Rusiyalı rejissor: “Azərbaycanın Qorbaçovla bağlı təşəbbüsünü dəstəkləyirəm”

“20 Yanvar faciəsi çirkli və siyasi cəhətdən satılmış tarixin məntiqi yekunu idi”.

Bunu Azərbaycanın Rusiyadakı Səfirliyində 20 Yanvar faciəsinin 35 illiyinə həsr olunan tədbirdə çıxış edən rusiyalı rejissor, ssenarist Lilliya Borovskaya bildirib.

Onun sözlərinə görə, faciə haqqında Rusiyada çox az bilinir. “Rusiyada Qarabağ haqqında məlumat 20 Yanvar faciəsindən daha çoxdur. Bu yaxınlarda öyrəndim ki, Azərbaycan ictimaiyyəti Nobel Komitəsinə Mixail Qorbaçovu Nobel Sülh Mükafatından məhrum etmək üçün sorğu göndərib. Bu addım Azərbaycan xalqının özünə hörmətini, milli qürurunu nümayiş etdirir. Mən Azərbaycan ictimaiyyətinin Qorbaçovun Nobel Sülh Mükafatından məhrum edilməsi ilə bağlı təşəbbüsünü tam dəstəkləyirəm. Rusiyada bir çox insan bu təşəbbüsü bəyənir. Rusiyada bu təşəbbüsü bəyənənlər, dəstəkləyənlər Qorbaçovu İuda adlandırırlar”.

L.Borovskaya Azərbaycana həsr olunmuş iki film çəkdiyini söyləyib: “Birinci film “Azərbaycanlı olmaq” adlanır. Heydər Əliyev Fondunun Moskvadakı nümayəndəliyinin dəstəyi ilə ərsəyə gələn ikinci film isə “Nə qədər uçmalıyam?” adlanır.

Bakıda çəkiliş apararkən biz Azərbaycanı və azərbaycanlıları tamamilə yenidən tanıdıq. Çoxlu azərbaycanlı ailələrində olduq və hər yerdə istər-istəməz Qarabağ məsələsindən danışılırdı. Bundan əvvəl regionda baş verənlər haqqında çox az təsəvvürümüz var idi. Görünürdü ki, Qafqazda hardasa uzaqlarda hərbi əməliyyatlar gedir, azərbaycanlılarla ermənilər sadəcə olaraq döyüşürlər. Lakin münaqişənin tarixini öyrəndikcə çox şey kəşf etdim. Fransalı jurnalistin erməni yaraqlısının azərbaycanlının evinə soxularaq anasının qucağından körpəni qoparıb, iki yerə bölüb ananın başına atması haqqında xatirələri məni xüsusilə sarsıtdı. Qadın dəli olub və gülməyə başlayıb. Bu hadisə mənim həyatımı iki yerə - bu hadisəni eşitdiyimə “qədər” və ondan “sonra”ya bölüb. O vaxtdan bəri mən öz adi Moskva həyatımı əvvəlki kimi qəbul edə bilmirdim. Qərara gəldim ki, bu barədə danışmaq lazımdır”.

Rusiyalı rejissor Azərbaycan televiziyasında 44 günlük müharibədə qələbədən sonra keçirilən çörək festivalından reportaj gördüyünü söyləyib. “Azərbaycanın müxtəlif bölgələrindən, o cümlədən işğaldan azad edilmiş ərazilərdən insanlar öz rayonlarında yetişdirilən buğdadan hazırlanan çörəyi gətirmişdilər. Bu, ilk baxışda sıradan bir hadisə olsa da, Azərbaycanın dinc həyata qayıtmaq, torpaqların dirçəldilməsinə, bütün qonşuları ilə birgə yaşamaq istəyini əyani şəkildə nümayiş etdirir. Bu fəlsəfə azərbaycanlılara xas olan özünə hörmət və milli ləyaqət hissinə əsaslanır. Qonşulardan biri meşə yanğını törədib qaçırsa, o birisi çörək hazırlamaq üçün buğda əkirsə, burada nəsə söz demək artıqdır”, - deyə Borovskaya yekunlaşdırıb.

APA

Tarix: 21 Yanvar 2025, 10:10

Xəbər lenti