Sosial şəbəkələrdə təbliğatı aparılan “qanqal”ın görün necə faydaları var? - Xərçəngi məhv edir, qaraciyəri yeniləyir...

“Qanqal bitkisinin xeyli sayda növləri var. Tibbdə isə daha çox hallarda iki növündən - ala və yastı qanqaldan istifadə olunur. Ala qanqal, rus dilində "rastoropşa" məşhur bitkidir. Əsasən, qaraciyər xəstəliklərində istifadə olunur. Təsiredici maddəsi silimarindir. Silimarin bir maddə deyil. Silimarinə “qaraciyərə fayda verən bütün maddələrin toplusu” demək olar. Qaraciyərə hepatoprotektor təsir edir, yəni qaraciyər toxumasını sürətli şəkildə yeniləyir. Hansısa xəstəlikdən sonra, yaxud daim alkoqol içənlərdə, çox şirniyyat yeyənlərdə qaraciyər zədələnir, toksikliyi artır. Bütün bunların qarşısını almaq üçün silimarin ən gözəl və elmdə sınanmış maddədir”.

Bu sözləri Pravda.az-a açıqlamasında Herba Flora şirkətinin təsisçisi, Herba Medical Tibb Mərkəzinin baş həkimi, məşhur fitoterapevt həkim Fizuli Hüseynov deyib.

Fizuli Hüseynov: “Buzu qırıb çimən xəstələrim əvvəl özlərini çox sağlam hiss ediblər, sonda böyrəkləri tam sıradan çıxıb” Pravda.az

Həkim bildirib ki, silimarinin ən çox hissəsi ala qanqalın toxumlarında olur: “Təkcə qaraciyər xəstəliklərində faydalı deyil, eyni zamanda öd istehsalını artırır. Bu maddə insan bədənində köpü, qəbizliyi aradan qaldırır, həzmi yaxşılaşdırır, Normalda insanda bir gündə bir litrə qədər öd istehsal olunur, onikibarmaq bağırsağa tökülür. Bəzilərində miqdar zəif olur, buna görə də həmin insanlarda köp və qəbizlik yaranır. Ancaq ala qanqaldan mütəmadi istifadə nəticəsində öd istehsalı artır, ödün tərkibi durulaşır, öd yollarında əmələ gəlmiş daş, palçıq, qum təmizlənir, bağırsaqların hərəki funksiyası da artır. Silimarinin dəriyə də xeyri var. Uzun müddət, təxminən, 1 ay istifadə etdikdən sonra dəri rəngi gözəlləşir, təravətlənir. Bunlardan əlavə, çox güclü antioksidantdır. Yəni bizi sistem xəstəliklərindən qoruyur, xərçəngin ilkin simptomlarını öldürür, xərçəng xəstəliyi riskini azaldır, beyin qan dövranını da yaxşılaşdırır. Xolesterin və xolesterinin bütün ziyanlı səbəblərinin aradan qalxmasına səbəb olur”.

F.Hüseynov deyib ki, ikinci qanqal növü istifadə etdilən yastı və ya yatıq qanqal kimi tanınan növdür: “Buna rus dilində "çereda" deyirik. Əsasən dəri xəstəliklərində - dəri səpmələrində, diatezlərdə, ekzemalarda, dəri yaralarında istifadə olunur. Məsələn, yeni doğulmuş uşaqların yanında yaralar, sifətində diatezlərə məxsus səpgilər əmələ gəlir. Bu kimi hallarda yatıq qanqal suyu ilə uşağı, yaxud böyükləri də çimizdiririk. İki xörək qaşığı yatıq qanqalı 1 stəkan suda dəmləyirik. Sonra həmin suyu 1 litr suda durulaşdırırq. Yeni doğulan uşağı çimizdiririk. Böyüklər üçün isə 3 xörək qaşığı yatıq qanqalı iki stəkan suda dəmləyirik. Pambığı batırıb yara, ekzema olan nahiyələri gün ərzində 5-6 dəfə silirik. Böyüklərdə adən qarın boşluğunda çoxlu səpgilər olanda həddindən artıq ağrı verə bilir. Bunun da aradan qalxmasında yatıq qanqal bitkisindən istifadə edirik”.

Qeyd: Sentyabrın 1-də keçiriləcək növbədənkənar parlament seçkilərində 70 saylı Neftçala seçki dairəsindən namizəd olan Vətəndaş Həmrəyliyi Partiyası sədrinin müşaviri Tənzilə Rüstəmxanlı "Önümə dikilən qanqallara görə Neftçaladan vaz keçərmiyim?" ifadəsinə görə sosial şəbəkələrdə tənqid hədəfinə tuş gəlib. Bir çoxları T.Rüstəmxanlını qanqalın faydalarını bilmədiyi üçün qınayıb.

Aytəkin Qardaşova

Tarix: 28 Avqust 2024, 10:49

Xəbər lenti