Mirşahin Ağayev: "Bunu edə bilməyəcəyiksə, qələbə bizə haram olsun, burnumuzun deşiyindən gəlsin"

“Covid-19 dönəmində məni ən çox narahat edən şey körpə uşaqların maska ilə dərsə getmələri idi. Çünki onların ciyərlərinin formalaşmaq vaxtıdır, amma biz o maskalarla uşaqların ağciyər imkanlarını xeyli məhdudlaşdırdıq. Sanki 30 il bu uşaqları da Covid-19-la maskalayıblar, indi isə ciyərləri balacalaşıb, “Qarabağ” futbol klubunun həyəcanını qəbul etməyə gücü çatır, amma daha böyük qələbəni tam mənası ilə qəbul edə bilmirlər. Belə bir həyəcan yaranan kimi Azərbaycan Prezidentinə qulaq asmaq lazımdır. Azərbaycan Prezidenti 10 milyonun hamısının əvəzinə elə mükəmməl sevinir ki...”

Pravda.az xəbər verir ki, bu sözləri Real Təhlil İnformasiya Mərkəzinin (REAL TV) direktoru Mirşahin Ağayev “Otuz plus” "Youtube" kanalına müsahibəsində deyib.

“Sizin yanınızda insan olmasa, insan kimi böyüməyəcəksiniz. Şirin yanında böyüsəniz, şir kimi böyüyəcəksiniz. İnsanların böyüməsi üçün birinci növbədə şəxsiyyət mövqeyi lazımdır ki, qələbəyə “qələbə” deməkdən çəkinməyəsən. Sən yalançı “giləmeyvələr” düşünməli deyilsən. Sənin əlinin altında Azərbaycan tarixinin yüz illərlə gözlədiyi qələbə var. Qurban Qurbanov Azərbaycanın çox böyük məşqçisidir. Qurbanov və komandası qələbəmizin defisit vaxtı bizə fraqment-fraqment, 45 dəqiqə-45 dəqiqə, bəzən 120 dəqiqə, penalti-penalti qələbə ovqatı aşılayıb”, - M.Ağayev qeyd edib.

Jurnalist 1990-cı illərin əvvələrini xatırladıb: “1991-ci ildə SSRİ mövcud idi. O vaxt biz jurnalistlərdən tələb edirdik ki, neytral ol, mövqe, münasibət bildirmə. SSRİ dağılmalı və biz müstəqil olmalı idik. Qarabağ Xalq Yardım Komitəsinin “Azərbaycan” qəzetinin üstündə şüar var idi – Azərbaycanın birliyi və suverenliyi. Biz bütün ölkələr kimi “birləşin” cümləsini yazmamışdıq. Bax, onda SSRİ-nin dağılmasına şərait yaradırdıq. İndi isə jurnalistikada mövqe olmalıdır, çünki artıq mövqesizlik Azərbaycanın dayaqlarına zərbə vurur. Hər bir özünə hörmət edən, özünü tanıyan jurnalist mövqeyi ilə ortalığa çıxmalıdır. Deməlidir ki, Azərbaycanın ərazi bütövlüyünü, dövlət suverenliyini qazanmış şəhidlərin qabağında mənim can, vicdan borcum var. Cənab İlham Əliyevin - Azərbaycanın birinci döyüşçüsünün, xalqının döyüşçülərinin yanında olmaq bir şərəf işidir. Bu gün özünə hörmət edən Azərbaycan vətəndaşı öz ailəsinin şərəfini qoruduğu kimi Prezident İlham Əliyevin də ailəsinin şərəfini qorumalıdır. Prezidenti, Birinci xanımı və onun ailəsini öz ana-atası, bacı-qardaşı, övladı kimi qorumalıdır. Bunu edə bilməyəcəyiksə, qələbə bizə haram olsun, burnumuzun deşiyindən gəlsin!”

Aytəkin Qardaşova

Tarix: 4 Aprel 2024, 13:43

Xəbər lenti