Bəzi ölkələrdə qış ayları başlayanda avtomobil yay təkərləri ilə hərəkət edirsə, cərimə tətbiq edilir - AÇIQLAMA

Bakıda bir neçə gündür, hökm sürən kəskin hava şəraiti nəticəsində qəza hadisələri qaçılmaz olub. Sosial şəbəkələrdə buzlanmış yollarda sürüşən avtomobillərin görüntüləri daha çox fəslə uyğun təkərlərdən istifadə edilməməsi məsələsini gündəmə gətirib. Məlum olub ki, sürücülərin əksəriyyəti avtomobillərində hələ də yay təkərindən istifadə etdikləri üçün qarlı havada digər sürücülərin və piyadaların həyatını da təhlükəyə atırlar.

Nəqliyyat məsələləri üzrə ekspert Rauf Ağamirzəyev Pravda.az-a açıqlamasında deyib ki, qarlı, buzlu yollarda hərəkət etmək ümumi olaraq rislikdir və bu riskləri artıran faktorlardan biri də təkərlərin dəyişilməməsidir.

Ekspert:

“Sürücülərin peşəkarlıq səviyyəsini də əlavə etsək, görərik ki, qeyri-peşəkar sürücülərin və ya təkərləri dəyişdirilməyən nəqliyyat vasitəsinin qəza riski daha yüksəkdir. Bəzi ölkələr buna qarşı sanksiyalar tətbiq edir. Qış ayları başlayanda avtomobil yay təkərləri ilə hərəkət edirsə, buna görə sürücü müvafiq olaraq cərimələnir. Məsələn, Ukraynada mövsümi tələblərə cavab verməyən təkərlərlə avtomobil idarə etməyə görə məsuliyyətin müəyyən edilməsi təklif olunur. İlk pozuntuya görə 1700 UAH, yəni 74,92 AZN cərimə, təkrar pozuntuya görə 3-6 ay müddətinə hüquqlardan məhrum edilməklə 3400-dən 8500 UAH-a, yəni 149,84 AZN-dən 374,60 AZN-ə qədər cərimə təklif olunur. Birinci növbədə maşın və təkərlər saz olmalıdır. Belə hava şəraitində sürücülər özləri də riskləri dəyərləndirib, yola çıxmaq barəsində ciddi fikirləşsələr, yaxşı olar. Adi yollarda yağışlı, buzlu, qarlı havalarda qoyulan tələblərə əməl etmək bir tərəfə, digər tərəfdən sürücülərin peşəkarlıq səviyyəsi çox önəmlidir ki, belə vəziyyətdə qəzalardan qaça, mümkün riskləri minimumlaşdıra bilsinlər. Sürət həddinə və digər qoyulmuş tələblərə əməl etmək lazımdır. Hava şəraitində yolların təmizlənməsi, işıqlandırılması da önəmlidir, amma bu vəziyyət də fərqli ölkələrdə fərqli cür həll olunur. Havanın şaxtalı, daha qarlı keçməsi davam edirsə, bəzi dövlətlər iş saatlarına dəyişiklik edirlər, yaxud onlayn məsafədən işlərin idarə olunmasına üstünlük verir. Düşünürəm, biz hər bir haldan istifadə etməliyik. Bəzi insanlar var ki, onların mobilliyi təmin olunmalıdır. Burada da relsli nəqliyyata üstünlük verməliyik ki, insanlar belə havalarda fərdi nəqliyyatdan bacardıqca istifadə etməsinlər, az istifadə etsinlər, yaxud metro, sərnişin qatarlarına yönəlsinlər”, - R.Ağamirzəyev qeyd edib.

Aytəkin Qardaşova

Tarix: 24 Fevral 2025, 13:44

Xəbər lenti