Azərbaycanlılar qoca ruslarla evlənə bilməyəcəklər

Rusiya prezidenti Vladimir Putin əcnəbilər yalnız Rusiya vətəndaşı ilə üç illik nikahdan sonra sadələşdirilmiş qaydada müvəqqəti yaşayış icazəsi ala biləcəkləri qanunu imzalayıb.

Müvafiq qanun miqrantlarla saxta nikahlara qarşı mübarizəyə yönəlib. İndiyədək qanunvericilik sadələşdirilmiş qaydada müvəqqəti yaşayış icazəsi almaq üçün müraciət üçün nikahda olma müddətini müəyyən etməyib.

Yada salaq ki, Dövlət Dumasının qəbul etdiyi “Rusiya Federasiyasından çıxmaq və Rusiya Federasiyasına gəlmək qaydası haqqında” və “Rusiya Federasiyasında xarici vətəndaşların hüquqi statusu haqqında” qanunlara dəyişikliklər edilir. Sənəddə qeyd olunur ki, əcnəbilər bəzən miqrasiya statusu almaq və real ailə qurmaq niyyəti olmadan belə nikahlara əl atırlar ki, onların sırasında azərbaycanllılar da az deyildi.

Məsələn, bir müddət əvvəl Rusiya prokurorluğu 50 yaşlı Azərbaycan vətəndaşı ilə 71 yaşlı Çerepovts sakini arasında saxta nikah faktını aşkarlamışdı. Azərbaycanlı vətəndaşlıq almaq üçün sənədlərini müvafiq dövlət orqanına təqdim etdikdən sonra yoxlama aparılıb. Məlum olub ki, kişi qadınla iş yerində, kolxoz bazarında tanış olub və VVAQ idarəsində nikaha daxil olub.

Yoxlama zamanı məlum olub ki, Azərbaycan vətəndaşı qadına saxta nikah qurmağı təklif edib, bunun müqabilində isə “həyat yoldaşını” maddi cəhətdən təmin etməyi öhdəsinə götürüb. O, bu vədini yerinə yetirib.

Məlum olub ki, cütlük heç vaxt eyni ünvanda yaşamayıblar. Nikah ailə qurmaq məqsədilə bağlanmayıb. Ona görə məhkəmə azərbaycanlı ilə Çerepovts şəhər sakini arasında bağlanmış nikahı etibarsızlaşdırıb.

Daha bir azərbaycanlı gəncin isə Rusiya vətəndaşlığını almaq üçün pula ehtiyacı olan öz həmyaşıdı olan qızla saxta evliliyə imza atdığı da ortaya çıxmışdı. 19 yaşlı azərbaycanlı Rusiya vətəndaşı olan həmyaşıdı ilə ailə qurub. Bununla da, o, öncə Rusiya ərazisində müvəqqəti, daha sonra isə uzunmüddətli yaşama icazəsi əldə edib.

Qeyd olunur ki, Azərbaycanlı gənc qıza saxta nikah müqabilində 15 min rubl ödəyib. Cütlüyün heç vaxt bərabər yaşamadığı bildirilir. “Ər-arvad” məhkəməyə gələrək nikahlarının saxta olduğunu etiraf ediblər. Nəticədə, saxta nikaha xitam verilib.

Rusiyanın Novqorod şəhərində isə hətta həmvətənlərinin Rusiyada qanunsuz qalmasını təşkil etməkdə təqsirli bilinən mütəşəkkil azərbaycanlı dəstə həbs edilmişdi.

Məhkəmə zamanı müəyyən edilib ki, müttəhimlər dörd Azərbaycan vətəndaşı üçün novqorodlu qadınla saxta nikah, onların Novqorodda yaşayış yeri üzrə qeydiyyata düşməsini və Rusiyada müvəqqəti yaşamaq üçün icazə almasını təşkil edib. Göstərilən xidmətlər qarşılığında Azərbaycan vətəndaşları qanunu pozanlara, təxminən, 150 min rubl məbləğində pul ödəyib.

Musavat.com

Tarix: 26 Oktyabr 2024, 20:38

Xəbər lenti