Elman Nəsirov: "Seçkini niyə təhlükəsizliklə bağlı məhdudiyyətlər olduğu zamana salmalıyıq?"

“Yeni Azərbaycan Partiyasının İdarə Heyəti iyunun 20-də keçirilmiş iclasında zamanın tələbi olaraq belə qərara gəldi ki, ölkədə növbədənkənar parlament seçkilərinin keçirilməsi vacibdir. Seçkilər mühüm siyasi hadisədir. Həm də seçkilərin keçirilmə vaxtı 2024-cü ilin noyabr ayının 3-nə düşür. Noyabrın 11-də isə Azərbaycan digər mötəbər beynəlxalq tədbirə ev sahibliyi edəcək. Təxminən, iki həftə dünyanın ürəyi Bakıda döyünəcək. 80 mindən artıq insan, əksər dövlətlərin siyasi liderləri Bakıda olacaq. Belə olan vəziyyətdə hər iki tədbirin xüsusi əhəmiyyətini nəzərə alsaq, onların eyni vaxtda keçirilməsi mümkünsüzdür. Buna görə də parlament seçkilərinin önə çəkilməsi vacib məsələyə çevrilir. Nəzərə alsaq ki, fevralın 7-də prezident seçkiləri ilk dəfə ölkə ərazisini tam əhatə etdi. Parlament seçkiləri də bütün ölkə ərazisində keçiriləcək. İşğaldan azad olunmuş Qarabağda, Şərqi Zəngəzurda seçkilər keçiriləcək. Bu da tarixi zəfərimizin daha da legitimləşməsi mənafeyinə xidmət göstərir. Bütün dünya bu reallığı qəbul edir. Belə bir addımın atılması tam qanunidir, hüquqidir. Burada heç bir qanun pozuntusu yoxdur. Müxalifət buna isə başqa prizmadan yanaşmaq buna istəyir. Deyir ki, “COP29 nə olsun var, məgər COP olanda parlament seçkiləri keçirmək olmaz?” Bəli, olmaz”.

Bu sözləri Pravda.az-a açıqlamasında Milli Məclisin deputatı Elman Nəsirov deyib.

“Müxalifət yenə öz köhnə ampluasındadır. Yenə də ancaq ittiham etsin, kimisə günahlandırsın, hər mühüm siyasi hadisəyə öz baxış bucağından yanaşsın. Açıq desək, yenə siyasi hoqqabazlıqla məşğul olsun. Üzümü tutub onlara söyləyirəm ki, biz demokratik inkişaf yolu seçmiş dövlətik. Nəzərə alsaq ki, bütün dünyanın Bakıya toplaşacağı bir reallıqda təhlükəsizlik tədbirlərinin təminatı bir nömrəli vəzifəyə çevrilir. Təhlükəsizlik tədbirləri isə müəyyən məhdudiyyətləri özündə ehtiva edəcək. Məhdudiyyətlər müəyyən mənada demokratiyanın əleyhinədir. Seçki isə demokratiyanın ən mühüm atributudur. Biz niyə seçkini təhlükəsizliklə bağlı məhdudiyyətlər olduğu zamana salmalıyıq? Buna yol vermək olmaz. Çünki biz demokratik ölkəyik. Müxalifətin bu fikirləri siyasi boşboğazlıqdan başqa bir şey deyil. Ağıllarını başlarına yığsınlar. Seçkiyə hazırlaşsınlar, seçkidə iştirak etsinlər. Güclərini ortaya qoysunlar. Əgər o gücləri varsa... Sosial bazalarını müəyyən etsinlər. Görsünlər ki, bazaları var, ya yox. Bundan unikal şans olmaz ki. Demirlər, ”xalq bizi sevir, arxamızdadır, bizi dəstəkləyir?” Gəlsinlər, seçkidə iştirak etsinlər. Görsünlər ki, xalqın dəstəyi hansı səviyyədədir. Biz bilirik dəstəyin hansı səviyyədə olacağını. O dəstək yoxdur. Bunlar özləri özlərini boykot etmiş düşərgənin təmsilçiləridirlər. Yenə də suyu bulandırmaqla məşğuldurlar. Bulanıq suda balıq tutmaq siyasəti həyata keçirirlər. Hamısı nonsesdir. Seçkilər ən yüksək səviyyədə keçiriləcək. Güclü olan qalib gələcək. Nəzərə alsaq, ulu öndər Heydər Əliyevin yaratdığı siyasi partiya olan Yeni Azərbaycan Partiyası cəmiyyətimizin, siyasi sistemimizin avanqardıdır. Xalq 1995-ci ildən bəri bütün seçkilərdə məhz YAP təmsilçilərinin leyhinə səs verib. Buna görə müxalifətin bu davranışı tənqidə belə dözmür”, — deputat bildirib.

Aytəkin Qardaşova

Tarix: 22 İyun 2024, 11:30

Xəbər lenti