Ağsudan deputatlığa namizəd: "Həllinə nail olduğumuz məsələlər çox olub"

Milli Məclisə keçiriləcək növbədənkənar seçkilərdə 90 saylı Ağsu seçki dairəsindən deputatlığa namizəd Kənan Kərimovun Pravda.az-a müsahibəsi:

- Növbədənkənar seçkilərə qatılmaq, deputat seçilmək istəyi ilə bağlı qərarı nəyə əsasən qəbul etdiniz?

- Sizin də bildiyiniz kimi mən artıq 4 ilə yaxın müddətdir ki, AR Milli Məclisinin İnsan Hüquqları Komitəsinin sədr müavini, Millət vəkili Tahir Kərimlinin köməkçisi işləyirəm. Özümü bu sahədə kifayət qədər təcrübəli hesab edirəm. Milli Məclisin işçisi kimi MM-də baş verən proseslərə dərindən bələdəm. Qanunların komitələrdə, istərsə də iclaslarda hazırlanmasında Tahir Kərimlinin köməkçisi kimi iştirak etmişəm. Namizədlərin arasında parlamentdə fəaliyyət göstərmək üçün özümü daha hazır hesab edirəm. Yuxarıda qeyd etdiyim səbəblər və dövlət başçısının gəncləşmə siyasətinə uyğun olaraq, Vəhdət Partiyası gənc kadr kimi 90 saylı Ağsu seçki dairəsindən namizədliyimi irəli sürüb.

- Namizədlər adətən əvvəlki illərdə deputat olanları tənqid edirlər ki, iş görməyiblər. Namizəd olduğunuz 90 saylı Ağsu seçki dairəsinin deputatı Tahir Kərimlidir. Dairədəki fəaliyyəti Sizi qane edirmi?

- Tahir Kərimlinin köməkçisi kimi deyə bilərəm ki, fəaliyyətdə olduğumuz müddətdə həllinə nail olduğumuz məsələlər çox olub. Mən də bu kursu inamla davam etdirəcəyimə əminəm. Qarşıda məqsədlərimiz çoxdur. Onların arasında rayon ərazisində peşə məktəbi və ya kollecin açılması, kəndlərdə tibb məntəqələrinin, içməli suda olan problemin həlli, Vətən Müharibəsi iştirakçılarına diqqət və qayğının artırılması, rayon əhalisinin sosial rifahının yaxşılaşdırılması və s. kimi məsələlər var.

- Azərbaycan siyasətində yeni simasınız. Siyasi durumu necə qiymətləndirirsiniz?

- İllərdir ürəyimizi sıxan, mənliyimizi boğan Qarabağ kimi böyük bir problemimiz var idi, amma bu gün şükürlər olsun ki, Ali Baş Komandan və xalq birliyi sayəsində biz bu problemin həllinə nail olduq. Bununla yanaşı Qoşulmama Hərəkatının 120 üzv dövlətinin təkrar xahişi ilə Azərbaycan Prezidentinin bu hərəkata yenidən sədrlik etməsi, dünyanın ən böyük II tədbiri olan COP 29-un keçirilməsinin Azərbaycana etibar olunması, Azərbaycanın Avropada enerji təminatçılarının əsas simalarından birinə çevrilməsi, Azərbaycanın əyalət yox, regionun lider dövlətinə çevrilməsi, dünyanın iki nəhəng dövləti – Çin və Rusiya ilə strateji müqavilələrin imzalanması və s. bu kimi önəmli hadisələr dövlətimizin nailiyyətləri sırasındadır.

- Siyasi iddianızı ortaya qoyduqdan sonra belə fikirlər yarandı ki, Vəhdət Partiyası gənclərə yol açır. Ola bilərmi ki, növbədənkənar parlament seçkilərin qərarından asılı olmayaraq Vəhdət rəhbərliyinə gələsiniz?

- Vəhdət Partiyası dövlət siyasətinə uyğun olaraq gəncləşdirmə siyasəti aparır. Partiya qurultayında namizədliyim irəli sürülərsə, niyə də olmasın?!

Tarix: 15 Avqust 2024, 10:52

Xəbər lenti