Vəhdət Partiyası: İlham Əliyevi növbəti möhtəşəm zəfəri münasibətilə ürəkdən təbrik edir, Azərbaycana sülh və səadət arzulayırıq

Vəhdət Partiyası növbədənkənar prezident seçkiləri ilə bağlı bəyanat yayıb.

Pravda.az-a daxil olan bəyanatda deyilir:

7 fevral tarixində ölkəmizdə keçirilən Prezident seçkiləri Azərbaycan torpaqlarının Ermənistan tərəfindən 30 ilə yaxın davam edən işğalına son qoymuş Vətən müharibəsindən sonra ilk dəfə olaraq Azərbaycanın bütün ərazisində baş tutmuşdur. Bu müstəqil Azərbaycanın tarixində yeni mərhələnin başlanğıcıdır deyə bilərik. Qarabağın və Şərqi Zəngəzurun azadlığı, böyük Zəfər və nəhayət Xankəndidə dalğalanan bayraq da onu sübut edir ki, Azərbaycan indi daha güclüdür və yenilməzdir.

Vəhdət Partiyası Azərbaycana qarşı artan qərəzli xarici təzyiqlər fonunda ölkəmizdə Prezident seçkiləri keçirilməsini və bunu bütün dünyanın gözü qarşısında azad, demokratik və şəffaf şəkildə təşkil olunmasını yüksək dəyərləndirmişdir. Seçki günü bir sıra seçki məntəqələrində və dairələrdə Partiyamızın müşahidəçiləri səsverməni yaxından izləmişdir. Onlar partiyamız tərəfindən təqdim edilmiş müşahidəçi anketlərini lazımi qaydada dolduraraq partiyanın qərargahına təqdim etmişlər. Partiyanın rəhbərliyi də seçkiləri müşahidəçi kimi canlı izləmişdir.

Birmənalı olaraq bəyan edirik ki, Prezident seçkiləri bütün demokratik dəyər və prinsiplərə uyğun şəkildə təşkil olunmuş, seçicilər çox aktiv şəkildə səsverməyə qatılmışdır. Seçki öncəsi təbliğat və təşviqat işləri üçün yaradılan imkanlar əslində seçkilərin tam demokratik və ədalətli şəkildə keçirilcəyinin zəmini olmuşdur. Partiyanın müşahidəçilərinin, həmçinin digər namizədlərin, beynəlxalq təşkilatların və xarici ölkələrin müşahidəçilərinin rəylərini ümumiləşdirsək, bu seçkilərin əsl Zəfər seçkisi olduğunu qətiyyətlə deyə bilərik. Çünki Respublikanın ən ucqar yaşayış məntəqəsində belə cavan-qoca, hər kəs seçki məntəqələrinə gəlmiş və Qalib ölkənin Prezidentini seçmək üçün tələsmişlər. Buna təkcə azərbaycanlılar və ölkəmizdə olan beynəlxalq müşahidəçilər deyil, bütün dünya şahid olmuşdur.

Seçkinin nəticəsində Azərbaycan xalqının müəzffər lideri İlham Əliyev yüksək faiz göstərici ilə seçicilərin etimadını qazanmışdır. Bu seçkilərin ədalətli nəticəsi ölkə Prezidenti tərəfindən son 20 ildə həyata keçirilən sosial, iqtisadi və siyasi islahatlara, hərbi qələbələrə geniş ictimai dəstəyin bariz göstəricisi olmuşdur. Vəhdət Partiyası adından İlham Əliyevi növbəti möhtəşəm zəfəri münasibətilə ürəkdən təbrik edir, Prezidentə yeni-yeni uğurlar, Azərbaycana sülh və səadət arzulayırıq".

Qeyd: Partiyanın sədri Milli Məclisin İnsan hüquqları komitəsinin sədr müavini Tahir Kərimlidir.

Tarix: 8 Fevral 2024, 09:50

Xəbər lenti