaları arasında keçirilən görüşdə də Şahin Mustafayevin qaldırdığı məsələlələr, təbii ki, cənab Prezidentin tapşırığıdır. Azərbaycan 2010-cu ildə imzalanmış 10 noyabr bəyannaməsinə əməl edilməsini istəyir. Çünki məsələ təkcə Azərbaycanın sərhədi yox, anklavları ilə bağlıdır. Qazaxın 4 kəndi bilavasitə sərhədə bitişikdir. Sərhədin oradan başlaması daha yaxşıdır, çünki həmin torpaqlar bizimdir, əslində anklav deyil. 1984-cü ildə qeyri-qanuni şəkildə Azərbaycan torpaqlarını mənimsədilər, İncə dərəsindən 600 hektar ermənilərə verildi. Ermənilər zolaq şəklində gəlib sərhədi keçirlər. Yəni onlar gələcəkdə həmin torpaqları mənimsəmək üçün bunu etmişdilər. O vaxtlar həmin sənədi SSRİ Nazirlər Soveti sədrinin müavini Şamil Rasizadə imzalamışdı. Camaat da Rasizadəni döyüb qovmuşdu. Üstündən 40 il keçib, hələ də Azərbaycan bir imzanın arxasınca mübarizə aparır ki, onu ləğv etdirsin. Halbuki o kəndlər bizimdir, ermənilər yandırıb, dağıtdılar...”

Bu sözləri Pravda.az-a sabiq deputat, politoloq Cümşüd Nuriyev Azərbaycan və Ermənistan arasında dövlət sərhədinin delimitasiyası və sərhəd təhlükəsizliyi məsələləri üzrə komissiyaların altıncı iclasında müvafiq razılaşmaların əldə edildiyi barədə iddiaları şərh edərkən deyib.

Politoloq düşünür ki, Azərbaycanla Ermənistan arasında delimitasiya-demarkasiya uzun çəkəcək: “Amma görüşlərin müsbət cəhəti bundan ibarətdir ki, ölkələr özləri öz problemlərini həll etməyə cəhd göstərirlər. İkincisi, bu, Azərbaycanla Ermənistan arasında çərçivə sazişinin imzalanmasına əsas yaradır. Ən azından çərçivə sazişi imzalanmalıdır, çünki delimitasiya-demarkasiya uzun çəkən prosesdir. Baxın, Azərbaycan 32 ildir, hələ Rusiya ilə sərhədlərini tam başa çatdıra bilmir. Delimitasiya-demarkasiya olunmayıb. Eyni zamanda Gürcüstanla da Keşişçidağda müəyyən problemlərimiz var. Çay yatağı yerini dəyişdiyinə görə gürcülər başqa şeylər iddia edirlər. Buna görə də proses uzun çəkə bilər. Üçüncüsü, uzun müddətdən sonra təmasın olması müsbət addımdır. İnanıram ki, heç kim lazım olmadan biz özümüz Ermənistanla çərçivə sazişi imzalaya biləcəyik”.

Aytəkin Qardaşova

Tarix: 1 Fevral 2024, 13:01

Xəbər lenti