Aydın Hüseynov: Azərbaycanın bank sektorunun göstəriciləri qənaətbəxşdir

Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov Azərbaycanda 22, Gürcüstanda 17, Ermənistanda 18 bank fəaliyyət göstərməsinə baxmayaraq, ötən il Gürcüstan banklarının 1,1 milyard, Ermənistan banklarının 914 milyon dollar, Azərbaycan banklarının isə 614 milyon dollar xalis mənfəət əldə etmələri məsələsinə aydınlıq gətirib.

Deputat Pravda.az-a açıqlamasında deyib ki, Azərbaycanın bank sektorundakı vəziyyət qənaətbəxşdir.

A.Hüseynov bildirib ki, bu sektorda vaxtı keçmiş borc əmsalı 2024-cü ildə xeyli azalıb, kreditləşmənin güclü artımı baş verib, kreditlərin qaytarılması yaxşılaşıb: “Həmçinin Azərbaycan banklarının kapitallaşması artıb, adekvatlıq əmsalı yüksəlib. Depozit bazasında cari hesabların üstünlüyü də xeyli yüksəlib. Eləcə də kredit portfelinin strukturunun da keyfiyyət baxımından yenilənməsi müşahidə edilir. Nəticə etibarilə real sektora yönəldilən kreditlərin sayında artımlar var. Mərkəzi Bank tərəfindən yeni strategiyanın qəbul edilməsi bank sektorunun inkişafına daha sistemli və ünvanlı yanaşmadan xəbər verir”.

Deputat qeyd edib ki, Azərbaycanın bank sektorunun maliyyə göstəriciləri kifayət qədər yaxşıdır, hazırda fəaliyyətdə olan 22 kommersiya bankı 2024-cü il üzrə xeyli mənfəət əldə edib: “Ümumi nəticələri bir yerdə hesabladıqda sektorun 1 milyard 73 milyon manata yaxın xalis mənfəət etdiyi məlum olub. Keçən il sektor 1 milyard 76.4 milyon manat xalis mənfəət əldə etmişdi. Xalis mənfəət üzrə ən güclü performans “Beynəlxalq Bank”a məxsusdur. Bank keçən ili 293.7 milyon manat xalis mənfəətlə bitirərək şəriksiz liderdir. “PAŞA Bank” 210.5 milyon manatla ikinci, “Kapital Bank” 186.5 milyon manatla üçüncü, “Xalq Bank” 65.7 milyon manatla dördüncü, “AccessBank” isə 54.1 milyon manatla beşliyi qapadır. Sistem əhəmiyyətli banklar ümumilikdə 807.1 milyon manat xalis mənfəət əldə edib ki, bu da ümumi sektorda 75% paya sahib olmaq deməkdir”.

A.Hüseynov deyib ki, son illərdə bank sektorunda institusional mühiti daha da yaxşılaşdırılıb, ödəniş xidmətləri və ödəniş sistemləri sahəsində qanaunvericilik bazası beynəlxalq təcrübəyə uyğun təkmilləşdirilib, bazara rəqabətə davamlı iştirakçıların daxil olması təmin edilib: “Ödəniş xidmətləri həyata keçirən 14 elektron pul, 8 ödəniş təşkilatı və bir ödəniş sistemi operatorunun fəaliyyəti lisenziyalaşdırılıb. Milli ödəniş sisteminin dövriyyəsi 4 dəfəyə yaxın artıb. Ölkəmizdə “Açıq bankçılıq” platforması qurulub. Strateji hədəflərdən biri rəqəmsal ödəniş sektorunun qabaqcıl beynəlxalq təcrübə əsasında daha da inkişaf etdirilməsidir ki, bu layihə üzrə lokal ödəniş kartlarının emissiyası gücləndirilməkdədir. Ümimilikdə, Azərbaycanın bank sektorunun ölkəmizin kapital bazarlarında rolu artmaqdadır”.

Qeyd: 2024-cü ildə Gürcüstan banklarında aktvlərin həcmi 34 milyard, Ermənistanda 27,7 milyard, Azərbaycanda isə 31,2 milyard dollar olub. Kreditləşmənin həcmi isə Gürcüstanda 21,5 milyard, Ermənistdanda 15,8 milyard və Azərbaycanda isə 16,2 milyard dollar olub. Bu göstəricilər sosial şəbəkələrdə müzakirə yaradıb.

Aytəkin Qardaşova

Tarix: 19 Fevral 2025, 09:01

Xəbər lenti