Hindistan qozu palmiyə ailəsinə daxil olan tropik meyvələrdən biridir. Liflə zəngin və qidalandırıcı xüsusiyyətləri ilə tanınan bu meyvə, tropik bölgələrdə yetişməsinə baxmayaraq, dünya üzrə geniş şəkildə istehlak olunur.

Pravda.az bildirir ki, hindistan qozu hissələr şəklində şirniyyatlarda və tort bəzəklərində, süd formasında isə vegan qidalanmada və desert hazırlığında istifadə oluna bilər. Təbii halında da meyvə kimi qəbul edilir.

Son illərdə isə kosmetik vasitələrin tərkibində tez-tez rast gəlinən hindistan qozu yağının saf formada istifadəsi populyarlıq qazanıb. Saç, dırnaq və dəriyə olan faydaları səbəbilə bu yağ həm təkbaşına, həm də digər maddələrlə birlikdə baxım məqsədilə istifadə olunur. Həmçinin bəzi yeməklərin və desertlərin hazırlanmasında da tətbiq edilə bilər.

Hindistan qozu yağı nədir?

Hindistan qozu yağı son beş ildə əhəmiyyətli dərəcədə populyarlıq qazanan bitki mənşəli məhsullardan biridir. Bu məhsulu həm supermarketlərdə, həm də kosmetik mağazalarda tapmaq mümkündür.

Eyni zamanda bəzi qablaşdırılmış qidaların və qəlyanaltıların tərkibində də hindistan qozuna rast gəlmək olar.

Fabrik şəraitində xüsusi avadanlıqlarla hazırlanan hindistan qozu yağını evdə də əldə etmək mümkündür. Qabığı soyulmuş hindistan qozu hissələri günəşdə və ya sobanın aşağı dərəcəsində qurudularaq meyvə sıxan cihazdan keçirdikdə təbii hindistan qozu yağı əldə edilə bilər.

Bu yağın məşhurluğunun əsas səbəblərindən biri də sağlamlığa olan müsbət təsirləridir. Tərkibində müxtəlif vitaminlər, minerallar və faydalı bitki mənşəli birləşmələr olan hindistan qozu yağı, lif xaricində meyvənin digər faydalı elementlərini yüksək konsentrasiyada saxlayır.

Bu səbəbdən şampun, saç kremi, bədən losyonları və nəmləndirici kosmetik vasitələrin əksəriyyətində istifadə olunur. Dəri və saç baxımı üçün xaricdən tətbiq edilə biləcəyi kimi, qidaların tərkibinə də əlavə edilərək qəbul oluna bilər.

Çoxsaylı meyvələr karbohidratla zəngindir, lakin hindistan qozunun əsas tərkibi yağdan ibarətdir. Bu isə onu yağ istehsalı üçün əlverişli edir. B vitamini qrupu və müxtəlif mineralların mənbəyi kimi də tanınır. Bundan başqa, maqnezium, mis, selen və fosfor mineralları da bu meyvədə yüksək səviyyədə mövcuddur.

Elmi araşdırmalara əsasən, obez xəstələrdə hindistan qozu yağının istifadəsi digər yağlara nisbətən daha çox arıqlamağa yardımçı ola bilər.

Hindistan qozu yağının faydaları:

Saç sağlamlığını dəstəkləyir

Saçların daha canlı və parlaq görünməsinə kömək edən hindistan qozu yağı, saç maskası və ya baxım yağı kimi istifadə oluna bilər. Saç dərisini gücləndirərək tökülmənin qarşısını almağa kömək edir.

Dəriyə qulluq edir

Tədqiqatlar hindistan qozu yağının dəri baryerini gücləndirdiyini və iltihabı azaltdığını göstərir. Bu səbəbdən dəriyə nəmləndirici, qoruyucu və müalicəvi baxım üçün tətbiq edilə bilər. Sızanaq və quruluq kimi dəri problemlərinə qarşı təsirlidir.

Güclü antioksidantlarla zəngindir

Gallik, salisilik, kumarik və kafeik turşuları kimi fenolik maddələr sayəsində bədəndə oksidativ stressi azaldır, hüceyrə zədələnməsinin və xərçəng riskinin qarşısını almağa yardım edir.

Ürək sağlamlığını qoruyur

Yağ istifadəsində həddi aşmamaq şərtilə hindistan qozu yağı, digər yağlarla əvəz edilərək istifadə edilə bilər. Çünki artıq yağ istehlakı obezite, yüksək xolesterol və ürək-damar xəstəliklərinə səbəb ola bilər.

Hindistan qozu yağı necə istifadə olunur?

Hindistan qozu yağı yemək və şirniyyatlarda adi yağlar kimi istifadə oluna bilər. Lakin istifadədə miqdarına diqqət edilməli, keyfiyyətli və qida üçün uyğun məhsullar seçilməlidir.

Eyni zamanda dəriyə, dırnaqlara və saçlara xaricdən baxım məqsədilə tətbiq edilə bilər. Xüsusilə saç maskalarında və təbii kosmetik məhsullarda geniş istifadə olunur.

Çatların qarşısını almaq, dərini yumşaltmaq və nəmləndirmək üçün də təsirlidir. Əgər hindistan qozu yağı istifadə etməyi düşünürsünüzsə, qida və sağlamlıq orqanları tərəfindən təsdiqlənmiş, tanınmış markaların məhsullarını seçməyiniz tövsiyə olunur.

Hindistan qozu yağı nəyə kömək olur?

Tərkibindəki faydalı yağ turşuları sayəsində hindistan qozu yağı, dəri və saç baxımında, ümumi sağlamlıqda geniş fayda verir. Dərini nəmləndirir, saçları gücləndirir, ağız sağlamlığını dəstəkləyir. Yeməklərdə sağlam alternativ olaraq istifadə edilə bilər və həzm sisteminə də müsbət təsir edir. Metabolizmi sürətləndirərək çəki nəzarətində yardımçı ola bilər.

Hindistan qozu yağının saç üçün faydaları

Saçları nəmləndirir, gücləndirir və qırılmaların qarşısını alır. Saç dərisini bəsləyərək kəpək yaranmasını azalda bilər. Zülal itkisini azaltdığı üçün saç tökülməsinin qarşısını almağa kömək ola bilər. Yağ turşuları saç tellərini bəsləyir və ətraf mühitin zərərli təsirlərindən qoruyur. Mütəmadi istifadə saçların sağlam və dolğun görünməsinə kömək edir.

Hindistan qozu yağı saçlara necə tətbiq olunur?

İstifadədən əvvəl hindistan qozu yağı bir qədər isidilərək maye halına gətirilə bilər. Daha sonra saç dibindən uclarına qədər masaj edərək tətbiq olunmalı və minimum 30 dəqiqə gözlənilməlidir. Daha dərin qulluq üçün gecə boyunca saça qoyulub səhər yuyula bilər. Həftədə 1-2 dəfə istifadə tövsiyə olunur.

Hindistan qozu yağının üz üçün faydaları

Dərini nəmləndirir və quruluğun qarşısını alır. Antibakterial və antioksidant xüsusiyyətləri sayəsində sızanaq yaranmasını azalda bilər. Həmçinin dəriyə təbii parlaqlıq qazandır.

Əminə Bayramova