Namizədliyini geri götürən vəkil: “Cavid Qurbanova da barışıq əlimi uzatdım, lakin...”

Məlum olduğu kimi, avqustun 9-dan etibarən növbədənkənar parlament seçkiləri ilə əlaqədar seçkiqabağı təşviqat başlayıb. Təşviqat ərəfəsində ən çox müzakirə olunan məsələ seçkilərə namizədliyini irəli sürüb, sonradan geri götürən şəxslərdir. Onların arasında tanınan adların olması isə birmənalı qarşılanmır.

Pravda.az xəbər verir ki, seçkilərə namizədliyini geri götürənlərdən biri də Vəkillər Kollegiyasının üzvü Əziz Qənbərli olub.

Onun namizədliyini geri götürməsi barədə açıqlaması müzakirə yaradıb.

Ə.Qənbərli namizədliyini geri götürməsini belə əsaslandırıb:

“Mən 2020-ci ildə Kəlbəcər rayonundan deputatlığa namizəd oldum. Sizin hər birinizin dəstəyi ilə uğurlu nəticə də əldə etdim. Təvəzökarlıqdan uzaq olsa da, deyim. Vəkillik fəaliyyətimin bütün dövrlərini təhlil edərkən görürəm ki, mənim vəkil olaraq xalqımıza xidmətim deputat xidmətindən heç də az olmayıb. Bu seçki prosesi başlamazadan əvvəl bəzi hörmətini saxladığım ziyalılarımıza müraciət etdim ki, mən vəkil peşəsində onsuz da hər bir kəlbəcərlinin vəkiliyəm,sizdən biriniz seçki prosesinə qoşulun və cənab Prezidentimizin başlatdığı demokratik islahatlara birlikdə dəstək verək. Və bunun üçün 20 gündən çox gözləmə mövqeyində oldum. Lakin üzdə olan heç bir kəlbəcərli ziyalımız bu prosesə qoşulmadı. Hər kəsin öz fikri var və bu fikirlərə də hörmətlə yanaşıram. Namizədliyimi qeydə aldıqdan sonra da hər bir ziyalmıza, hətta bugünədək tənqid etdiyim Cavid Qurbanova da barışıq əlimi uzatdım ki, Kəlbəcər naminə bir olaq, bərabər olaq. Lakin son günlər sadə kəlbəcərliləri yox, öz şəxi mənafelərini üstün tutan bəzi insanların yazdıqları və araqızışdırıcı postlar paylaşması məni incidir. Mən hər bir kəlbəcərlinin vəkili olmaq arzusunda olduğuma görə, dövlətimin və xalqımın mənafeyi mənim şəxsi mənafeyimdən qat-qat üstündür. Mən ailəmdə də tərbiyəni bu cür görmüşəm. Buna görə də hesab edirəm ki, sizin üçün daha yaxşı vəkil ola biləcəyim yer Milli Məclisdən çox hələlik Vəkillər Kollegiyasıdır. Kollegiyanın üzvü olmağım daha məqsədə uyğundur. Buna görə də 1 sentyabr 2024-cü il tarixinə təyin edilmiş seçkilərdə namizəd olaraq iştirak etməkdən imtina etmək qərarına gəlmişəm. Mən və ailəm hər zaman Azərbaycan xalqı qarşısında müstəsna xidmətləri olmuş ümummili lider Heydər Əliyev siyasətinin daima dəstəkçisi olacağımı, Müzəffər Ali Baş Komandan cənab İlham Əliyevin bütün siyasi kursuna sadiq olacağımı bəyan edərək bildirirəm ki, seçkidə bu siyasi kursu daha yaxşı hansı namizəd təbliğ edəcəksə, mən səsimi ona verəcəyəm. Çünki Kəlbəcəri və işğal altında olan torpaqları azad edən siyasi kursa dəstək olmaq hər bir vicdanlı vətəndaşın borcudur. Mən yenə də hər birinizin təmənnasız vəkili olmaqda davam edəcəyimə sizi əmin edirəm”.

Aytəkin Qardaşova

Fotoları təqdim edirik