Bakıda qətl törədən şəxs musiqiçi olub? - MƏHKƏMƏ

Bakı Ağır Cinayətlər Məhkəməsində qətl törətməkdə təqsirləndirilən Rəsul Ağazadənin cinayət işi üzrə məhkəmə ifadəsi məlum olub.

Pravda.az-ın əldə etdiyi məlumata görə, hakim Leyla Əsgərovanın sədrliyi ilə keçirilən prosesdə o, elan edilmiş ittiham üzrə özünü təqsirli bilməyib.

O qeyd edib ki, musiqi ilə məşğul olub, zərərçəkmiş Namik İsrafilov da müğənni imiş, ”Youtube”da mahnıları var: “Namiklə tanışlığım musiqi fəaliyyəti ilə əlaqədar olub. Mərhum mənə ifa etmək üçün musiqi tapmağımı xahiş etmişdi. Hətta onunla birlikdə səs yazma studiyasına da getmişdik. Lakin Namikin əlində pul olmadığından işə başlaya bilmədik. Həmin səs-yazma studiyasına 2-3 dəfə gəlib-getmişdik. Sonralar Namiklə şəhərdə rastlaşdıq və o, məndən səsyazma studiyasında işləyib-işləmədiyimi soruşdu, ona nömrəmi verdim. Namiklə yenidən səsyazma ilə məşğul olmaq barədə razılaşdıq. Sonra onun evinə getdim. Evdən çıxmaq üçün hazırlaşan zaman Namik məndən Dərnəgüldə qalıb-qalmadığımı, həmçinin ona narkotik vasitə verən Fuad adlı şəxsi tanıyıb-tanımadığımı soruşdu. Ona Dərnəgüldə qaldığımı və Fuadı tanıdığımı bildirdi. Fuadla aralarında əvvəllər bıçaqlanma hadisəsi ilə bağlı münaqişə olduğunu, onunla barışsa da Fuad Namikə qarşı acıqlı olduğunu söylədi. Fuadın nömrəsini Namikdən alaraq ona zəng etdim və nə üçün “bariqalıq” etdiyini soruşdum. Daha sonra Fuad məndən harada olduğumu soruşdu. Ona Namikgildə olduğumu bildirdim. Fuad ora gələrək aramızda olan söhbəti niyə hamıya yaydığını dedi. Əlindəki açarla qapını bağladı və mənə tərəf gələrək bıçağı üzərimə çəkdi. Fuad qışqıranda Namik ortaya girdi və bıçaq onun boğazına dəydi. Namik boynunu tutub otaqda ora-bura qaçmağa başladı. Öz telefonum sönülü olduğundan Namikin telefonunu götürüb təcili tibbi yardıma zəng etmək istədim. Telefonu götürən zaman Fuad üzərimə gəldi. Ona polisə yığmadığını, təcili tibbi yardıma zəng etdiyimi desəm də, baş vermiş mübahisə zəminində Fuada yumruq və təpik vurdum, yerə yıxıldı. Əl izimin qalmaması üçün bıçağa toxunmadım, evin pəncərəsindən özümü çölə atdım. Hadisənin şokunda olduğum üçün, həm də telefonda parol olduğundan təcili tibbi yardıma zəng etməyi unutdum. Hadisədən sonra Namiki yoxlamağa gəldim. Lakin qapını açan olmadı. Telefon da üzərimdə qalmışdır. Hadisə barəsində heç kimə məlumat vermədim. Daha sonra axtarışda olduğumdan xəbərdar oldum”.

Qeyd: Cinayət hadisəsi 2023-cü ilin aprelində Bakının Nərimanov rayonunda, zərərçəkmiş şəxsin yaşadığı evdə baş verib.

Məhkəmədə cinayətin tamah niyyəti ilə törədildiyi məlum olub. Rəsul Ağazadə Namik İsrafilovu qətlə yetirdikdən sonra ona məxsus iki ədəd mobil telefonu götürərək hadisə yerindən uzaqlaşıb.

Təqsirləndirilən şəxs daha sonra bu telefonlardan birini 60 manata satıb və pulu şəxsi ehtiyaclarına sərf edib.

Məhkəmənin hökmü ilə Rəsul Ağazadə 16 il 6 ay müddətinə azadlıqdan məhrum edilib.

Kamal Məmmədov

Tarix: 26 İyul 2024, 09:47

Xəbər lenti