Blinkenin görüntü xarakterli görüş təklifinin mənası yoxdur - RƏY

“Azərbaycan regionda sülh və sabitliyin bərqərar olmasında maraqlıdır. Hazırda ölkəmizlə Ermənistan arasında sülh sazişinin layihəsi üzrə təmaslar davam edir. 44 günlük Vətən müharibəsindən sonra Azərbaycan qarşı tərəfə sülh sazişi imzalamağı təklif edib. İki ölkə arasında münasibətlərin normallaşdırılması prosesi ilə bağlı müəyyən beynəlxalq aktorlar, bəzi böyük dövlətlər vasitəçilik təşəbbüsü ilə çıxış ediblər. Məsələn, Avropa İttifaqının, Rusiyanın, Almaniyanın bu yöndəki fəaliyyətini xatırlada bilərik. ABŞ da belə təşəbbüslər irəli sürən dövlətlərdən biridir. Təsadüfi deyil ki, Azərbaycan və Ermənistan xarici işlər nazirlərinin sülh sazişi layihəsinin müzakirəsi ilə bağlı bir neçə görüşü ABŞ-də baş tutub. Bundan əlavə, ABŞ rəsmiləri mütəmadi olaraq Azərbaycana və Ermənistana səfərlər edib, münasibətlərin normallaşdırılması üçün müxtəlif təkliflər veriblər. Azərbaycan regionda sülh naminə beynəlxalq təşəbbüsləri dəstəkləyib. Lakin bu təşəbbüslər birtərəfli olmamalı, beynəlxalq hüquqa və ədalət prinsiplərinə əsaslanmalıdır”.

Bu sözləri Pravda.az-a açıqlamasında Milli Məclisin deputatı Samir Vəliyev deyib.

Həyat yoldaşını vəzifəyə gətirdiyi deyilən deputat danışdı: "Əmri mən vermirəm..." Pravda.az

Deputat xatırladıb ki, 2020-ci ildə baş vermiş Vətən müharibəsi, o cümlədən ötən il Qarabağdakı anti-terror tədbirləri nəticəsində ərazi bütövlüyünü və suverenliyini təmin edən Azərbaycan qarşıdakı mərhələdə regionda təhlükəsizlik arxitekterasının formalaşması istiqamətində addımlar atır: “Dünya birliyi də məsələnin mahiyyətini obyektiv şəkildə dəyərləndirməlidir. Təbii ki, məsələnin real həllində maraqlı olan tərəflər həm də bu sülhün möhkəmliyi üçün səy göstərməlidir. Lakin biz görürük ki, beynəlxalq aktorlar vasitəçilik edərkən bir çox hallarda neytrallığı pozurlar. Xüsusilə, ötən ilin sentyabrında Qarabağda anti-terror əməliyyatından sonra bu vəziyyət özünü daha qabarıq şəkildə büruzə verdi. Qarabağda erməni separatizminin ləğv olunmasını dəstəkləmək əvəzinə, Avropa İttifaqı yanlış mövqe sərgilədi. Eləcə də ABŞ Dövlət Departamenti, o cümlədən Konqresin bir sıra üzvləri qərəzli yanaşma ortaya qoydular. Konqresdə məlum dinləmələrin keçirilməsini, orada Dövlət Departamentinin nümayəndələrinin qərəzli çıxışlarını unutmamışıq. Təbii ki, qərəzli mövqe ortaya qoyan tərəflər sülh prosesində obyektiv vasitəçilik edə bilməzlər. Buna görə də rəsmi Bakı haqlı olaraq Maltada keçirilən ATƏT Nazirlər Şurasının toplantısı çərçivəsində Entoni Blinkenin vasitəçiliyi ilə Azərbaycan və Ermənistan xarici işlər nazirlərinin görüşünün keçirilməsini qəbul etməyib. İndiyə kimi baş verən proseslər Bayden Administrasiyasının Azərbaycana qarşı ədalətsiz davranışlarını sübut edib. Digər tərəfdən artıq bir aydan sonra Bayden Administrasiyası hakimiyyətdən gedəcək. Bu baxımdan, Blinkenin sadəcə görüntü xatirinə görüş təklifinin heç bir mənası yoxdur. Hadisələr sübut edir ki, sülh prosesində tərəflərin vasitəçi olmadan, birbaşa təmasları daha nəticə yönümlüdür. Sərhədlərin delimitasiya və demarkasiyası ilə bağlı görülən işlər, eləcə də sülh sazişinin böyük hissəsinin razılaşdırılması da bunu təsdiqləyir. Buna görə də birbaşa təmasların bundan sonra da davam etdirilməsi vacibdir”.

Aytəkin Qardaşova

Tarix: 7 Dekabr 2024, 12:24