Azərbaycanın BRICS-ə üzvlüyü heç bir halda üçüncü tərəfi hədəfə almayıb - AÇIQLAMA

“Azərbaycan da BRICS-ə üzv olmaqla bağlı niyyətini ortaya qoyub. Biz çoxtərəfliliyin, beynəlxalq hüququn norma və prinsiplərinin işləməsinin tərəfdarıyıq. Öz fəaliyyətimizdə də bunu sübut edirik. Azərbaycanın BRICS-ə üzvlüyü heç bir halda üçüncü tərəfi hədəfə almayıb. Biz istəyirik ki, beynəlxalq münasibətlər sistemində tarazlıq olsun. Bu, pozularkən başqa bir güc mərkəzi onun müdafiəsinə qalxsın. Beləliklə, Azərbaycanın BRICS-ə üzvlüklə bağlı niyyətini ortaya qoyması tam anlaşılandır”.

Bu sözləri Pravda.az-a açıqlamasında Milli Məclisin deputatı Elman Nəsirov deyib.

Deputat bildirib ki, beynəlxalq təhlükəsizlik sistemində artıq keyfiyyət dəyişikliyi baş verməkdədir: “Birqütblü dünyadan çoxqütblüyə keçid prosesi yeni mərhələyə daxil olub. İndi artıq kollektiv Qərb və onun qarşılığında qlobal Cənub var. Dünya beləcə çoxqütblülüyə bölünməkdədir. Yeni reallıq ABŞ və onun müttəfiqlərinin geostrateji maraqlarına ziddir, çünki soyuq müharibə dövrü başa çatdıqdan sonra ABŞ başda olmaqla, kollektiv Qərb hegemon qüvvə kimi çıxış edirdi. İndi isə bu reallıq dəyişib, yeni güc mərkəzləri formalaşır. Belə güc mərkəzlərindən biri də BRICS-dir. Əslində vahid güc mərkəzinin olması beynəlxalq hüququn, onun norma və prinsiplərinin pozulmasına gətirib çıxaran hadisədir. Gərək, həmişə hər şeydə bir balans, tarazlıq olsun. Bu nöqteyi-nəzərdən BRICS-in yaranması dünyada gedən siyasi proseslərin məntiqi sonluğu idi. Belə də olacağı planlaşdırılırdı. Bu reallıqlar fonunda Türkiyə Prezidenti Rəcəb Tayyib Ərdoğan da BRICS sammitində iştirakla bağlı Rusiya tərəfinin dəvətini qəbul edib. Bu da Türkiyənin formalaşmaqda olan yeni beynəlxalq münasibətlər, yeni koordinatlar sisteminə baxışının nəticəsidir. Türkiyə fərqindədir ki, bu gün qlobal proseslər gedir. Soyuq müharibədən sonrakı dövrün ənənəvi beynəlxalq münasibətlər sistemi indi artıq çökür, əvəzlənməkdədir. Bu əvəzlənmə prosesində Türkiyə fərqindədir ki, BRICS güc mərkəzidir və bu güc mərkəzi ilə səmərəli əməkdaşlıq Ankaranın strateji maraqlarına uyğundur. Türkiyə həm də NATO ölkəsidir. Bu baxımdan da tarazlığın gözlənilməsində maraqlıdır. Türkiyənin BRICS-də iştirakı heç də NATO-nun norma və prinsiplərinin əleyhinə olması anlamında deyil. Bir təşkilatda ki beynəlxalq hüququn norma və prinsiplərinin qorunmasına, müdafiəsinə çağırışlar var, bu istiqamətdə addımlar atılır. Bu həm də Türkiyənin xarici siyasətinin ana xəttini təşkil edir. BRICS-in güc mərkəzi kimi səmərəlilik və cəzbedicilik əmsalı kifayət qədər böyükdür”.

Aytəkin Qardaşova

Tarix: 4 Sentyabr 2024, 12:40

Xəbər lenti