Ekspert: “Sədərək”də Çin istehsalı kondisionerlər satılır, müştəriləri aldadırlar ki, guya “xarici brenddir, yaxşıdır...”

Yaz-yay mövsümü ilə əlaqədar olaraq istehlakçıların kondisionerlərə olan tələbatı artır. Sosial şəbəkələrdə kondisionerlərlə bağlı şikayətlərdən aydın olur ki, müştərilərin əksəriyyəti bazarda sahibkarla tərəfindən tez-tez aldadılırlar. Bəs istehlakçılar kondisioner alan zaman nələrə diqqət etməlidirlər?

Məişət texnikası təmiri servisinin müdiri Xaliq Abdullayev Pravda.az-a açıqlamasında deyib ki, müştərilərin çoxu kondisionerlərin ucuz olması səbəbindən “Sədərək” ticarət mərkəzinə üz tutur: “Orada Çin istehsalı olan kondisionerlər satılır, amma müştəriləri aldadırlar ki, guya “xarici brenddir, yaxşıdır”. Məsələn, müştəri deyir ki, evim 45 kvadratmetrdir, hansı kondisioner məsləhətlidir? Satıcı ucuz olması üçün 45 kvadratmetrlik mənzil üçün nəzərdə tutulan kondisionerin əvəzinə, 30 kvadratmetrlik verir. Yaxud bəzi müştərilər deyirlər ki, evimiz 80 kvadratmetrdir. Satıcı 80 adı ilə 40 kvadratmetrlik kondisioner verir ki, qiymət ucuz olsun. Keyfiyyətsiz kondisionerlərdən yaxşı pul qazanırlar deyə müştəriyə çox tərifləyirlər. Hazırda bazarda imkanı olan gedib ölkəyə kondisioner gətirir, hərəsi bir addadır. Hər gün bir ad çıxır. Sahibkarın imkanı var, zavodla danışır, deyir ki, “mənə 500 ədəd kondisioner göndər, filan adda olsun”. Bəzi kondisionerlərin içində motorları kiçikdir, göstərilən ölçülərdə deyil. Halbuki üzərində yazılır ki, 9000-12000 BTU-dur. Bu gücə aid olan isə yoxdur. Ancaq stentə qoyub yoxlayandan sonra bilinir ki, kondisioner həqiqətən lazım olan ölçüyə uyğundur, ya yox. Yalançı çoxdur. Yazıb istədikləri göstəriciləri üstünə yapışdırırlar. Tövsiyə edirik ki, alıcılar kondisonerin markasını, brendin hara məxsus olduğunu, gücünü internetdə araşdırsınlar. İnternetdə istədikləri kondisionerin istehsal yerinin, zavodunun həqiqətən mövcud olub-olmadığını öyrənsinlər”.

Onun sözlərinə görə, müştəri keyfiyyət göstəriciləri sırasında kondisioneri istehsal edən ölkənin hara olduğuna və adına baxmalıdır: “Məsələn, “Gree” yaxşı firmadır, bazarda özünü tanıdıb. İnternetdə haqqında bütün məlumatlar çıxır. Adlarını çəkmək istəmirəm, bir neçə firma var ki, adlarını internetə yazanda heç bir istehsalçı ölkə çıxmır. Tutaq ki, kondisionerin adı “Vəliməmməd”dir. Üzərində bütün nominalları yazıblar - 30 kvadratmetr sahəni qızdırmalı, yaxud soyutmalıdır. Göstərici kimi 9000 BTU da qeyd olunub, amma bu kondisioneri söküb içinə baxdığımız zaman görürük ki, 9000 BTU deyil. İçindəki kompressor 7000-8000 BTU-dur. Yəni alıcı baxsa belə, heç nə ayırd edə bilməz, çünki alıcı söküb içinə baxmır. Məsələn, internetə “Fuji” yazsanız, hər hansı saytda onun barəsində məlumat çıxacaq. İstehlakçılar işığa qənaət etmək istəyirlərsə, üzərinə “inverter” sözü yazılan kondisionerlərdən alsınlar. Bu cür kondisionerləri yalnız rəsmi mağazalar gətirir. Hər hansı bazara çıxmış “brend” inverter məhsulu gətirə bilmir. Doğrudur, sadə kondisionerlərlə müqayisədə 100-200 manat qiymət fərqi var, amma işığa çox qənaət edir. Özünü tanıtmış firmalarında hamısında “inverter” sözü var. Yeri-yurdu, istehsal ölkəsi bəlli olmayan kondisionerlər isə bunu edə bilmirlər”.

Aytəkin Qardaşova

Tarix: 2 Aprel 2024, 13:59

Xəbər lenti