Sağlamlığınızı qorumağın 10 sadə yolu: Yemək vərdişlərinizə diqqət edin

Sağlam həyat tərzi bədənin enerjili və möhkəm qalması üçün əsas amildir.

Pravda.az bildirir ki, yeməkdən əvvəl və sonra edilən kiçik səhvlər belə orqanizmin ümumi vəziyyətinə ciddi təsir göstərə bilər.

Həzm sistemini qorumaq və gündəlik sağlamlığımızı dəstəkləmək üçün bəzi vacib vərdişlərə əməl etmək tövsiyə olunur.

Su için

Həzmə kömək məqsədilə yeməkdən 30 dəqiqə əvvəl bir stəkan ilıq su içmək məsləhətdir. Bu, həm toxluq hissi yaradacaq, həm də artıq yeməyin qarşısını alacaq. Yemək zamanı az miqdarda su içmək faydalıdır, lakin həddindən artıq su qəbulundan qaçmaq lazımdır. Yeməkdən sonra da 30 dəqiqə gözləyib su içmək həzmi asanlaşdırır.

Yatmayın

Yeməkdən dərhal sonra uzanmaq tövsiyə olunmur. Bu, həzmi yavaşladır, şişkinlik və mədə yanmasına səbəb ola bilər. Mütəxəssislər axşam yeməyinin yatmazdan ən azı 2 saat əvvəl yeyilməsini tövsiyə edir. Bu müddətdə isə yüngül hərəkətlər etmək məsləhətdir.

Gəzintiyə çıxın

Yeməkdən sonra qısa, 15-20 dəqiqəlik gəzinti mədə üçün olduqca faydalıdır. Hətta ev ətrafında yüngül gəzmək də həzmi yaxşılaşdırır, şişkinliyi və narahatlığı azaldır.

Ağır idmandan uzaq durun

Yeməkdən sonra payida gəzmək faydalıdır, lakin ağır idman növləri, xüsusilə axşam saatlarında aparılan kardio məşqlər, bədən temperaturunu artıraraq melatonin hormonunun ifrazına mane olur. Bu isə yuxu rejiminə mənfi təsir göstərir.

Dişlərinizi fırçalayın

Amerika Diş Həkimləri Assosiasiyası yeməkdən sonra dişlərin fırçalanmasını tövsiyə edir. Bu vərdiş ağızda pH balansını qoruyur, dişlərin təmiz və sağlam qalmasına kömək edir. Hər dəfə 2 dəqiqə ərzində dişlərin bütün hissələrini təmizləmək məsləhətdir.

Siqaret çəkməyin

Yeməkdən sonra siqaret çəkmək bir çox insan üçün vərdişə çevrilib. Ancaq bu, mədə turşusunu artıraraq mədə yanması və digər həzm problemlərinə səbəb olur. Siqaret həmçinin bağırsaqlara da zərər verir və yuxu pozğunluğuna yol aça bilər.

Duş qəbul etməyin

Yeməkdən dərhal sonra duş almaq tövsiyə olunmur. Bu zaman bədənin istiliyi dəyişir və qan axını həzm sistemindən dərialtı qatlara yönəlir ki, bu da həzmi çətinləşdirir. Ən azı 30 dəqiqə gözləmək məsləhətdir.

Geniş geyimlər geyinin

Yemək zamanı rahat, geniş geyimlərə üstünlük verilməlidir. Dar geyimlər qarına təzyiq göstərərək mədə yanmasına və narahatlığa səbəb ola bilər. Yuxu zamanı da yüngül və sərbəst geyimlər tövsiyə olunur.

Kəməri boşaltmayın

Əgər yeməkdən sonra kəməri boşaltmaq ehtiyacı yaranırsa, bu, artıq qida qəbul etdiyinizi göstərir. Bu vərdiş uzunmüddətli perspektivdə qarın əzələlərinin boşalmasına və piylənməyə səbəb ola bilər. Kifayət qədər və yüngül qidalanmaq daha sağlam seçimdir.

Axşamlar meyvədən uzaq olun

Meyvələr gündəlik rasionda vacib yer tutur, lakin axşam yeməyindən dərhal sonra meyvə yemək həzmi çətinləşdirir. Meyvədəki təbii şəkərlər yuxuya da mənfi təsir göstərir. Meyvəni axşam yeməyindən 30 dəqiqə əvvəl yemək daha məqsədəuyğundur.

Qeyd: Sağlam həyat tərzi kiçik dəyişikliklərlə başlayır. Sadə vərdişlər - su içmək, düzgün vaxtda gəzintiyə çıxmaq, rahat geyimlərə üstünlük vermək və siqaretdən uzaq durmaq ümumi sağlamlığınızı əhəmiyyətli dərəcədə yaxşılaşdıra bilər. Lakin unutmayın ki, hər hansı ciddi dəyişikliyi həkim məsləhəti olmadan etmək təhlükəli ola bilər.

Əminə Bayramova

Tarix: 14 Aprel 2025, 15:15

Xəbər lenti