Rüfət Nasosnu Azərbaycan Yazıçılar Birliyinin adının dəyişdirilməsini təklif edir – “Üzv olmaq mənim də istəyimdir”

Meyxanaçı Rüfət Nasosnu (Kərimov) “ARB”də yayımlanan “Günaydın” verilişində birlikdə qonaq olduğu Əməkdar artist Elza Seyidcahanın Azərbaycan Yazıçılar Birliyinə (AYB) üzv olması barədə səsləndirdiyi fikirlərə görə tənqid edilməsinə münasibət bildirib.

Meyxanaçı Pravda.az-a açıqlamasında deyib ki, hər bir yazarın, rəssamın, musiqiçinin yaşadığı dövlətdə öz sahəsi üzrə fəaliyyət göstərən ali quruma üzv olması ən böyük arzularından biri olar.

“Təklif edirəm ki, Azərbaycan Yazıçılar Birliyinin adını Azərbaycanda Yazıçılar və Şairlər Birliyi qoysunlar. Çünki AYB-yə yazıçılarla yanaşı şairlər də, qəzəlxanlar da üzvdür. Ola bilər, əvvəllər adı belə olub, buna görə də indiyə qədər dəyişdirilməyib. AYB-yə üzv olmaq mənim də istəyimdir. Çalışıram ki, şeiriyyata geniş yer verim. Təbii ki, mən meyxana şairiyəm, poetik şeirlərdən daha çox istifadə etməyə çalışıram. Meyxana deyənin Azərbaycan Yazıçılar Birliyinin üzvü olması qeyri-adi hadisə deyil. Məndən əvvəl də üzv olanlar olub. Demirəm ki, AYB-yə kimi gəldi, qəbul edirlər, ancaq Elza Seyidcahanın AYB-yə üzv olması birmənalı qarşılanmadı. Çox etirazlar oldu. Bəziləri AYB-ni qeyri-ciddi qurum adlandırdı. Hətta bir neçə nəfəri ittiham etdilər ki, onların təkidi ilə Elza Seyidcahan AYB-yə qəbul edilib. Elza xanımın bəstələri superdir. Musiqi zövqü, mahnıdan anlayışı olan biri kimi Elza xanımın mahnılarına qulaq asıram. Elə mahnıları var ki, zövq alıram. Şeirləri isə... Özü deyir ki, şeirlərində fəlsəfə var. Mən də ali məktəbdə fəlsəfə dərsi keçmişəm. Yəqin, Elza xanımın dediyi mənim keçdiyim fəlsəfədən deyil, başqa fəlsəfədir, mən onu tapa bilmirəm. Bəlkə, bunun üçün dahi filosof olmaq lazımdır? Sərxan Kərəmoğlu verilişdə dedi ki, Elza Seyidcahanın şeirlərindəki fəlsəfəni gələcək nəsillər başa düşəcək. Yəqin, gələcək nəsillərin İQ səviyyəsi 50-100 il sonra yüksək olacaq, Elza xanım onlar üçün yazır. Arada bəzi şeirlərinə qulaq asıram. Özünəməxsusdur. Heç kimə qadağa qoymaq olmaz, sadəcə, məsləhət vermək olar. Elza xanım isə məsləhətləri qəbul etmir. Amma bir insan kimi onu iki gün öncə Xoşqədəm Hidayətqızının verilişində kəşf etdim. Yaxşı insandır, mehriban xanımdır. Buna görə də Elza xanıma çox xoşum gəldi. İnsan kənardan tamam başqa cür görünür, yaxud özünü başqa cür təqdim edir. Ola bilər, Elza xanımın belə etməkdə müəyyən səbəbləri var, özü bilir, biz bilmirik. Verilişin sonunda danışmağa vaxtımız oldu. Çox gözəl təsir bağışladı. Elza xanımın uşaqlığı barədə öyrənmişəm. Bizə qonşu rayondandır. Çətinliklər, əziyyət görmüş insandır. Buna görə də Elza xanımı çox da tənqid etmək istəmirəm. Ola bilər, ona müəyyən adamlar zəng edib deyirlər ki, şeirlərin əladır. Şəxsən məsləhət almadığım adamların fikri mənim üçün önəmli deyil. Yəqin, Elza Seyidcahan müəyyən adamların sözünə etibar edir. Uğurlar arzu edirəm”, - meyxanaçı qeyd edib.

Aytəkin Qardaşova

Tarix: 4 Mart 2025, 11:58

Xəbər lenti