Ülvi Qılınc: "Təəssüf ki, bəzi Xalq artistlərini sənətlərinə görə deyil, ayıb yerlərini nümayiş etdirdiyinə görə tanıdıq"

“Xalq artisti tanıyıram ki, 1991-ci ildə onun saçından tutub yerdə sürüyüblər. Böyük bir məclisdə süfrədə özünü tərbiyəsiz şəkildə apardığına görə bir şəxs onu saçından tutub sürüyüb. Onu həmin şəxsin əlindən alan, buna şahid olan adam da önəmli sənətkarlardan biridir, retro mahnıların ifaçısıdır, çox gözəl insandır. Adını çəkmək istəmirəm. Çox təəssüf edirəm ki, bu gün stolun üstündə çılpaq oynadılan "Xalq artisti"miz var...”

Bu sözləri Pravda.az-a müsahibəsində tanınmış opera müğənnisi Ülvi Qılınc deyib.

O bildirib ki, “Xalq artisti” adının məsuliyyətini, onu daşımağın nə demək olduğunu başa düşməyən adamlar var: “Təəssüf, sənətləri kimi düşüncələri də bayağı olduğuna görə heç vaxt başa düşə bilməyəcəklər ki, Xalq artisti fəxri adının içində nələr gedir. Bunların ağılları, şüurları Xalq artisti adını daşıyacaq qədər yoxdur. Çox istəyərdim ki, bu qəsbkar dırnaqarası xalq artistlərinin əlindən Azərbaycan musiqisini xilas etsinlər. Nə vaxt ki Azərbaycan musiqisi bunların əlindən qurtulacaq, onda bizim musiqimiz dünyaya çıxacaq. Nə qədər ki yalançı, yaltaq, ətrafındakı savadsız, bu sənətdən bixəbər olan adamlar bunların şənlərinə təriflər söyləyəcəklər, vay bu Azərbaycan musiqisinin halına. Bunlar özlərinə ad qoyurlar. Azərbaycanın dünya şöhrətli divaları var. Fatma Muxtarova kimi. O, əsrin əvvəlində yaşayıb, “Karmen”i ustalıqla, məharətlə ifa edən dünya şöhrətli xanım olub. Şöhrət ordenli SSRİ Xalq artisti Fidan Qasımova və Xuraman Qasımova kimi çox önəmli sənətkarlarımız var. Ümumiyyətlə, "diva" sözü operaya aiddir. Yəni nəhəng səs, mikrofonsuz oxuyan. Xalq artisti Qərinə Kərimova Böyük teatrda "Toska" oxuyub. Kimsə özünə "diva" deyir və dedizdirirsə, gülməlidir. Çıxıb "Toska" operasının xorunda “Soprano”nun partiyasını oxusunlar. Yəni onun girişinə girsələr, mən kimliyindən asılı olmayaraq, onlara "diva" deyəcəyəm. “Xalq artistləri”nin bəziləri özlərinə hörmət etməyənlərdir. Şəxsiyyəti olan qadın əzalarını reklam etməz. Evlərimizdə bunlar istənilməz qonaq olan adamlardır. Televizor evimizin içindədir, onlar da içində qonaq... Bunu hamıya şamil etmirəm. Bu istənilməz qadınlar əyinlərini soyunmaqla evlərimizə girirlər. Öz əzalarını nümayiş etdirirlər. Təəssüf ki, bəzi Xalq artistlərini sənətlərinə görə deyil, ayıb yerlərini nümayiş etdirdiyinə görə tanıdıq. Bunların şəxsiyyətləri zibil qutusu kimidir. Zibil qutusunun üstünə nə yazsan da, yenə zibil qutusudur. Bunlar Azərbaycan musiqisinin zibil qutusudurlar. İki santimetrlik səsləri ilə özünə "diva" deməklə diva olmur. Səsiniz iki santimetrdir! Xalq artisti Azərbaycan irsini, mədəniyyətini sənətində daşıyır. Balqabaq kimi boş başlarının düşüncəsi ora qədər deyil”.

Aytəkin Qardaşova

Tarix: 6 Fevral 2024, 17:49

Xəbər lenti