Saxtakarlığa yol verən bələdiyyə sədrinin cəzası ağırlaşdırıldı

Şəki Apellyasiya Məhkəməsində vəzifə səlahiyyətlərini aşma və vəzifə saxtakarlığında təqsirləndirilən Ərtoğrul Hüseynlinin barəsindəki hökmdən dövlət ittihamçısı tərəfindən verilən apellyasiya protesti və apellyasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Xəqani Səmədovun sədrliyi ilə keçirilən prosesdə qərar elan olunub.

Qərara əsasən, protest təmin edilib, təqsirləndirilən şəxs tərəfindən verilən apellyasiya şikayət təmin olunmayıb. Qəbələ Rayon Məhkəməsinin 02 oktyabr 2023-cü il tarixli hökmü apellyasiya protestinə münasibətdə dəyişdirilib. Ərtoğrul Hüseynlinin birini instansiya məhkəməsinin hökmü ilə təqsirli bilindiyi Cinayət Məcəlləsinin (CM) 309.1-ci (Vəzifə səlahiyyətlərini aşma) maddəsi ilə 4000 manat miqdarda cərimə cəzasına məhkum edilməsi ilə yanaşı, həmin Məcəllənin 46.2-ci maddəsi tətbiq edilməklə 1 il müddətinə dövlət və yerli özünü idarəetmə orqanlarında rəhbər və maddi-məsul vəzifə tutmaq hüququndan məhrumetmə növündə əlavə cəza, həmin hökmlə təqsirli bilindiyi CM-in 313-cü (Vəzifə saxtakarlığı) maddəsi ilə 3000 manat miqdarda cərimə cəzasına məhkum edilməsi ilə yanaşı həmin Məcəllənin 46.2-ci maddəsi tətbiq edilməklə 1 il müddətinə dövlət və yerli özünü idarəetmə orqanlarında rəhbər və maddi-məsul vəzifə tutmaq hüququndan məhrumetmə növündə əlavə cəza təyin olunub. Qəbələ Rayon Məhkəməsinin 02 oktyabr 2023-cü il tarixli hökmü ilə CM-in 66.2-ci maddəsinə əsasən, təyin edilmiş cəzaları tam toplamaq yolu ilə təqsirləndirilən şəxs qəti olaraq 7000 manat miqdarda cərimə cəzasının təyin edilməsi ilə yanaşı, CM-in 66.4-cü maddəsinə əsasən təyin olunmuş əlavə cəzaları qismən toplamaq yolu ilə qəti olaraq 1 il 6 ay müddətinə dövlət və yerli özünü idarəetmə orqanlarında rəhbər və maddi-məsul vəzifə tutmaq hüququndan məhrumetmə növündə əlavə cəza təyin edilib. Ərtoğrul Hüseynliyə CM-in 313-cü maddəsi ilə verilmiş ittihamlardan 10 fevral 2020-ci il, 19 may 2020-ci il, 19 fevral 2021-ci il və 4 oktyabr 2021-ci il tarixli ittihamlar üzrə cinayət məsuliyyətinə cəlb etmə müddətləri keçdiyindən həmin ittihamlar üzrə cinayət təqibinə xitam verilib.

İttihama görə, Ərtoğrul Hüseynli 2019-cu ildə keçirilən bələdiyyə seçkilərində iştirak edərək Qəbələ rayonu Kürd bələdiyyəsinə üzv seçilib. 03 fevral 2020-ci il tarixdə bələdiyyə üzvlərinin iştirakı ilə həyata keçirilən iclasda Qəbələ rayonu Kürd bələdiyyəsinin sədri seçilib və həmin dövrdən də öz fəaliyyətinə başlayıb. O, 2020-2023-cü illər ərzində bələdiyyə üzvlərinin məlumatı olmadan, bələdiyyə üzvlərinin ümumi yığıncağını çağırmadan, həmin müddətdə bələdiyyənin Qəbələ rayonu Kürd kəndində yerləşən inzibati binasında şəxsi niyyətlə, yəni torpaq sahələrinin icarəsini və satışını maneəsiz həyata keçirmək məqsədi ilə vəzifə saxtakarlığı yolu ilə hazırladığı formal iclas protokollarının gündəliyinə torpaq sahələrini salıb. Cinayət materiallarında göstərilib ki, Ərtoğrul Hüseynli hazırladığı formal iclas protokollarının gündəliyinə torpaq sahələrinin satılmasına dair məsələləri qeyd edərək bələdiyyə iclas katibinin əvəzindən imzalayıb.

İstintaq dövründə onun barəsində başqa yerə getməmək haqqında iltizam qətimkan tədbiri seçilib.

Bələdiyyə sədri məhkəmədə elan olunmuş ittihamda özünü qismən təqsirli bilib.

Kamal Məmmədov

Tarix: 29 Fevral 2024, 08:15

Xəbər lenti